<p><span style="color: #000000;"><strong>(ភ្នំពេញ)៖</strong> លោក កែម រីទ្ធីសិទ្ធិ ប្អូនប្រុសបង្កើត លោក បណ្ឌិត កែម ឡី បានផ្តល់កិច្ចសម្ភាសន៍ជាមួយអង្គភាព Fresh News នៅវេលាថ្ងៃត្រង់ថ្ងៃទី១៨ ខែកក្កដានេះថា មានបុគ្គលមួយចំនួនកំពុងអូសទាញយកសពលោក កែម ឡី ធ្វើអាជីវកម្មនយោបាយ តែគ្រួសារសពមានទាំងរូបលោក និងក្រុមគ្រួសារ ប្រកាន់ជំហរដង្ហែសពលោក កែម ឡី ទៅស្រុកកំណើតនៅ ខេត្តតាកែវ នាសប្តាហ៍នេះជាកំហិត។</span></p>
<p><span style="color: #000000;">លោក កែម រីទ្ធីសិទ្ធិ បញ្ជាក់បែបនេះ ក្រោយពីមានបុគ្គលម្នាក់នៅក្នុងគណៈកម្មការរៀបចំបុណ្យសពលោក កែម ឡី ចេញមុខមកបញ្ជាក់ថា នឹងយកសព លោក កែម ឡី ទៅតំកល់នៅកៀនស្វាយបន្តទៀត ដើម្បីឲ្យប្រជាពលរដ្ឋបានគោរពវិញ្ញាណក្ខន្ធលោកទៀត។</span></p>
<p><span style="color: #000000;">ទង្វើនេះត្រូវបានលោក កែម រីទ្ធីសិទ្ធិ បានបញ្ជាក់ទៀតថា ការធ្វើបែបនេះហាក់ដូចជាធ្វើបាបសពមិនឲ្យបានទៅស្ងប់សុខ ហើយការយកសពលោក កែម ឡី ទៅតំកល់នៅកៀនស្វាយ ឬលើកដាក់កន្លែងនេះ កន្លែងនោះ ហាក់ដូចជាសម្លាប់ម្តាយគាត់ម្នាក់ទៀតអញ្ជឹង។ ការយកសពនៅបញ្ចុះនៅស្រុកកំណើត គឺធ្វើតាមបំណងរបស់គាត់កាលនៅរស់ផង។</span></p>
<p><span style="color: #000000;">លោក កែម រីទ្ធីសិទ្ធិ បានអះអាងថា <strong>«បងប្អូន ក៏ដូចជាម្តាយខ្ញុំ ដាច់ខាតគាត់មិនឲ្យអ្នកណា យកទៅណាទៅណីទេ ពីព្រោះគាត់ត្រូវតែយកមកទឹកដីកំណើតរបស់គាត់ បើសិនជាមានតំណាងណាចង់យកទៅណាមកណា ហាក់ដូចជាសម្លាប់ម្ដាយគាត់ម្នាក់ទៀតដែរហ្នឹង»</strong>។</span></p>
<p><span style="color: #000000;">គួរបញ្ជាក់ថា ភាពចម្រូងចម្រាស់លើសព លោក កែម ឡី បានកើតឡើងជាហូរហែ ក្រោយពីមានការពន្យារពេល និងផ្លាស់ប្តូរកាលកំណត់នៃការដង្ហែសព លោក កែម ឡី ទៅស្រុកកំណើតដោយគ្មានការកំណត់។</span></p>
<p><span style="color: #000000;">បើតាមសម្ដីរបស់លោក កែម រីទ្ធីសិទ្ធិ គណៈកម្មការរៀបចំបុណ្យសព លោក កែម ឡី ដែលមាន <strong>លោក ប៉ាង ងួនទៀង ជាប្រធាន និងព្រះតេជគុណ ប៊ុត ប៊ុនតិញ ជាសមាជិកគណៈកម្មការ រួមនិងសមាជិកដទៃទៀត មិនមានការសហការ និងពិភាក្សាគ្រប់ជ្រុងជ្រោយជាទូទៅទេ គឺមានការសម្រេចចិត្តដោយ ព្រះតេជគុណ ប៊ុត ប៊ុនតិញ ដោយគ្មានយល់ព្រមពីសមាជិកគណៈកម្មការដទៃទៀតឡើយ។</strong></span></p>
<p><span style="color: #000000;">បច្ចុប្បន្ននេះសង្កេតឃើញថា មតិគ្រួសារសព និងគណៈកម្មការរៀបចំបុណ្យសព លោក កែម ឡី ហាក់ខ្វែងគំនិតគ្នាលើការតំកល់សព ដែលសាធារណជនកំពុងតែចាត់ទុកថា <strong>សពលោក កែម ឡី កំពុងត្រូវបានគេ យកមកធ្វើអាជីវកម្មនយោបាយ។</strong></span></p>
<p><span style="color: #000000;">សូមជំរាបថា កាលពីថ្ងៃសៅរ៍សប្តាហ៍មុន ព្រះតេជគុណ ប៊ុត ប៊ុនតិញ គណៈកម្មការរៀបចំបុណ្យសព បានប្រកាសពន្យារពេលហែសព លោក កែម ឡី ក្រោមមូលហេតុជាការសំណូរមពររបស់សាធារណជន ដែលចង់បន្តមកចូលរួមចែករំលែកទុក្ខនៅក្នុងពិធីបុណ្យនេះ ហើយការពន្យារពេលនេះគ្មានកាលកំណត់នោះទេ៕</span></p>
<p><span style="color: #000000;"><strong>សូមស្ដាប់កិច្ចសម្ភាសន៍រវាង Fresh News ជាមួយប្អូនប្រុសបង្កើតសពលោក កែម ឡី ឈ្មោះ កែម រិទ្ធីសិទ្ធិ៖</strong></span></p>
<p><span style="color: #000000;"><strong><br /><a class="thickbox" title="" href="/FileManager/Commons/2016/7/18/40-2-18-07-2016--14-09-52.png"><img src="/FileManager/Articles/mce/2016/7/18/40-2-18-07-2016--14-09-52.png" alt="" /></a></strong></span></p>
<p><br /><span style="color: #000000;"><strong><a class="thickbox" title="" href="/FileManager/Commons/2016/7/18/40-2-18-07-2016--14-09-52.png"></a><br /></strong></span></p>
<p><iframe style="border: none; overflow: hidden;" src="https://www.facebook.com/plugins/video.php?href=https%3A%2F%2Fwww.facebook.com%2Ffreshnewsasia%2Fvideos%2F579544378884024%2F&show_text=0&width=560" frameborder="0" width="500" height="315"></iframe></p>
<p style="text-align: right;"><span style="color: #000000;"><strong><br /></strong>ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>