<div class="article-content">
<p><strong>- ឧត្តមសេនីយ៍ឯក គៀត ច័ន្ទថារិទ្ធ៖ ស្ថានភាពសន្តិសុខ សណ្តាប់ធ្នាប់ ល្អប្រសើរជាងឆ្នាំទៅ</strong></p>
<p><strong>ភ្នំពេញ៖ </strong>រយៈពេល ៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិ គ្រោះថ្នាក់ចរាចរ បានកើតមានចំនួន ១៤៨លើក បណ្តាលឲ្យអ្នកដំណើរលើដងវិធីស្លាប់ ៣៨នាក់ និងរបួស៣០៦នាក់ ភាគច្រើន នៃគ្រោះថ្នាក់ចរាចរបណ្តាលមក ពីការបើកបរមិនគោរពច្បាប់ចរាចរ តែគ្រោះថ្នាក់ដោយសារគ្រឿងស្រវឹងមិនសូវកើតមាននោះទេ។</p>
<p>អ្នកនាំពាក្យអគ្គស្នងការនគរបាលជាតិ លោកឧត្តមសេនីយ៍ឯក គៀត ច័ន្ទថារិទ្ធ បានថ្លែងនៅថ្ងៃទី១៧ ខែមេសា ឆ្នាំ២០១៤ តាមគេហទំព័ររបស់អគ្គស្នងការនគរបាលជាតិថា គ្រោះថ្នាក់ចរាចររយៈពេល ៣ថ្ងៃ នៃពិធីបុណ្យចូល ឆ្នាំថ្មីប្រពៃណីជាតិរបស់ខ្មែរនេះ គ្រោះថ្នាក់ចរាចរ បានកើតមានចំនួន ១៤៨លើក កើនឡើងលើសឆ្នាំ២០១៣ ចំនួន ៣២លើក។ តែចំនួនអ្នកស្លាប់ដោយសារគ្រោះថ្នាក់ចរាចរថយចុះ ពោលឆ្នាំ២០១៤នេះ អ្នកស្លាប់មានចំនួន ៣៨នាក់ ខណៈដែលឆ្នាំ២០១៣ មានរហូតដល់ ៤៩នាក់។</p>
<p>លោក គៀត ច័ន្ទថារិទ្ធ បានគូសបញ្ជាក់ផងដែរថា គ្រោះថ្នាក់បានកើតមានច្រើននៅក្នុងខេត្តបន្ទាយមានជ័យ តា កែវ កំពង់ចាម កំពង់ឆ្នាំង កំពត និងបាត់ដំបង។ ផ្លូវដែលមានគ្រោះថ្នាក់ច្រើនជាងគេ គឺលើកំណាត់ផ្លូវជាតិលេខ៥ លេខ៣ និងលេខ៧។</p>
<p>អ្នកនាំពាក្យអគ្គស្នងការនគរបាលជាតិរូបនេះ បានបន្តឲ្យដឹងថា គ្រោះថ្នាក់ចរាចរភាគច្រើនកើតឡើង ដោយសារ ការមិនគោរពច្បាប់ចរាចរ ការបើកបរលើសល្បឿនកំណត់ បើកជែង បើកមិនគោរពភ្លើងសញ្ញា និងមិនផ្តល់ភ្លើង សញ្ញាជាដើម។ ដោយឡែកគ្រោះថ្នាក់ចរាចរក្រោមឥទ្ធិពលជាតិស្រវឹងមិនសូវកើតមាននោះទេ ពោលមានការ ថយចុះច្រើនជាងបណ្តាឆ្នាំកន្លងទៅ។</p>
<p>ជាការកត់សម្គាល់គ្រោះថ្នាក់ចរាចររយៈពេល៣ថ្ងៃនេះ ភាគច្រើនកើតមានចំណពោះអ្នកដំណើរតាមម៉ូតូ មិនសូវ កើតមានលើរថយន្តនោះទេ ហើយភាគច្រើន នៃអ្នករងគ្រោះ មិនបានពាក់មួកសុវត្ថិភាព ៨០ភាគរយ។</p>
<p>លោក គៀត ច័ន្ទថារិទ្ធ បានថ្លែងកោតសរសើរចំពោះស្មារតីចូលរួមរបស់ប្រជាពលរដ្ឋ ប្រជាការពារភូមិ និងកង កម្លាំងនគរបាលទាំងអស់ ដោយបានយកចិត្តទុកដាក់ ក្នុងការពារសន្តិសុខសណ្តាប់ធ្នាប់នៅក្នុងភូមិដ្ឋានធ្វើឲ្យការ ប្រព្រឹត្តទៅ នៃពិធីបុណ្យចូលឆ្នាំប្រកបដោយភាពសប្បាយរីករាយ។</p>
<p>លោកឧត្តមសេនីយ៍ គៀត ច័ន្ទថារិទ្ធ បានថ្លែងថា បទល្មើសរយៈពេល៣ថ្ងៃ នៃពិធីបុណ្យចូលឆ្នាំថ្មីឆ្នាំ២០១៤នេះ កើតមានចំនួន ៣០លើក ថយចុះប្រមាណ៣០ភាគរយ បើធៀបនឹងឆ្នាំ២០១៣ ដែលមានរហូតដល់ទៅ ៤៤ លើក។ ក្នុងនោះបទឧក្រិដ្ឋមានចំនួន ២លើក គឺការករណីប្លន់នៅក្នុងខេត្តកំពង់ចាម និងខេត្តតាកែវ។</p>
<p>ករណីប្លន់ក្នុងខេត្តកំពង់ចាម ជនសង្ស័យមានគ្នា ៣នាក់ តែក្រោយធ្វើសកម្មភាពភ្លាមៗ សមត្ថកិច្ច ក៏តាមចាប់បាន ភ្លាមៗផងដែរ។ ដោយឡែកករណីប្លន់នៅក្នុងខេត្តតាកែវ ជនល្មើសមានគ្នា ៤នាក់ តែមិនទាន់ចាប់ខ្លួនបាននៅ ឡើយទេ។</p>
<p>ករណីឃាតកម្មកើតមានចំនួន ៥លើក ថយចុះ ៣លើក បើធៀបឆ្នាំ២០១៣។ ករណីរំលោភសេពសន្ថវៈនៅឆ្នាំ ២០១៤នេះ មានចំនួន ៥លើកផងដែរ៕</p>
<p style="text-align: center;"><object width="500" height="300" data="http://www.youtube.com/v/GL86ryUZ11s&rel=1" type="application/x-shockwave-flash"><param name="wmode" value="transparent" /><param name="src" value="http://www.youtube.com/v/GL86ryUZ11s&rel=1" /></object></p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-112.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-113.jpg" alt="" width="550" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>