<p><span style="color: #000000;"><strong>(ភ្នំពេញ)៖</strong> សាលារាជធានីភ្នំពេញ នៅតែបន្ដមិនអនុញ្ញាតិ ឲ្យធ្វើបុណ្យសពគំរប់ខួប១០០ថ្ងៃ របស់លោកបណ្ឌិត កែម ឡី នៅវត្តពោធិយារាម ហៅវត្តចាស់នោះទេ ដែលបុណ្យគម្រប១០០ថ្ងៃនេះ គ្រោងនឹងប្រព្រឹត្តទៅ ចាប់ពីថ្ងៃទី១៤ ដល់ទី១៦ ខែតុលា ឆ្នាំ២០១៦ខាងមុននេះ។</span></p>
<p><span style="color: #000000;">តាមលិខិតឆ្លើយតប របស់សាលារាជធានីភ្នំពេញ ឆ្លើយតបសំណើរលើក លោក សៅ កុសល បានបញ្ជាក់ថា បុណ្យខួបគំរប់ខួប១០០ថ្ងៃ លោក កែម ឡី ដែលនឹងប្រព្រឹត្តទៅចាប់ពីថ្ងៃទី១៤ ដល់ទី១៦ ខែតុលា ឆ្នាំ២០១៦ នៅវត្តពោធិយារាម ហៅវត្តចាស់ ស្ថិតនៅសង្កាត់ ជ្រោយចង្វារ ខណ្ឌជ្រោយចង្វារ សាលារាជធានីពុំអនុញ្ញាតិជូនឡើយ។</span></p>
<p><span style="color: #000000;">សាលារាជធានី បានឲ្យដឹងថា រាល់បុគ្គល ឬក្រុមណាមួយអះអាងជាតំណាងគណៈកម្មការរៀបចំបុណ្យ ត្រូវពិភាក្សាជាមួយក្រុម គ្រួសារសព ដើម្បិរៀបចំពិធីបុណ្យតាមទំនៀបទម្លាប់ខ្មែរ នៅគេហដ្ឋាន ឬទីកន្លែងបញ្ជុះសព នៅខេត្តតាកែវវិញ។</span></p>
<p><span style="color: #000000;">សូមជំរាបថា កាលពីពេលកន្លងទៅថ្មីៗនេះ សាលារាជធានីភ្នំពេញ ក៏បានបដិសេធនូវសំណើរ របស់លោក ប៉ាង ងួនទៀង ដែលបាន អះអាងថា ជាតំណាងគណៈកម្មការរៀបចំបុណ្យខួបគំរប់១០០ថ្ងៃ លោក កែម ឡី ដែលស្នើសុំធ្វើនៅទីតាំងសួនច្បារមុខវត្តបទុមវត្តី រួចមកហើយ៕</span></p>
<p><span style="color: #000000;"><img src="http://image.freshnewsasia.com/2016/099/fn-2016-10-07-16-26-00-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>