<p><span style="font-size: 12px; color: #000000;">សិល្បៈ លួងលោម គឺជាមធ្យោបាយយកចិត្តមនុស្ស ធ្វើឲ្យគេត្រូវចិត្ត ធ្វើឲ្យគេចូលចិត្ត។ ដើម្បីនឹងយកចិត្តគេបាន យើងត្រូវយល់ពីចិត្តសាស្ត្រមនុស្ស។ អ្នកណាក៏ដូចអ្នកដែរ តែងចង់ឲ្យគេគោរព ចង់ឲ្យគេយល់ថាខ្លួនសំខាន់ តែងគិតថាគំនិតខ្លួនត្រឹមត្រូវ។ ខាងក្រោមគឺជាមធ្យោបាយខ្លះ ក្នុងការយកចិត្តមនុស្ស៖</span></p>
<p><span style="color: #000000;"><strong>– </strong><strong>ដាច់ខាតកុំជជែកយកឈ្នះចាញ់៖</strong> ការប្រកែកយកឈ្នះ មិនអាចជួយអ្វីដល់អ្នកបានច្រើនទេ។ អ្នកជជែកឈ្នះគេ តើគេព្រមកែគំនិតរបស់គេ មកស្របនឹងអ្នកវិញទេ? ទេ! គេចាញ់ គេបាក់មុខ ទោះជាគំនិតរបស់អ្នកល្អក៏ដោយ ក៏គេនៅតែមិនទទួលយកគំនិតរបស់អ្នកដែរ។ ចូររកវិធីផ្សេង ដើម្បីអូសទាញគេឲ្យយល់តាមយើង ជាជាងជជែកយកឈ្នះ។</span></p>
<p><span style="color: #000000;"><strong>– </strong><strong>កុំវែកញែកថាគេខុសឲ្យសោះ៖</strong> តាមធម្មតាមនុស្សយើង ចូលចិត្តផ្លាស់ប្តូរគំនិតខ្លួនចោល ដោយគ្មានស្តាយស្រណោះ តែបើមាននរណាម្នាក់ថា គំនិតរបស់យើងខុស ក៏ស្រាប់តែប្រកាន់ខ្ជាប់ មិនបោះបង់គំនិតចោលទៅវិញ។ សារជាតិរបស់មនុស្សទូទៅ គឺមានគំនិតអញនិយម អញជាធំ ចង់ឲ្យគេគោរព។ ប្រសិនបើយើងឃើញថា គំនិតរបស់បុគ្គលនោះខុស ហើយយើងចង់កែប្រែ យើងគួររកវិធីនិយាយ កុំឲ្យគេយល់ថា យើងថា គំនិតគេខុស។ ឧទាហរណ៍ យើងអាចនិយាយថា ខ្ញុំមិនហ៊ានថា យោបល់លោកខុសទេ! ហើយខ្ញុំក៏មិនហ៊ានថា យោបល់ខ្ញុំត្រូវដែរ… ពីព្រោះខ្ញុំធ្លាប់ភាន់ច្រឡំ ច្រើនលើកមកហើយ បើខ្ញុំយល់ខុស ខ្ញុំនឹងកែប្រែជាក្រោយ ប៉ុន្តែក្នុងរឿងនេះ យើងគួរពិចារណា… ។ អ្នកកវីឈ្មោះល្បី ម្នាក់និយាយថា៖ “បង្រៀនគេតែកុំឲ្យមានឫកពារ ជាអ្នកបង្រៀនគេ។ ពន្យល់រឿងថ្មីមួយ តែធ្វើឫកហាក់ដូចជាយើង រំលឹករឿងចាស់មួយដែលគេភ្លេច” ។</span></p>
<p><span style="color: #000000;"><strong>– </strong><strong>វិធានរបស់សូក្រាត៖</strong> កាលណាចង់ឲ្យគេជឿតាមអ្នក ជាបឋមអ្នកត្រូវលើកយកតែរឿងណា ដែលគេមានទស្សនៈស្របគ្នានឹងអ្នក។ ម្យ៉ាងទៀតត្រូវខិតខំឆ្កឹះកកាយយកចំណុចណា ដែលគេចូលចិត្តដូចគ្នា តែយើងត្រូវចេះនិយាយបង្វែរបន្តិចម្តងៗ ទៅរកវត្ថុបំណង ដែលយើងចង់បាន។ ត្រូវខិតខំនិយាយបែបណា ឲ្យអ្នកស្តាប់ឆ្លើយថា៖ “ត្រូវហើយ” “ពិតមែន” ។</span></p>
<p><span style="color: #000000;"><strong>– </strong><strong>ទុកឲ្យគេនិយាយឲ្យអស់ចិត្ត៖</strong> អ្នកខ្លះព្រោះតែចង់ឲ្យគេស្របតាមយោបល់ខ្លួន ក៏និយាយកាត់គេ ទទឹងទទែង ធ្វើឲ្យភាគីម្ខាងទៀត ទៅជាខឹងសម្បា។ មនុស្សម្នាក់ដែលខឹង ទោះបីជាគំនិតយើង ល្អយ៉ាងណាក៏ដោយ ក៏គេមិនទទួលស្គាល់ដែរ។ មនុស្សខឹងហាក់ដូចជា មានអ្វីម្យ៉ាងតឹងណែនក្នុងទ្រូង លុះបាននិយាយចេញអស់ ក៏បានធូក្លាយជាធម្មតាវិញ ដូចពាក្យគេថា និយាយឲ្យធូពោះ។ យើងត្រូវទុកឲ្យគេនិយាយ ឲ្យអស់សាច់រឿង ទើបយើងអាចដឹងរឿងរ៉ាវពេញលេញ និងរកវិធីនិយាយឲ្យត្រូវចំនុចចិត្ត។</span></p>
<p><span style="color: #000000;"><strong>– </strong><strong>បើមានកំហុសយើងត្រូវសារភាពភ្លាម៖</strong> កាលណាមានកំហុស យើងត្រូវស្មោះត្រង់ ក្លាហានទទួលសារភាពភ្លាមៗ នោះអ្នកដែលសៅហ្មងនឹងយើង ក៏ស្រាកស្រាន្តចិត្ត លែងសូវខឹង ឬលែងខឹង នឹងយើងទៅតាមនោះដែរ។ កាលណាគេលែងខឹង យើងងាយស្រួលនឹងនិយាយគ្នា៕</span></p>
<p><span style="color: #000000;">ប្រភព៖ salarean.com</span></p>
<p><span style="color: #000000;"><br /><a class="thickbox" title="" href="/FileManager/Commons/2016/12/30/06c-30-12-2016--15-41-49.jpg"><img src="/FileManager/Articles/mce/2016/12/30/06c-30-12-2016--15-41-49.jpg" alt="" /></a><br /></span></p>
<div id="news_detail" class="postcontainer">
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>
</div>
<div class="detail_bottom_function">
<div class="facebook_like"></div>
</div>
<p><span style="font-size: 12px; color: #000000;"> </span></p>