<div class="article-content">
<p><strong>កំពង់ស្ពឺ៖</strong> យុវជនម្នាក់បានស្លាប់ពេលកំពុងបញ្ជូន ទៅកាន់មន្ទីរពេទ្យ និងមិត្តភក្តិម្នាក់ទៀត រងរបួសធ្ងន់ ដោយសារ ជម្លោះពាក្យសម្តីនៅក្នុងរាំវង់បុណ្យកឋិន កាលពីម៉ោងប្រមាណ ៩ និង៤៥នាទី យប់ថ្ងៃទី២៦ ខែតុលា ឆ្នាំ២០១៣ ស្ថិតនៅចំងាយពីវត្តចំណារ ក្នុងភូមិផ្សារសាមគ្គី សង្កាត់កណ្តុលដុំ ក្រុងច្បារមន ខេត្តកំពង់ស្ពឺ ចម្ងាយប្រមាណ ៧០០ម៉ែត្រ។</p>
<p>សមត្ថកិច្ចមូលដ្ឋានបានឲ្យដឹងថា ជនរងគ្រោះឈ្មោះ វ៉ែន វ័យ អាយុ១៩ឆ្នាំ បានដាច់ខ្យល់ពេលកំពុងបញ្ជូនទៅ កាន់មន្ទីរពេទ្យបានពាក់កណ្តាលផ្លូវ។ រីឯជនរងគ្រោះម្នាក់ទៀត ដេករងរបួសធ្ងន់មានឈ្មោះ ហ៊ុល ស៊ីណាត អាយុ ១៩ឆ្នាំដូចគ្នា។</p>
<p>បើតាមសមត្ថកិច្ច មុនពេលកើតហេតុ ជនរងគ្រោះបានទៅចូលរួមរាំលេងនៅក្នុងវត្តចំណារ ពេលនោះ ស្រាប់តែ មានជម្លោះពាក្យសម្តី ដោយសារក្រុមជនបង្ក បានញ៉ែប៉ះចំប្រពន្ធមិត្តភក្តិ ទើបមានរឿងបែបនេះ។</p>
<p>ក្រោយមានជម្លោះដោយពាក្យសម្តីរួច ជនរងគ្រោះបាននាំគ្នាដើរទៅផ្ទះ ស្រាប់ដើរដល់ខាងលិចវត្តចំងាយ ប្រមាណ ៧០០ម៉ែត្រ ក៏លេចក្រុមជនបង្កចេញមកកាប់ និងចាក់បណ្តាលឲ្យស្លាប់ និងរបួសយ៉ាងដូច្នេះ។</p>
<p>ក្រោយកើតហេតុ កម្លាំងសមត្ថកិច្ច បានចុះទៅជួយអន្តរាគមន៍ និងតាមស្រាវជ្រាវតាមចាប់ក្រុមជនបង្ក៕</p>
<p style="text-align: center;"><img src="http://image.dap-news.com:81/dap-news/dap-images/2013/October/id-009/S-304.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2013/October/id-009/S-305.jpg" alt="" width="550" /></p>
<p style="text-align: right;">ដោយ៖ ដើមអំពិល<br />ផ្តល់សិទ្ធិដោយ៖ ដើមអំពិល</p>
</div>