<div class="item-page">
<p><span style="color: #000000;"><strong>(ភ្នំពេញ)៖</strong> នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានព្រមានធ្ងន់ៗ ទៅកាន់មេប៉ូលិសទាំងអស់ ឱ្យបញ្ឈប់ភា្លមជាបន្ទាន់នូវសកម្មភាព កាត់លុយបេសកកម្មពីកូនចៅ ហើយគួរតែជួយកូនចៅវិញទើបជាការត្រឹមត្រូវ។</span></p>
<p><span style="color: #000000;">ការថ្លែងព្រមានបែបនេះ របស់នាយឧត្តមសេនីយ៍ នេត សាវឿន ត្រូវបានធ្វើឡើង នៅព្រឹកថ្ងៃទី៦ ខែមករា ឆ្នាំ២០១៧នេះ ក្នុងឱកាសអញ្ជើញជាអធិបតី ក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្ដរស័ក្ដិ ដល់នាយនគរបាលថ្នាក់ឧត្តមសេនីយ៍១៦រូប នៅអគ្គស្នងការដ្ឋាននគរបាលជាតិ។</span></p>
<p><span style="color: #000000;">នាយឧត្តមសេនីយ៍អគ្គស្នងការ បានបញ្ជាក់ថា កន្លងមកមានព័ត៌មានថា មេប៉ូលីសបានកាត់លុយ កាត់ប្រេង ពីកូនចៅ ក្នុងប្រាក់ឧបត្ថម្ភរបស់សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ ដើម្បីចុះមូលដ្ឋាន។ ដូច្នេះហើយ នាយឧត្តមសេនីយ៍ នេត សាវឿន សង្កត់ធ្ងន់ថា<strong> «មេមេប្រធាននាយកដ្ឋានទាំងអស់ ពីម៉ោងហ្នឹងទៅ ឈប់ឲ្យឮសូរទៀតថា កាត់លុយ កាត់ប្រេង ឈប់ឲ្យឮ</strong>»។</span></p>
<p><span style="color: #000000;">អគ្គស្នងការនគរបាលជាតិ បានព្រមានបន្ថែមថា<strong> «យើងធ្វើជាមេគេកុំកាត់បងប្អូនខាងក្រោម ត្រូវសុំលុយពីប្រពន្ធមកជួយកូនចៅវិញ ហើយកុំកាត់លុយពីកូនចៅជាដាច់ខាត ពាក្យខ្ញុំអញ្ចឹង ហើយបើលោកឯងធ្វើមិនកើតទេដើរចេញទៅ»</strong>។ នាយឧត្តមសេនីយ៍ បានឲ្យដឹងថា ប្រសិនបើខ្លួនមិនមានលទ្ធភាព ចុះមូលដ្ឋាននោះទេ ប្រាប់មកខាងលើមកថា <strong>«ខ្ញុំមិនមានលទ្ធភាពទេ»</strong> ហើយថ្នាក់លើនឹងដកមេដែលកាត់លុយកូនចៅនោះចេញតែម្ដង ដើម្បីដាក់អ្នកដែលមានលទ្ធភាព ចូលទៅធ្វើមេវិញ។</span></p>
<p><span style="color: #000000;">នាយឧត្តមសេនីយ៍ នេត សាវឿន បន្ថែមថា ប្រធាននាយកដ្ឋាន ស្នងការ ត្រូវធ្វើគំរូគេឲ្យបាន បើធ្វើគំរូមិនបានទេ មិនបាច់ធ្វើមេគេទេ ចុះចេញភ្លាម ហើយសូមប្រធាននាយកដ្ឋានដែលទើបឡើងថ្មី ត្រូវយកចិត្តទុកដាក់ជុំវិញបញ្ហានេះ៕</span></p>
<p><span style="color: #000000;"><img src="http://image.freshnewsasia.com/2017/028/fn-2017-01-06-12-12-41-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/028/fn-2017-01-06-12-12-39-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/028/fn-2017-01-06-12-12-41-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/028/fn-2017-01-06-12-12-42-3.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>
</div>