<p><span style="color: #000000;"><strong>(ភ្នំពេញ)៖</strong> ស្រ្តីខ្មែរ៣នាក់ ដែលរងគ្រោះដោយមេខ្យល់បោកយកទៅលក់ ឱ្យធ្វើការងារជានារីខារ៉ាអូខេ នៅប្រទេសសិង្ហបុរីនោះ ត្រូវបានស្ថានទូតខ្មែរប្រចាំប្រទេសនេះជួយសង្រ្គោះហើយ ព្រមទាំងបានបញ្ជូនត្រឡប់មកដល់ប្រទេសកម្ពុជាផងដែរ។ នេះបើតាមការប្រកាសរបស់អ្នកនាំពាក្យក្រសួងការបរទេស លោក ជុំ សុន្ទរី នៅព្រឹកថ្ងៃទី២៨ ខែតុលា ឆ្នាំ២០១៦នោះ។</span></p>
<p><span style="color: #000000;">ស្រ្តីខ្មែរទាំងនោះមានឈ្មោះជាអក្សកាត់ថា ទ.ស, ហ.ន និង ល.ដ មានស្រុកកំណើតខេត្តព្រៃវែង កំពង់ចាម និងកោះកុង ដែលមានអាយុចាប់ពី២៣ ដល់៣២ឆ្នាំ។ ពួកគេបានមកដល់ព្រលានយន្តហោះអន្តរជាតិភ្នំពេញ កាលពីថ្ងៃទី២១ ខែតុលា ឆ្នាំ២០១៦ តាមជើងហោះហើរលេខ 3K591 ។</span></p>
<p><span style="color: #000000;">បើតាមការប្រកាសរបស់ក្រសួងការបរទេស បានឱ្យដឹងថា នារីខ្មែរទាំង៣នាក់ បានសម្រេចចិត្តទៅធ្វើការងារនៅប្រទេសិង្ហបុរី ដោយរំពឹងថា នឹងបានការងារជាអ្នកចាប់ទឹកកកនៅក្លឹបរាំកម្សាន្ត ជាមួយប្រាក់កម្រៃខ្ពស់ តាមការអះអាងរបស់មិត្តភក្តិ។ ប៉ុន្តែនៅពេលទៅដល់ប្រទេសសិង្ហបុរី នៅថ្ងៃទី១៤ ខែទុលា ឆ្នាំ២០១៦នោះ ស្រាប់តែនារីទាំង៣នាក់ ត្រូវបានគេណែនាំឱ្យធ្វើការជានារីខារ៉ាអូខេទៅវិញ។</span></p>
<p><span style="color: #000000;">ក្រសួងបានបញ្ជាក់បន្ថែមទៀតថា ដោយមិនអាចទ្រាំនឹងការងារបាន នារីរងគ្រោះបានស្នើថៅកែខារ៉ាអូខេ ឱ្យបញ្ជូនពួកនាងត្រឡប់មកកម្ពុជាវិញ ប៉ុន្តែត្រូវថៅកែតម្រូវឱ្យពួកនាងសងប្រាក់ចំនួន១៥០០ដុល្លារសិង្ហបុរី សម្រាប់ថ្លៃសំបុត្រយន្តហោះ និងថ្លៃកន្លែងស្នាក់នៅ ដើម្បីបានលិខិតឆ្លងដែនវិញ។ ក្រោយពីទទួលដំណឹងនេះ ស្ថានទូតកម្ពុជាប្រចាំប្រទេសសិង្ហបុរី បានជួយអន្តរាគមន៍ និងដកហូតយកលិខិតឆ្លងដែនជូនជនរងគ្រោះវិញ ហើយរៀបចំឱ្យត្រឡប់មកកម្ពុជាវិញភ្លាមៗតែម្តង៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2016-10-28-10-02-40-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>