<p><strong> ភ្នំពេញ៖</strong> គេហទំព័រដើមអម្ពិល (<a href="http://www.dap-news.com%29/">www.dap-news.com)</a> ត្រូវបានវាយប្រហារជាថ្មីទៀតហើយ ដែលការវាយប្រហារនេះ ត្រូវបានក្រុម Anonymous Cambodia ប្រកាសដោយចំហរនៅលើ ទំព័រហ្វេសប៊ុកថា ពួកគេជាអ្នកវាយប្រហារ។</p>
<p>ការវាយប្រហារលើ គេហទំព័រដើមអម្ពិលពីក្រុម Hacker Anonymous Cambodia បានកើតមានឡើងកាលពី រាត្រីថ្ងៃទី២៧ ខែមេសា ឆ្នាំ២០១៤ វេលាម៉ោង ១០ និង០៣នាទី។ ការវាយប្រហារនេះ កើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីកម្លាំងនគរបាលកម្ពុជា បានចាប់សមាជិក Anonymous Cambodia ពីរនាក់ ពីបទវាយលុកលុយចូលទៅកាន់ គេហទំព័រស្ថាប័នរបស់រាជរដ្ឋាភិបាលមួយចំនួន។</p>
<p>នេះជាការវាយប្រហារជាលើកទី២ហើយ មកលើគេហទំព័រដើមអម្ពិលពីសំណាក់ក្រុម Hacker ដែលលើកទីមួយ កើតមានឡើងកាលពីចុងឆ្នាំ២០១២។<br />នាយកប្រតិបត្តិមជ្ឈមណ្ឌលព័ត៌មានដើមអម្ពិលលោក លឹម ជាវុត្ថា បានថ្លែងថា គេហទំព័រដើមអម្ពិលត្រូវបានក្រុម Hacker Anonymous Cambodia ចូលលុកលុយទៅក្នុងកន្លែងផ្ទុកទិន្នន័យ ព្រមទាំងលុបទិន្នន័យចោលទាំងអស់។</p>
<p>ទោះបីជាយ៉ាងណា លោក លឹម ជាវុត្ថា បានបញ្ជាក់ថា ក្រុមបច្ចេកទេសរបស់មជ្ឈមណ្ឌលព័ត៌មានដើមអម្ពិល កំពុងព្យាយាមជួសជុលមកវិញ ហើយគេហទំព័រអាចដំណើរការ បានជាធម្មតាឡើងវិញ ក្នុងរយៈពេលដ៏ខ្លីខាងមុខនេះ។</p>
<p>លោក សយ សុភាព អគ្គនាយកមជ្ឈមណ្ឌលព័ត៌មានដើមអម្ពិលថា បានថ្លែងសុំអភ័យទោសដល់ ម្ចាស់ដៃគូពាណិជ្ជកម្ម និងអ្នកនិយមអានគេហទំព័រ ដើមអម្ពិល ព្រមទាំងសុំការអធ្យាស្រ័យខ្ពស់ ចំពោះភាពរអាក់រអួល នៃការចេញផ្សាយក្នុងរយៈពេល នៃការវាយប្រហារពីក្រុម Hacker។</p>
<p>លោក សយ សុភាព ក៏បានថ្លែងកោតសរសើរ ដល់ក្រុម Anonymous Cambodia ដែលបានខិតខំសិក្សាទទួល បានចំណេះដឹងខ្លាំងខាងផ្នែកបច្ចេកវិទ្យា ក្នុងយុគសម័យថ្មីនេះ តែលោករំពឹងក្រុមបច្ចេកវិទ្យា ជាកូនខ្មែរទាំងអស់នេះ នឹងយកចំណេះដឹងរបស់ខ្លួនទៅប្រើ ជាប្រយោជន៍សម្រាប់សង្គមជាតិ និងមិនយកទៅប្រើក្នុង ផ្លូវអវិជ្ជមានបង្កឲ្យខូច ប្រយោជន៍របស់អ្នកដទៃ និងសង្គមជាតិនោះឡើយ។</p>
<p>សូមបញ្ជាក់ថា ក្រុម Hacker Anonymous Cambodia ជាក្រុមកូនខ្មែរមានការយល់ដឹងខ្ពស់ ផ្នែកបច្ចេកវិទ្យាពួកគេមានសមត្ថភាព ក្នុងការចូលទៅលុកលុយតាម គេហទំព័រជាច្រើននៅក្នុងប្រទេសកម្ពុជា។ សមាជិករបស់ពួកគេពីរនាក់ ត្រូវបានសមត្ថកិច្ចចាប់ខ្លួនកាលពីពេលថ្មីៗនេះ ព្រមទាំងបញ្ជូនទៅកាន់តុលាការ ដើម្បីវិនិច្ឆ័យទោស បន្ទាប់ពីពួកគេបានចូលទៅវាយប្រហារ បណ្តាញគេហទំព័ររបស់រាជរដ្ឋាភិបាល។<br />ក្រុមពួកគេ ក៏បានព្រមានផងដែរថា ពួកគេនឹងវាយប្រហារ និងផ្តួលរំលំរាជរដ្ឋាភិបាល ប្រសិនបើមិនដោះលែងសមាជិករបស់គេទេនោះ៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/April/id-030/Kosal-0261.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/April/id-030/Kosal-0262.jpg" alt="" width="600" /></p>
<p style="text-align: right;"><a href="http://www.lookingtoday.com/index.php/entertainment-general-news/29759--anonymous-cambodia-.html" target="_blank">ផ្តល់សិទ្ធដោយ ៖ ដើមអម្ពិល</a></p>