<p><span style="color: #000000;"><strong>(ភ្នំពេញ)៖</strong> ក្រោយពីមានព័ត៌មានជាច្រើន លើបណ្តាញទំនាក់ទំនង សង្គម Facebook ដែលលើកឡើងថា រាជរដ្ឋាភិបាលកម្ពុជា ដែលមានក្រសួងវប្បធម៌ និងវិចិត្រសិល្បៈ ជាសេនាធិការ មិនបានអើពើរឿងដាក់ ល្ខោនខោល របស់ខ្មែរ ចូលទៅបញ្ជីបេតិកភណ្ឌវប្បធម៌អរូបី ទៅអង្គការយូណេស្កូ ហើយបណ្តែតបណ្តោយឲ្យប្រទេសថៃ យកល្ខោនខោលនេះ ទៅដាក់ឲ្យដាក់ក្នុងបញ្ជី បេតិកភណ្ឌពិភពលោកនោះ ក្រសួងវប្បធម៌ និងវិចិត្រសិល្បៈ ឆ្លើយតបវិញ ដោយអះអាងថា ក្រសួងបាននិងកំពុងរៀបចំឯកសារ ដើម្បីដាក់ល្ខោនខោល ជាមួយរបាំ និងក្បាច់គុនខ្មែរ មួយចំនួនទៀត ទៅក្នុងបញ្ជីបេតិកភណ្ឌ ពិភពលោកហើយ។</span></p>
<p><span style="color: #000000;">សេចក្តីប្រកាសព័ត៌មាន របស់ក្រសួងវប្បធម៌ និងវិចិត្រសិល្បៈ ដែល Khmertalking ទទួលបានសង្កត់ធ្ងន់ថា រាល់ការចុះបញ្ជីបេតិកភណ្ឌពិភពលោក ឬបេតិកភណ្ឌវប្បធម៌អរូបី នៃមនុស្សជាតិ ត្រូវអនុវត្តន៍តាមគោលការណ៍ច្បាប់ និងនិតិវិធីចាំបាច់ ដែលអង្គការយូណេស្កូ តម្រូវឲ្យសម្រាប់គ្រប់ជនជាតិ និងគ្រប់ប្រទេសលើពិភពលោក ពុំមែនធ្វើតាមតែការប្រកាស ការនឹកឃើញ ឬតាមអារម្មណ៍ រំភើបរបស់អ្នកណាមួយ ឬប្រទេសណាមួយនោះឡើយ។</span></p>
<p><span style="color: #000000;">ក្រសួងវប្បធម៌ និងវិចិត្រសិល្បៈបានបញ្ជាក់ថា «ក្រុមការងារជំនាញរបស់ក្រសួងវប្បធម៌ និងវិចិត្រសិល្បៈ បានខិតខំធ្វើ និងកំពុងធ្វើអស់ពីលទ្ធភាព និងតាមគ្រប់មធ្យោបាយ ដែលអាចធ្វើទៅបាន ក្នុងបំណងដើម្បីការងារ ផលប្រយោជន៍រួមរបស់ជាតិយើង»។</span></p>
<p><span style="color: #000000;">ក្រសួងវប្បធម៌បានឲ្យដឹងទៀតថា កម្ពុជាបានផ្តល់សច្ចាប័ន ចូលជារដ្ឋភាគីនៃអនុសញ្ញា ស្តីពីការការពារបេតិកភណ្ឌវប្បធម៌អរូបី ដែលអនុញ្ញាតឲ្យកម្ពុជាបានចុះ របាំក្បាច់បុរាណខ្មែរ ឬរបាំព្រះរាជទ្រព្យ ទៅក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិឆ្នាំ២០០៣។</span></p>
<p><span style="color: #000000;">ក្រសួងបានឲ្យដឹងទៀតថា ក្រសួងបានរៀបចំបញ្ជីឈ្មោះ ទម្រង់បេតិកភណ្ឌវប្បធម៌អរូបី ជាអទិភាពមួយចំនួនទៀត មានជាអាទិ៍ ល្ខោនស្បែកធំ ល្ខោនខោល ចាប៉ីដងវែង និងតម្បាញសូត្រ ។ល។ ត្រៀមដាក់ស្នើទីអង្គការយូណេស្កូ ។ ជាលទ្ធផលល្ខោនស្បែកធំ ត្រូវបានចុះបញ្ជីបេតិកភណ្ឌវប្បធម៌អរូបី នៃថ្ងៃទី២៥ ខែវិច្ឆិកា ឆ្នាំ២០០៥ និងល្បែងទាញព្រ័ត្រ នៅថ្ងៃទី០២ ខែធ្នូ ឆ្នាំ២០១៥។ កាលពីខែមីនា ឆ្នាំ២០១៥ ក្រសួងក៏បានបញ្ចូនឯកសារចាប៉ីដងវែង ដែលបានរៀបចំសព្វគ្រប់ ទៅអង្គការយូណេស្កូ ហើយកំពុងធ្វើការសិក្សា ចងក្រងឯកសារដែលជាអាទិភាព បន្តទៀតដូចជាក្បាច់គុនល្បុក្កតោ ភ្លេងអារក្ស និងល្ខោនខោល ដើម្បីចុះក្នុងបញ្ជីបេតិកភណ្ឌវប្បធម៌អរូបី នៅឆ្នាំខាងមុខ។</span></p>
<p><span style="color: #000000;">ពាក់ព័ន្ធនឹងល្ខោនខោលនេះដែរ នៅថ្ងៃទី៥ ខែមិថុនានេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា តាមរយៈ Facebook របស់សម្តេចក៏បានឆ្លើយតប នូវការព្រួយបារម្ភ ពីបងប្អូនជនរួមជាតិ អំពី «ល្ខោនខោលខ្មែរ» បន្ទាប់ពីឮដំណឹងថា ប្រទេសថៃប្រុងដាក់បញ្ចូលល្ខោនខោល ទៅក្នុងបញ្ជីបេតិកភណ្ឌវប្បធម៌អរូបី នៃអង្គការយូណេស្កូដែរ ដោយសម្តេចលើកឡើងថា រាជរដ្ឋាភិបាលកំពុង បានខិតខំប្រឹងប្រែង យ៉ាងខ្លាំងក្នុងការការពារផលប្រយោជន៍ជាតិ ដោយបានរៀបចំឯកសារដាក់ល្ខោនខោល ទៅអង្គការយូណេស្កូនៅពេលខាងមុខនេះ។ មិនដូចអ្វីដែលលើកឡើងក្នុង Facebook ថារាជរដ្ឋាភិបាលមិនយកចិត្តទុកដាក់នោះទេ៕</span></p>
<p><span style="color: #000000;"><img src="https://scontent-sit4-1.xx.fbcdn.net/v/t1.0-9/13394048_1027618257286671_1717134281705451351_n.jpg?oh=c1016d5e22748412f3fbb16c2509d50d&oe=57CB1357" alt="" width="730" /></span></p>
<p><span style="color: #000000;"><img src="http://image.freshnewsasia.com//fn-2016-06-05-20-48-25-0.jpg" alt="" width="730" /></span></p>
<p><span style="color: #000000;"><img src="https://scontent-sit4-1.xx.fbcdn.net/v/t1.0-9/13335527_1027605787287918_8683740142608426055_n.jpg?oh=9245985efa5ce728c0ad5fc8dcba56e9&oe=5807B494" alt="" width="730" /></span></p>
<p><span style="color: #000000;"><img src="https://scontent-sit4-1.xx.fbcdn.net/v/t1.0-9/13335548_1027605920621238_1430022779869523637_n.jpg?oh=73a764db5af8270abfd8b115557a4213&oe=57CA9753" alt="" width="730" /></span></p>
<p><span style="color: #000000;"><img src="https://scontent-sit4-1.xx.fbcdn.net/v/t1.0-9/13325613_1027605947287902_3513232284058436231_n.jpg?oh=594fd1e7780d52dac70e043ae2af9912&oe=580DE749" alt="" width="730" /></span></p>
<p><span style="color: #000000;"><img src="https://scontent-sit4-1.xx.fbcdn.net/v/t1.0-9/13310556_1027605940621236_411500842918616165_n.jpg?oh=aaabdcae138b82b0aabd4b21ee6b6f82&oe=580BC0A9" alt="" width="730" /></span></p>
<p><span style="color: #000000;"><img src="https://scontent-sit4-1.xx.fbcdn.net/v/l/t1.0-9/13325480_1027605867287910_3793417248574184535_n.jpg?oh=3b30a75162d976ddada55c468307066d&oe=57C8C997" alt="" width="730" /></span></p>
<p><span style="color: #000000;"><img src="https://scontent-sit4-1.xx.fbcdn.net/v/t1.0-9/13315668_1027605953954568_299020425954885206_n.jpg?oh=03781073ec9a9c2f5df4df68019388d6&oe=57DA592F" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ខ្មែរថកឃីង</span></p>