<p><span style="color: #000000;"><strong>(ភ្នំពេញ)៖</strong> សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានសម្តែងការតូចចិត្តនឹងអ្នកប្រមាថជេរសម្តេច ដោយប្រើពាក្យអសុរសថា «អាខ្វាក់» នៅលើបណ្តាញសង្គម Facebook ប៉ុន្តែសម្តេចពុំបានបញ្ជាឱ្យចាត់វិធានការ ឬលុប Comment (ខមមិន) របស់ពួកគេទេ គ្រាន់បង្គាប់ឱ្យក្រុមការងារចេះពន្យល់ពួកគេប្រកបដោយសីលធម៌ ដែលនាំឱ្យប៉ះពាល់ទៅដល់ទឹកចិត្តជនពិការដទៃទៀតប៉ុណ្ណោះ។</span></p>
<p><span style="color: #000000;">ថ្លែងនៅក្នុងពិធីសំណេះសំណាលជាមួយ និងចែកអំណោយជូនកុមារពិការភ្នែក និងគ-ថ្លង់ នៅសាលាកុមារពិការភ្នែក និងកុមារគ-ថ្លង់ភ្នំពេញថ្មី របស់អង្គការគ្រួសារថ្មី នៅព្រឹកថ្ងៃទី២២ ខែធ្នូនេះ សម្តេចនាយករដ្ឋមន្រ្តី ហ៊ុន សែន បានលើកឡើងថា <strong>«តា (ខ្ញុំ) ទទួលការប្រមាថ វាគ្រប់គ្រាន់ណាស់ទៅហើយ ដែលគេហៅថា "អាខ្វាក់" ត្រឹមតែខូចភ្នែកម្ខាង ហើយធ្វើដល់នាយករដ្ឋមន្រ្តី គេជេរ "អាខ្វាក់" នេះជាការប្រមាថមួយធ្ងន់ណាស់ ឥឡូវនេះក្នុងទំព័រ Facebook របស់តា...តាបានប្រាប់ក្រុមអ្នកជំនួយការទាំងអស់ នៅពេលដែលគេចូលមកជេរ "អាខ្វាក់" គឺសុំរក្សាសិទ្ធិអត់មានឱ្យដកចេញទេ ទុកភាសា "អាខ្វាក់" នេះ រួចហើយយើងធ្វើការអប់រំគេត្រឡប់ទៅវិញថា ក្មួយ ឬកូន ឬចៅ កុំប្រើភាសានេះតទៅទៀត ចុះបើករណីនេះធ្លាក់ទៅលើ ចៅ ឬក្មួយខ្វាក់វិញ គេហៅអញ្ចឹង តើក្មួយមានការឈឺចាប់ទេ»</strong>។</span></p>
<p><span style="color: #000000;">សូមជំរាបថា នៅថ្ងៃ១៦ មេសា ឆ្នាំ១៩៧៥ ពោលគឺមួយថ្ងៃមុនពួកខ្មែរក្រហមដណ្តើមបានទីក្រុងភ្នំពេញ យុទ្ធជនម្នាក់ ក្នុងវ័យជាង២០ឆ្នាំ ដែលស្ម័គ្រចិត្តចូលបម្រើកងទ័ពតាមការអំពាវនាវរបស់ ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រកម្ពុជា បានរងរបួសពិកាភ្នែកខាងឆ្វេង ដោយសារអំបែងគ្រាប់ផ្លោងកាំភ្លើងធំ នៅខេត្តកំពង់ចាម។ យុទ្ធជនម្នាក់នោះគឺ សម្តេចតេជោ ហ៊ុន សែន ដែលក្លាយជានាយករដ្ឋមន្រ្តីកម្ពុជា នាពេលបច្ចុប្បន្នទាំងមិននឹកស្មានដល់។ នេះបើតាមសៀវភៅ «ហ៊ុន សែន បុរសខ្លាំងនៅកម្ពុជា» ដែលនិពន្ធដោយជនបរទេស២រូប។</span></p>
<p><span style="color: #000000;">សៀវភៅនេះបានសរសេរថា ដោយសារតែភាពពិការភ្នែកនេះហើយ បានជួយឱ្យសម្តេចមានឱកាសរៀបការ ជាមួយមនុស្សជាទីស្រលាញ់ គឺសម្តេចកិត្តិព្រឹទ្ធបណ្ឌិត ប៊ុន រ៉ានី នៅក្នុងក្រុមអាពាហ៍ពិពាហ៍ក្រុមជនពិការ ១៣គូ ដែលរៀបចំដោយកម្មាភិបាលខ្មែរក្រហម ព្រោះច្បាប់ព្រៃកាលណោះនឹងមិនឱ្យមានបុរសណាដែលមានវ័យក្រោម ៣០ឆ្នាំ អាចរៀបការបាននោះទេ លើកលែងតែជនពិការតែប៉ុណ្ណោះ។</span></p>
<p><span style="color: #000000;">ទោះជាយ៉ាងនេះក្តី ក្នុងពិធីសំណេះសំណាលជាមួយកុមារពិការភ្នែក និងគ-ថ្លង់ នៅព្រឹកមិញ សម្តេចតេជោ ហាក់ដូចមិនបានខឹងសម្បារ ជាមួយនឹងការប្រមាថជេរ "អាខ្វាក់" នោះទេ ប៉ុន្តែសម្តេចអះអាងថា នឹងប្រើប្រាស់វិធីត្រជាក់ជាសារអប់រំ ត្រឡប់ទៅកាន់ពួកគេវិញ។</span></p>
<p><span style="color: #000000;">សម្តេចតេជោ ហ៊ុន សែន បានថ្លែងថា <strong>«ខ្ញុំចង់ប្រើប្រាស់នូវវិធីអប់រំតាមរយៈ បណ្តាញទំនាក់ទំនងសង្គមត្រឡប់ទៅវិញ គឺចូលមកចុះ សូមអញ្ជើញចូលមកជេរចុះ ហើយអត់ប្រលេះចេញទេ ឱ្យជេររួចហើយយើងនឹងផ្តល់សារអប់រំត្រឡប់ទៅគេវិញ ព្រោះឪពុកម្តាយរបស់គេ ក៏មិនចង់ឱ្យកូនមានភាព ទំនើងឬក៏គ្មានគុណធម៌ រហូតដល់ជេរ "អាកាំបុត" "អាខ្វាក់" "មីខ្វាក់" "មីខ្វិន" ឬអញ្ចេះអញ្ចុះ វារឿងមួយអកុសលណាស់»</strong> ។</span></p>
<p><span style="color: #000000;">ថ្វីត្បិតតែមជ្ឈដ្ឋានមួយចំនួនបានលើកឡើងថា អ្នកប្រើប្រាស់ពាក្យអសុរសមួយចំនួន គឺជាក្រុមប្រឆាំង និងក្រុមលាបពណ៌ក៏ដោយ ប៉ុន្តែសម្តេចនាយករដ្ឋមន្រ្តី ហ៊ុន សែន មិនបានទម្លាយថា អ្នកដែលជេរសម្តេចថា «អាខ្វាក់» ជាក្រុមណានោះទេ។</span></p>
<p><span style="color: #000000;">កាលពីល្ងាចថ្ងៃទី០៣ ខែធ្នូ ឆ្នាំ២០១៥ ក្នុងពិធីសំណេះសំណាលជាមួយយុវជន សកម្មជនគណបក្សសង្រ្គោះជាតិ មកពី២៥រាជធានីខេត្ត នៅទីស្នាក់ការគណបក្សសង្រ្គោះជាតិ លោក កឹម សុខា ប្រធានស្តីទីគណបក្សសង្រ្គោះជាតិ បានអំពាវនាវឱ្យសកម្មជន យុវជន របស់គណបក្សសង្រ្គោះជាតិទាំងអស់ ជៀសវាងនូវការការប្រើប្រាស់ ពាក្យជេរប្រមាថទាំងឡាយដែលធ្វើឱ្យអ្នកដទៃឈឺចាប់៕</span></p>
<p><span style="color: #000000;"><img style="text-align: center; display: block; margin-left: auto; margin-right: auto;" src="https://scontent-kul1-1.xx.fbcdn.net/hphotos-xpf1/v/t1.0-9/12376028_926238877424610_7824467071149386374_n.jpg?oh=044f8488b1c02184d86a6ea889df2717&oe=5718907D" alt="" width="730" /></span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xft1/v/t1.0-9/12369050_926238834091281_11073821938391324_n.jpg?oh=93c33807e13c0733ac2e12f7165480c1&oe=57137674" alt="" width="730" /></span></p>
<p style="text-align: center;"><span style="color: #000000;"><img src="https://fbcdn-sphotos-d-a.akamaihd.net/hphotos-ak-xal1/v/t1.0-9/12376519_926238844091280_2134249839352649184_n.jpg?oh=29de70c350b2dfb1a715979a5daf4f52&oe=570D1ED1&__gda__=1456845702_c19ebabbf865393ae3258169b2949b2e" alt="" width="730" /></span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xpf1/v/t1.0-9/1934740_926238870757944_3890636620113031681_n.jpg?oh=607bc5a6bb24a1970324fa366d89d4a5&oe=56DD09E9" alt="" width="730" /></span></p>
<p style="text-align: center;"> </p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្រ្វេសញូវអាស៊ី</span></p>