<div class="article-content">
<p><strong>ភ្នំពេញ៖</strong> ក្រុមហេគឃឺ អនាមិកកម្ពុជា ចំនួន២នាក់ ដែលជាប់ពាក់ព័ន្ធ ការវាយប្រហារទ្រង់ទ្រាយធំ មកលើ បណ្តាញបច្ចេកវិទ្យាព័ត៌មាន របស់ស្ថាប័នជាតិសំខាន់ៗ នាពេលកន្លងមក ត្រូវបានឃាត់ខ្លួនកាល ពីថ្ងៃទី៧ ខែមេសា ឆ្នាំ២០១៤ ដោយការិយាល័យប្រឆាំង បទល្មើសបច្ចេកវិទ្យាព័ត៌មាន នៃនាយកដ្ឋានសន្តិសុខ ផ្ទៃក្នុង អគ្គស្នងការដ្ឋាន នគរបាលជាតិ ក្រសួងមហាផ្ទៃ។</p>
<p>នេះបើយោងតាមគេហទំព័ររបស់ អគ្គស្នងការដ្ឋាន នគរបាលជាតិ។ ជនសង្ស័យទាំងពីរ ទីមួយមានឈ្មោះ ប៊ុន ឃីងមង្គលបញ្ញា ហៅ Sexmachine ឬ Blackcyber ភេទប្រុស អាយុ២១ឆ្នាំ មុខរបរនិស្សិតឆ្នាំទី៣ សាកល វិទ្យាល័យ SETEC, ទីពីរឈ្មោះ ជូ សុងហេង ហៅ Zoro ភេទប្រុស អាយុ២១ឆ្នាំ មុខរបរនិស្សិតឆ្នាំទី៣ សាកល វិទ្យាល័យ SETEC។</p>
<p>ស្ថានប័នជាតិសំខាន់ៗយ៉ាងហោចណាស់ ៣០ និងស្ថាប័នឯកជនមួយ ចំនួនផងដែរ ត្រូវរងគ្រោះពីការវាយប្រហារ តាមបច្ចេកវិទ្យាព័ត៌មានពីសំណាក់ ក្រុមហេគឃឺអនាមិកកម្ពុជា ចាប់តាំងពីមុនការបោះឆ្នោតជាតិ ជ្រើសតាំង តំណាងរាស្ត្រ នីតិកាលទី៥ កាលពីថ្ងៃទី២៨ ខែកក្កដា ឆ្នាំ២០១៣ មានគណៈកម្មាធិការជាតិរៀបចំ ការបោះឆ្នោត, អង្គភាពប្រឆាំងអំពើពុករលួយ, ក្រសួងការបរទេស, ក្រសួងការពារជាតិ និងសាលារាជធានីភ្នំពេញ ជាដើម។</p>
<p>ក្រុមហេគឃឺអនាមិកកម្ពុជា បានធ្វើសកម្មភាពវាយប្រហារធ្វើឲ្យរអាក់រអួល មិនដំណើរការគេហទំព័រ (DDos) ជ្រៀតចូលបណ្តាញព័ត៌មានវិទ្យាដោយខុសច្បាប់ និងលួចទិន្នន័យសំងាត់ជាតិពី ប្រព័ន្ធព័ត៌មាន និងការកែ ទំព័រដើម នៃគេហទំព័រ ជាដើម។</p>
<p>ជនសង្ស័យទាំងពីរបានសារភាពថា ខ្លួនពិតជាសមាជិកក្រុមហេគឃឺ អនាមិកកម្ពុជាប្រាកមែន និងបានប្រព្រឹត្តនូវ រាល់ទង្វើ ខុសច្បាប់ដូចបានរៀបរាប់ខាងលើពិតប្រាកដ។ ដោយឡែកចំពោះជនសង្ស័យឈ្មោះ ជូ សុងហេង បាន សារភាពថា មិនបានចូលរួមការវាយប្រហារនោះទេ គោលបំណងនៃការចូលរួម ក្នុងក្រុមហេគឃឺអនាមិក កម្ពុជា គឺគ្រាន់តែចង់ហាត់រៀន ជំនាញនេះប៉ុណ្ណោះ។ ទន្ទឹមនោះសមត្ថកិច្ចកំពុងបន្តស្រាវជ្រាវ រកមុខសញ្ញាហេគឃឺ ជា បក្សពួកនៅសេសសល់ ដើម្បីនាំខ្លួនមកចាត់វិធានការ តាមផ្លួវច្បាប់។</p>
<p>បច្ចុប្បន្នជនសង្ស័យទាំងពីរត្រូវបញ្ជូនទៅសាលាដំបូង រាជធានីភ្នំពេញ ដើម្បីចាត់ការតាមនីតិវិធី។</p>
<p>ពាក់ព័ន្ធបញ្ហានេះ មជ្ឈមណ្ឌលព័ត៌មានដើមអម្ពិល មិនអាចទាក់ទងសុំការបំភ្លឺបន្ថែម ពីមន្ត្រីអ្នកនាំពាក្យ ក្រសួង មហាផ្ទៃ និងអគ្គស្នងការដ្ឋាន នគរបាលជាតិបានទេ នៅរសៀលថ្ងៃទី២២ ខែមេសា ឆ្នាំ២០១៤នេះ៕</p>
<p style="text-align: center;"><img src="http://image.dap-news.com:81/dap-news/dap-images/2014/April/id-078/Lay-216.jpg" alt="Photo by DAP-News" width="500" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>