<p><span style="color: #000000;"><strong>(ភ្នំពេញ)៖</strong> សម្តេចក្រឡាហោម ស ខេង បានប្រៀបប្រដូចអ្នកបើករថយន្ត ទៅនឹងអ្នកកាន់កាំភ្លើង ដែលអាចបង្កគ្រោះថ្នាក់ដល់អ្នកដទៃ បានគ្រប់ពេលវេលា នៅពេលដែលពួកគេស្រវឹង ឬខ្វះស្មារតីប្រុងប្រយ័ត្ននៅក្នុងការបើកបរ។</span></p>
<p><span style="color: #000000;">សម្តេច ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ បានថ្លែងបែបនេះ នៅក្នុងកិច្ចប្រជុំបូកសរុបលទ្ធផល ត្រួតពិនិត្យការអនុវត្តច្បាប់ស្តីពី ចរាចរណ៍ផ្លូវគោក នៅក្រសួងមហាផ្ទៃ កាលពីម្សិលមិញ។</span></p>
<p><span style="color: #000000;">សម្តេច ស ខេង បានលើកឡើងថា <strong>«យើងមានឡានមួយប្រៀបដូចអាវុធ១ដើម ឬក៏អាចថាមិនមែនត្រឹមអាវុធមួយដើមទៀត... បើយើងប្រើវាល្អ វានឹងមិនគ្រោះថ្នាក់ទេ ប៉ុន្តែបើមិនល្អគឺទៅបុកគេងាប់នោះ គឺមិនមែនត្រឹមកាំភ្លើងមួយដើមទេ កាំភ្លើង១គ្រាប់បាញ់ងាប់តែម្នាក់ទេ ប៉ុន្តែអា (ឡាន) នេះវាទៅបុកគេ ជួនអីរះអស់»</strong>។</span></p>
<p><span style="color: #000000;">ច្បាប់ចរាចរណ៍ផ្លូវគោកថ្មី បានរឹតបន្តឹងខ្លាំងទៅលើអ្នកបើកបររថយន្ត ជាពិសេសអ្នកទទួលទានគ្រៀងស្រវឹង។ មាត្រាទី៧៧ នៃច្បាប់ចរាចរណ៍ផ្លូវគោកថ្មី បានចែងថា ជនណាបើកបរយានយន្តនៅពេលដែលខ្លួនស្ថិតនៅក្នុងភាពស្រវឹង ដោយមានជាតិអាល់កុលចាប់ពី ០,៤០មីលីក្រាម ក្នុងមួយលីត្រខ្យល់ចាប់ពី០,៨០ក្រាមក្នុងមួយលីត្រឈាមឡើងទៅ ត្រូវផ្តន្ទាទោសដាក់ពន្ធនាគារពី ១ខែទៅ៦ខែ និងពិន័យជាប្រាក់ ៨សែនរៀល ទៅ៤លានរៀល ។</span></p>
<p><span style="color: #000000;">ចំណែកមាត្រាទី៨៣ និង៨៥ តម្រូវឱ្យផ្តន្តាទោស១ឆ្នាំ ទៅ៣ឆ្នាំ និងពិន័យជាប្រាក់ពី ៤លានរៀល ទៅ១៥លានរៀល សម្រាប់អ្នកបើកបរដែលបណ្តាលឱ្យមានរបួស ដល់អ្នកដទៃច្រើននាក់ ឬបណ្តាលឱ្យមានមនុស្សស្លាប់៕</span></p>
<p><span style="color: #000000;"><a class="thickbox" title="" href="/FileManager/Commons/2016/2/2/32-02-02-2016--15-22-41.jpg"><img src="/FileManager/Articles/mce/2016/2/2/32-02-02-2016--15-22-41.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>