<p><span style="color: #000000;"><strong>(កោះកុង)៖</strong> លោក ម៉ក់ ណុច ប្រធានផ្សារដងទង់ ដែលប្រើអំពើហិង្សា យកដៃទៅប្របាច់ក និងទះកំភ្លៀង ទៅលើក្មេងស្រី២នាក់ នៅថ្ងៃទី១២ ខែសីហា ឆ្នាំ២០១៦ ក្នុងចំណុចផ្សារដងទង់ ត្រូវបានតុលាការខេត្តកោះកុង ចេញដីកាឃុំខ្លួនដាក់ពន្ធនាគារហើយ កាលពីយប់មិញ។</span></p>
<p><span style="color: #000000;">មន្រ្តីតុលាការខេត្តកោះកុងបានប្រាប់ភ្នាក់ងា Fresh News នៅព្រឹកថ្ងៃទី១៤ ខែសីហា ឆ្នាំ២០១៦នេះថា <strong>«នៅយប់មិញវេលាម៉ោងជាង៧ ប្រធានផ្សារដងទង់ត្រូវបានលោកចៅក្រម សម្រេចឃុំខ្លួនដាក់ពន្ធនាគារហើយ»។</strong></span></p>
<p><span style="color: #000000;">សូមបញ្ជាក់ថានលោក ម៉ក់ ណុច ត្រូវបានសមត្ថកិច្ចធ្វើការឃាត់ខ្លួន ដើម្បីធ្វើការសាកសួរជុំវិញករណី ប្រើអំពើហិង្សាលើក្មេងស្រីទាំង២នាក់ នៅរសៀលថ្ងៃទី១២ ខែសីហា ឆ្នាំ២០១៦។</span><br /><span style="color: #000000;">សមត្ថកិច្ចខេត្តកោះកុងបានឲ្យដឹងថា ជុំវិញការករណីផ្ទុះអំពើហិង្សាក្នុងផ្សារដងទង់នេះ ក្រោយពីទទួលបានព័ត៌មានសមត្ថកិច្ចដែល ប្រចាំការការពារសន្តិសុខផ្សារ សមត្ថកិច្ចក្រុងបានចុះទៅដល់ កន្លែងកើតហេតុភ្លាមៗផងដែរ តែត្រូវលោកប្រធានផ្សារ បានរំសាយក្រុម មនុស្សបាត់អស់ទៅហើយ។</span></p>
<p><span style="color: #000000;">ចំពោះករណីប្រើអំពើហិង្សានេះផងដែរ ប្រជាពលរដ្ឋខេត្តកោះកុង សំណូមពរឲ្យ ថ្នាក់ដឹកនាំគួរចាត់វិធានការណ៍ ចំពោះលោក ប្រធានផ្សារទៅតាមច្បាប់។</span></p>
<p><span style="color: #000000;">សូមជម្រាបថា នៅព្រឹកថ្ងៃទី១២ ខែសីហាម្សិលមិញ ក្មេងស្រីរងគ្រោះ ឡា ដា អាយុ១៣ឆ្នាំ ដែលត្រូវប្រធានផ្សារប្របាច់ក បាននិយាយថា នាងកំពុងអង្គុយជាមួយម្តាយ លក់ឥវ៉ាន់ធម្មតា ដូចសព្វមួយដង ស្រាប់តែប្រធានផ្សារ ដើរមកដល់តូបលក់ឥវ៉ាន់ ម្តាយនាង ហើយក៏យកឥវ៉ាន់របស់ម្តាយនាង ទៅចោលក្នុងធុងសំរាម ពេលនោះនាងក៏រត់យកមកវិញ ស្រាប់តែប្រធានផ្សារផ្ទុះកំហឹង មកច្របាច់កនាងចង់ដាច់ខ្យល់ស្លាប់ តែត្រូវបានបងស្រីនាងមកជួយ និងអ្នកលក់ដូរជិតខាងជួយទាន់ ទើបលោកប្រធានផ្សារ លែងដៃពីកនាងវិញ។</span></p>
<p><span style="color: #000000;">រីឯបងស្រីរបស់នាង ឈ្មោះ ម៉ាក់ ស្រីនាង ដែលត្រូវបក្ខពួកប្រធានផ្សារទះកំភ្លៀង បាននិយាយថា ដោយមើលឃើញនូវសកម្មភាព ប្រធានផ្សារប្របាច់កប្អូនចង់ដាច់ខ្យល់ នាងបានរត់ទៅជួយតែត្រូវ បក្ខពួកគាត់ (ប្រធានផ្សារ) ទះ១កំភ្លៀងទៀត។</span></p>
<p><span style="color: #000000;">ចំណែកម្ដាយក្មេងស្រីរងគ្រោះ បានឲ្យដឹងថា <strong>«ប្រធានផ្សារនឹងរករឿង ខ្ញុំជារៀងរាល់ថ្ងៃមិនដឹងមានគំនុំអ្វីជាមួយគាត់ និងប្អូនគាត់ទេ តែគ្រាន់តែដឹងថា ខ្ញុំដាក់លក់ចូលផ្លូវប្រហែល១តឹក ព្រោះឃើញគេដាក់លក់ដូចគ្នា សូម្បីតែខ្សែបក្ខពួកគាត់ (ប្រធានផ្សារ) ក៏លក់ចូល ចំណីផ្លូវដើរដែរ ចុះហេតុអីក៏គាត់មិនទៅរករឿងគេផង»។</strong></span></p>
<p><span style="color: #000000;">ជុំវិញបញ្ហានេះដែរអាជីករលក់ដូរ ក្នុងផ្សារដងទង់ បាននិយាយថា <strong>«គ្មាននរណាម្នាក់ហ៊ាន ជាមួយគាត់ទេរាល់ថ្ងៃនេះ បើហ៊ានតវ៉ាច្បាស់ជារកកន្លែងលក់អត់មានឥឡូវ»៕</strong></span></p>
<p><a class="thickbox" title="" href="/FileManager/Commons/2016/8/14/19-14-08-2016--15-24-40.jpg"><img src="/FileManager/Articles/mce/2016/8/14/19-14-08-2016--15-24-40.jpg" alt="" /></a></p>
<p><span style="color: #000000;"><img src="https://scontent-kul1-1.xx.fbcdn.net/v/t1.0-9/13925356_312096149122894_5360422334557839311_n.jpg?oh=192cce174b161b57f9f700feecc3a22d&oe=581C0FBD" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>