<p><span style="color: #000000;">ភ្នំពេញ៖ លទ្ធផលនៃការប្រឡង សញ្ញាប័ត្រមធ្យមសិក្សាទុតិយភូមិ ឬបាក់ឌុប អាចនឹងប្រកាសមុនកាលកំណត់ ដែលពីមុនក្រសួងគ្រោងប្រកាស នៅថ្ងៃទី៤-៥ ខែវិច្ឆិកា ឆ្នាំ២០១៤។</span></p>
<p><span style="color: #000000;">ថ្លែងប្រាប់ មជ្ឈមណ្ឌលព័ត៌មាន ដើមអម្ពិល នៅព្រឹកថ្ងៃអង្គារ៍ ទី២៨ ខែតុលា ឆ្នាំ២០១៤នេះ លោករដ្ឋមន្ត្រី ហង់ ជួនណារ៉ុន បញ្ជាក់ថា "រហូតមកដល់ពេលនេះ កំណែវិញ្ញាសា បានកែចប់សព្វគ្រប់អស់ហើយ។ ប្រសិនបើយើងបញ្ចូលទិន្ន័យពិន្ទុចប់ យើងនឹងប្រកាសលទ្ធផលមុន"។</span></p>
<p><span style="color: #000000;">បើតាមលោករដ្ឋមន្ត្រី ភាគរយនៃបេក្ខជន ដែលប្រឡងជាប់មានចំនួនតិចជាងលើកទី១ ប៉ុន្តែ លោកមិនអាចបញ្ជាក់តួលេខ ជាផ្លូវការបាននោះទេ។ លោកនិយាយថា "ប្រហែលជាអ្នកជាប់ មានចំនួនតិចជាងមុន។ នេះគ្រាន់តែជាការប្រហែលប៉ុណ្ណោះ យើងរង់ចាំពីបីថ្ងៃទៀតទៅនឹងដឹងហើយ"។</span></p>
<p><span style="color: #000000;">លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានប្រាប់មជ្ឈមណ្ឌលព័ត៌មាន ដើមអម្ពិល នៅព្រឹកថ្ងៃអង្គារ៍នេះថា បេក្ខជនដែលប្រឡងជាប់ មានចំនួនតែក្រោម២០ភាគរយតែប៉ុណ្ណោះ។ លោកថា "ដូចនេះ ក្រសួងត្រូវតែធ្វើការកែលម្អ ពីថ្នាក់ក្រោមតទៅ ដើម្បីពង្រឹងប្រសិទ្ធភាពនៃការអប់រំ"។</span></p>
<p><span style="color: #000000;">សូមបញ្ជាក់ថា បេក្ខជនដែលប្រឡងលើកទី២នេះ មានចំនួនជិត ៧ម៉ឺននាក់ និងមណ្ឌល១១៧ ក្នុងនោះមានបន្ទប់ចំនួន ២.៧៥២ គ្រប់រាជធានី ខេត្ត។ កាលពីប្រឡងបាក់ឌុបលើទី១ នៅថ្ងៃទី៤-៥ ខែសីហា ឆ្នាំ២០១៤ មានបេក្ខជនប្រឡងជាប់សរុបចំនួន ២៣.១២៦នាក់ ត្រូវជា ២៥,៧២ ភាគរយ ក្នុងចំណោមសិស្សសរុប ៨៩.៩៣៧នាក់៕</span></p>
<p><span style="color: #000000;"><a class="thickbox" title="" href="/FileManager/Commons/2014/10/28/that-285-28-10-2014--12-05-23.jpg"><img src="/FileManager/Articles/mce/2014/10/28/that-285-28-10-2014--12-05-23.jpg" alt="" /></a></span></p>
<p style="text-align: right;"><br /><span>ផ្ដល់សិទ្ធិដោយ៖ ដើមអម្ពិល</span><span style="color: #000000;"><a class="thickbox" title="" href="/FileManager/Commons/2014/10/28/that-285-28-10-2014--12-05-23.jpg"></a><br /></span></p>