<p><span style="color: #000000;"><strong>(ហាណូយ)៖</strong> ក្នុងមួយថ្ងៃៗ ប្រជាជនវៀតណាមយ៉ាងហោចណាស់ ២០០នាក់ បានស្លាប់ដោយសារ ជំងឺមហារីក ដែលសរុបមួយឆ្នាំនោះ គឺចំនួនមនុស្សស្លាប់មានច្រើនជាង ៧០,០០០នាក់ ឯណោះ នៅទូទាំងប្រទេសអាស៊ានមួយនេះ។ នេះបើតាមការផ្សាយដោយ ទីភ្នាក់ងារព័ត៌មានចិន ស៊ិនហួរ នារសៀលថ្ងៃសុក្រ ទី០៧ ខែតុលា ឆ្នាំ២០១៦។</span></p>
<p><span style="color: #000000;">ស្ថិតិខាងលើ ត្រូវបានប្រកាសឲ្យដឹងនៅក្នុងសិក្ខាសាលាជាតិមួយ ស្តីពីការទប់ស្កាត់ និងប្រយុទ្ធប្រឆាំង ជំងឺមហារីក ដែលកំពុងប្រព្រឹត្តទៅនៅក្នុងរដ្ឋធានីហាណូយ នៃប្រទេសវៀតណាម ហើយសិក្ខាសាលា ដែលមានរយៈពេលពីរថ្ងៃនេះ ទទួលបានការចូលរួមពីមហាជនច្រើនជាង១,០០០នាក់ ដោយក្នុងរួមមាន វេជ្ជបណ្ឌិតឯកទេសជំងឺមហារីក អ្នកជំនាញ និងអ្នកបង្កើតគោលនយោបាយដ៏ទៃៗទៀតផងដែរ។</span></p>
<p><span style="color: #000000;">ជាមួយគ្នានេះដែរ លោក Tran Van Thaun ដែលប្រធានមន្ទីរពេទ្យនាំមុខគេរបស់វៀតណាម K Hospital បានថ្លែងឲ្យដឹងថា អ្នកជំងឺមហារីកជាង ៧០ភាគរយ នៅក្នុងប្រទេសវៀតណាម ភាគច្រើនសម្រេចចិត្តទៅរកមន្ទីរពេទ្យ នៅពេលដែលខ្លួនឈានដល់ ដំណាក់កាលចុងក្រោយទៅហើយ ដែលប្រការនេះធ្វើឲ្យកម្រិត នៃការព្យាបាលឲ្យជាសះស្បើយតិចតួចបំផុត។</span></p>
<p><span style="color: #000000;">គួរបញ្ជាក់ដែរថា បើយោងតាមអ្នកជំនាញបារាំងនៅឯសិក្ខាសាលាខាងលើ នៅពេលដល់ឆ្នាំ២០២០ ប្រទេសវៀតតណាមនឹងមានករណីនៃជំងឺមហារីកប្រហែល ១៨៩,០០០ ជារៀងរាល់ឆ្នាំ ហើយបច្ចុប្បន្ន វៀតណាមគឺស្ថិតនៅក្នុងលេខរៀងទី៧៨ក្នុងចំណោម១៧២ប្រទេស នៅលើសកលលោក ក្នុងបញ្ជីប្រទេសដែលមានករណីជំងឺមហារីកថ្មី៕</span></p>
<p><span style="color: #000000;"><a class="thickbox" title="" href="/FileManager/Commons/2016/10/7/20-07-10-2016--16-01-37.jpg"><img src="/FileManager/Articles/mce/2016/10/7/20-07-10-2016--16-01-37.jpg" alt="" /></a><br /><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>