<p><span style="color: #000000;"><strong>(ភ្នំពេញ)៖</strong> លោក Sam Schweingruber គ្រូបង្វឹកក្លឹបភ្នំពេញក្រោន បានលើកឡើងថា ទោះបីក្លឹបក្រសួងការពារជាតិបច្ចុប្បន្ន មានភាពរីកចម្រើនគួរឲ្យកត់សម្គាល់យ៉ាងណាក៏ដោយ ក៏លោកមិនសូវព្រួយបារម្ភដូចក្លឹបបឹងកេតអង្គរដែរ ព្រោះបឹងកេត មានធនធានកីឡាករល្អៗច្រើន ហើយថែមទាំងមានបច្ចេកទេសលេងបាល់ល្អទៀតផង ។</span></p>
<p><span style="color: #000000;">ការលើកឡើងរបស់គ្រូបង្វឹកជនជាតិស្វីសបែបនេះ គឺស្របពេលភ្នំពេញក្រោន ត្រៀមបើកទ្វារកីឡដ្ឋាន RSN ទទួលក្រុមបឹងកេតអង្គរ នៅថ្ងៃទី៣០ ខែមេសាចុងសប្ដាហ៍នេះ នៅក្នុងជំនួបជើងទី១ នៃពានលីគកំពូលកម្ពុជា ហើយក៏ស្របពេលភ្នំពេញក្រោន បានផ្ដល់មេរៀនចាញ់លើកដំបូង ដល់ក្លឹបក្រសួងការពារជាតិ កាលពីខែមេសាកន្លងទៅថ្មីៗនេះដែរ ។</span></p>
<p><span style="color: #000000;">លោក Sam បានទទួលស្គាល់ថា បច្ចុប្បន្ននេះ ក្លឹបក្រសួងការពារជាតិ គឺកំពុងឡើងជើងខ្លាំង ដែលជាហេតុធ្វើឲ្យលោកព្រួយបារម្ភ ពីការរក្សាតំណែងជើងឯកលីគកំពូលកម្ពុជា រដូវកាលថ្មីនេះ ។ ប៉ុន្ដែយ៉ាងណា ក៏ក្លឹបបឹងកេតអង្គរល្អជាងដែរ បើទោះបីបឹងកេត ធ្លាប់ចាញ់ក្រសួងការពារជាតិ ២ប្រកួតមកហើយក៏ដោយ ។</span></p>
<p><span style="color: #000000;">លោកនិយាយថា «ទោះបីក្រសួងការការពារជាតិ ធ្លាប់យកឈ្នះបឹងកេត ២-១ និងបន្ដឈ្នះ ៣-២ ក្នុងជំនួបមិត្តភាពកាលពីចុងសប្ដាហ៍កន្លងទៅ ប៉ុន្ដែខ្ញុំគិតថាសមត្ថភាពក្រុមទាំងពីរខុសគ្នាឆ្ងាយណាស់ ។ បើតាមការសង្កេត និងការវាយតម្លៃរបស់ខ្ញុំ គឺបឹងកេតល្អជាង ព្រោះបឹងកេតមានកីឡាករល្អ ដែលមានបច្ចេកទេស និងមានកលល្បិចច្រើន ដូច្នេះខ្ញុំព្រួយបារម្ភពីក្លឹបបឹងកេត ជាងក្រសួងការពារជាតិ» ។</span></p>
<p><span style="color: #000000;">គ្រូបង្វឹកទើបជាពីរបួស ដែលជួបគ្រោះថ្នាក់ចរាចរណ៍កាលពីចុងឆ្នាំ២០១៥រូបនេះ បានបន្ដទៀតថា ប្រសិនបើបឹងកេត ត្រៀមខ្លួនបានល្អ ភ្នំពេញក្រោនច្បាស់ជាពិបាកយកឈ្នះ ។ ប៉ុន្ដែយ៉ាងណាក្នុងនាមជាក្រុមជើងឯក ៦សម័យកាល ភ្នំពេញក្រោន មិនញញើតក្រុមណាមួយឡើយ ហើយលោកនឹងព្យាយាមគ្រប់បែបយ៉ាង ដើម្បីបាន៣ពិន្ទុពីការប្រកួតនីមួយៗ នៅពេលខាងមុខ ទោះត្រូវជួបក្រុមខ្លាំងប៉ុណ្ណាក៏ដោយ ៕</span></p>
<p><br /><span style="color: #000000;"><span style="color: #000000;"><a class="thickbox" title="" href="/FileManager/Commons/2016/4/27/10a-27-04-2016--09-25-36.jpg"><img src="/FileManager/Articles/mce/2016/4/27/10a-27-04-2016--09-25-36.jpg" alt="" /></a></span></span></p>
<div id="news_detail" class="postcontainer">
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>
</div>
<div class="detail_bottom_function">
<div class="facebook_like"></div>
</div>
<p><a class="thickbox" title="" href="/FileManager/Commons/2016/4/27/10a-27-04-2016--09-25-36.jpg"></a></p>