<div class="body">
<div class="container">
<div class="row-fluid">
<div id="content" class="span9">
<div class="item-page">
<p><span style="color: #000000;"><strong>(ភ្នំពេញ)៖</strong> កីឡាករប្រដាល់ម្នាក់ហាត់នៅក្លិប «សុភានូមានជ័យ» ដែលស្រវឹងទឹកត្នោតជូ ហើយទៅប្រទូស្តកេរ្តិ៍នាងក្រមុំអាយុ១៦ឆ្នាំ ត្រូវបានចៅក្រមស៊ើបសួរសាលាដំបូងរាជធានីភ្នំពេញ នៅរសៀលថ្ងៃទី១១ ខែមករា ឆ្នាំ២០១៧នេះ បានសម្រេចឃុំខ្លួនដាក់ពន្ធនាគារ ដើម្បីរង់ចាំការស៊ើបអង្កេតបន្តទៀត ។</span></p>
<p><span style="color: #000000;">ហេតុការណ៍នេះកើតឡើងកាលពីវេលាម៉ោង១៖៣០រំលងអធ្រាត្រឈានចូលថ្ងៃទី៨ ខែមករា ឆ្នាំ២០១៧ នៅចំណុចផ្ទះ ជួលស្ថិតនៅភូមិវាលស្បូវ សង្កាត់វាលស្បូវ ខណ្ឌច្បារអំពៅ ។</span></p>
<p><span style="color: #000000;">ជនសង្ស័យឈ្មោះ ឌីន ឆៃណា អាយុ២៥ឆ្នាំ ជាកីឡាករប្រដាល់នៅក្លិប «សុភានូមានជ័យ» ស្នាក់នៅភូមិកើតហេតុ មានស្រុកកំណើត នៅស្រុកអន្លង់វែង ខេត្តបន្ទាយមានជ័យ ។ ចំណែកជនរងគ្រោះ អាយុ១៦ឆ្នាំ មុខរបរសិស្សស្នាក់នៅផ្ទះកើតហេតុស្ថិតនៅ សង្កាត់វាលស្បូវ ខណ្ឌច្បារអំពៅ ។</span></p>
<p><span style="color: #000000;">ម្ដាយជនរងគ្រោះអ្នកស្រី អ៊ីន រ៉ន អាយុ៤៣ឆ្នាំ មុខរបរជាបុគ្គលិកអនាម័យក្រុម ហ៊ុនមួយបានប្រាប់ថា មុនពេលកើតហេតុកូនស្រីគាត់ ដេកនៅផ្ទះជួលខាងលើជាមួយ ប្អូនស្រី៣នាក់ទៀត។</span></p>
<p><span style="color: #000000;">ក្រោយមកស្រាប់តែជនសង្ស័យបានចូលទៅដេកឱបកូនស្រីច្បងរបស់គាត់ តែនាងមិនបានចាប់អារម្មរណ៍ទេ ទាល់តែពេល ភ្ញាក់ដឹងខ្លួនឡើងទៅបត់ជើងតូច មើលទៅមិនមែនបងប្អូនក៏ស្ទុះចេញស្រែកផ្អើលឆោឡោ ហើយកូនស្រីរត់ទៅគោះទ្វារបន្ទប់ គាត់ទើបគាត់ដឹង ហើយទៅប្ដឹងសមត្ថកិច្ចឲ្យ ជួយអន្តរាគមន៍ ទៅចាប់ជនសង្ស័យនៅពេលនោះតែម្តង។</span></p>
<p><span style="color: #000000;">សមត្ថកិច្ច បញ្ជាក់ថា ជនសង្ស័យជាកីឡាករប្រដាល់សេរី ហ្វឹកហាត់នៅក្លិប «សុភានូមានជ័យ» ឡើងប្រកួតបានចំនួន១០ដង ក្នុងនោះឈ្នះ៨ដង និងចាញ់២ដង។ មុនពេលកើតហេតុជនសង្ស័យបានទៅផឹកទឹកត្នោតជូរជាមួយមិត្តភក្តិ និងឪពុកមារបស់ជនរង គ្រោះសរុបទាំងអស់គ្នា៣នាក់ នៅផ្ទះមិត្តភក្តិនៅក្បែរផ្ទះជនរងគ្រោះ ដោយផឹកទឹកត្នោតជូអស់២០លីត្ររហូតស្រវឹងជោកជាំ ហើយស្រាប់តែបាត់ឪពុកមារបស់ជនរងគ្រោះដែលអង្គុយជាមួយគ្នានោះ ទើបរូបគេដើររកក៏ចូលច្រឡំ ផ្ទះរបស់ជនរងគ្រោះ។</span></p>
<p><span style="color: #000000;">ពេលនោះជនសង្ស័យដើរ ចូលទៅស្រែកហៅឪពុកមា របស់ជនរង គ្រោះ តែអត់មានអ្នកឆ្លើយ ក៏ចូលទៅដេកឱបជនរងគ្រោះដែលកំពុងដេកជាមួយប្អូន៣នាក់។ លុះពេលជនរងគ្រោះដឹងខ្លួនក៏ស្រែកជេរ និងយករឿងហេតុប្រាប់ម្តាយ ហើយម្តាយក៏ប្ដឹងនគរបាលប៉ុស្តិ៍ឲ្យឃាត់ខ្លួនតែម្តង ។</span></p>
<p><span style="color: #000000;">ក្រោយពីសមត្ថកិច្ចហៅជនសង្ស័យទៅសួរនាំ ជនសង្ស័យបានសារភាព ដូចការចោទប្រកាន់ពិតប្រាកដមែន៕</span></p>
<p><span style="color: #000000;"><img src="http://image.freshnewsasia.com/2016/ID-112/fn-2017-01-11-14-21-08-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-112/fn-2017-01-11-14-21-08-1.jpg" alt="" width="730" /></span></p>
</div>
<div id="system-message-container">
<div id="system-message"></div>
</div>
<div class="span9" style="text-align: right;"><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></div>
</div>
</div>
</div>
</div>