<div class="article-content">
<p><span style="color: #000000;"><strong>ឧត្ដរមានជ័យ ៖</strong> បុរសវិកលចរិក អាយុ ជាង៤០ឆ្នាំ ត្រូវបានកម្លាំងសមត្ថកិច្ចចម្រុះ ឡោមព័ទ្ធនិងឃាត់ខ្លួនបាន ហើយដកហូត កាំភ្លើងអាកាមួយដើម ពីរូបគេ នៅវេលាម៉ោងប្រមាណ១១និង៤០នាទី នៅព្រឹកថ្ងៃទី៤ ខែកញ្ញា ឆ្នាំ២០១៤នេះ ក្រោយពីជនវិកលចរិករូបនេះ បានបាញ់ជិត ១០គ្រាប់នៅក្នុងផ្សារត្រពាំងប្រសាទ ស្រុក ត្រពាំងប្រសាទ ខេត្ដឧត្ដរមានជ័យ បង្កឱ្យ ក្រុមអាជីវករនិងប្រជាពលរដ្ឋនៅក្នុងផ្សារ រត់ចែកជើងគ្នា ។</span></p>
<p><span style="color: #000000;">នាយការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ដឧត្ដរមានជ័យ លោកលឹម គី ដែលបានដឹកនាំកម្លាំងចុះទៅ អន្ដរាគមន៍នៅកន្លែងកើតហេតុនោះ បានថ្លែងតាមទូរស័ព្ទមកថា ជនវិកលចរិក អាយុជាង៤០ឆ្នាំ ត្រូវបានឃាត់ខ្លួននៅមុននេះបន្ដិច (ប្រហែល១១និង៤០នាទី) ក្រោយពីរូបគេបានរត់ពីលើដំបូលផ្សារ រួចហើយចូលទៅក្នុងតូបលក់ដូរ បាញ់ចំនួន ៧គ្រាប់ ។</span></p>
<p><span style="color: #000000;">លោកលឹម គី បានបញ្ជាក់ថា ក្រោយមាន រឿងនេះកើតឡើង សមត្ថកិច្ច ចម្រុះ បានស្នើសុំឱ្យប្រជាពលរដ្ឋនិងអាជីវករ ចេញពីផ្សារ ខ្លាចមានបញ្ហាគ្រោះថ្នាក់កើតឡើង ដោយសារជនវិកលចរិករូបនេះ។</span></p>
<p><span style="color: #000000;">បើតាមនាយការិយាល័យព្រហ្មទណ្ឌកម្រិតធ្ងន់ ជនវិកលចរិក បានបាញ់ឡើងលើចំនួន ៧គ្រាប់ មិនបណ្ដាលឱ្យគ្រោះថ្នាក់ដល់ប្រជាពលរដ្ឋ ណាម្នាក់នោះទេ ហើយក៏មិនដឹងថា តើជន វិកលចរិករូបនេះ បានកាំភ្លើងអាកាមកពីណាឡើយ ដោយរង់ចាំការសួរនាំបន្ដទៀត ។</span></p>
<p><span style="color: #000000;">សូមបញ្ជាក់ថា ករណីភ្ញាក់ផ្អើលដោយ មានបុរសម្នាក់ជាមនុស្សវិកលចរិក បានកាន់ កាំភ្លើងអាកាមួយដើម រត់ឡើងទៅលើដំបូល ផ្សារត្រពាំងប្រសាទ ប៉ុន្ដែមិនបានបាញ់នោះឡើយ រួចរត់ចុះមក ក្រោម ចូលទៅក្នុងផ្សារ ហើយបាញ់ចំនួន៧គ្រាប់ ធ្វើឱ្យប្រជាពលរដ្ឋ និងអាជីវករភ័យស្លន់ស្លោ រត់ចេញពីផ្សារបាតជើងសព្រាត៕</span></p>
</div>
<p style="text-align: right;"><a href="http://www.dap-news.com/2011-06-14-02-39-55/94387-2014-09-04-05-06-50.html" target="_blank"><span style="color: #000000;">ផ្តល់សិទ្ធដោយ ៖ ដើមអម្ពិល</span></a></p>