<p><span style="color: #000000;"><strong>ភ្នំពេញ៖</strong> ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានប្រកាសយកថ្ងៃទី១៩ ខែមិថុនា ឆ្នាំ២០១៥ ជាថ្ងៃកាន់ទុក្ខជាផ្លូវការ នៃការធ្វើមរណកាលរបស់សម្តេច ជា ស៊ីម ប្រធានព្រឹទ្ធសភា និងជាប្រធានគណបក្សប្រជា ជនកម្ពុជា។</span></p>
<p><span style="color: #000000;">នៅក្នុងសារាចររបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ដែលចេញផ្សាយកាលពីថ្ងៃទី០៨ ខែមិថុនា ឆ្នាំ២០១៥ បានបញ្ជាក់ថា ក្នុងឱកាសប្រារព្ធពិធីកាន់ទុក្ខនេះ គ្រប់ក្រសួងស្ថាប័ន សាលារៀន មន្ទីរពេទ្យរបស់រដ្ឋ ឯកជន និងមន្រ្តីរាជការ កងកម្លាំងប្រដាប់អាវុធគ្រប់ប្រភេទ គ្រប់ទីវត្តអារាម ព្រមទាំងប្រជាជនទូទាំងប្រទេស ត្រូវបង្ហូតទង់ជាតិត្រឹមមួយភាគបី នៃដងទង់ជាតិចាប់ពីលើ នៅថ្ងៃទី១៩ ខែមិថុនា ឆ្នាំ២០១៥។</span></p>
<p><span style="color: #000000;">សារាចរដដែលបានបញ្ជាក់ផងដែរថា គ្រប់ស្ថានីយវិទ្យុ ទូរទស្សន៍ជាតិ និងឯកជនទាំងអស់ ត្រូវផ្អាកការសម្តែង និងចាក់ផ្សាយនូវទស្សនីយភាពផ្សេងៗ ដែលមានលក្ខណៈសប្បាយគគ្រឹកគគ្រេង។</span></p>
<p><span style="color: #000000;">ក្នុងសារាចរនេះ នាយករដ្ឋមន្រ្តីកម្ពុជា បានសង្កត់ថា គ្រប់ក្រសួង ស្ថាប័នពាក់ព័ន្ធ គណៈកម្មាធិការជាតិរៀបចំ បុណ្យជាតិ និងអន្តរជាតិ និងអាជ្ញាធរដែនដីគ្រប់លំដាប់ថ្នាក់ មន្រ្តីរាជការ កងកម្លាំងប្រដាប់អាវុធគ្រប់ប្រភេទ ព្រមទាំងជនរួមជាតិទាំងអស់នៅក្នុងព្រះរាជាណាចក្រកម្ពុជា ត្រូវចូលរួមអនុវត្តឲ្យមានប្រសិទ្ធភាពខ្ពស់ ដើម្បីជា កិច្ចចូលរួមមរណៈទុក្ខ ដ៏ក្រៀមក្រំបំផុតនេះ។</span></p>
<p><span style="color: #000000;">សម្តេច ជា ស៊ីម ឥស្សរជននយោបាយជាន់ខ្ពស់ និងឆ្នើមមួយរូបរបស់កម្ពុជា ដែលបានបូជាអស់កម្លាំងកាយចិត្ត ក្នុងបុព្វហេតុជាតិ មាតុភូមិ សាសនា និងព្រះមហាក្សត្រនោះ បានទទួលមរណភាពនៅម៉ោង ៣ និង៤៥នាទី រសៀលថ្ងៃទី០៨ ខែមិថុនា ឆ្នាំ២០១៥៕</span></p>
<p><span style="color: #000000;"><a class="thickbox" title="" href="/FileManager/Commons/2015/6/9/st-010-09-06-2015--10-02-32.jpg"><img src="/FileManager/Articles/mce/2015/6/9/st-010-09-06-2015--10-02-32.jpg" alt="" /></a></span></p>
<p style="text-align: right;"><span>ផ្ដល់សិទ្ធដោយ៖ ដើមអម្ពិល</span><span style="color: #000000;"><br /></span></p>