<p><span style="color: #000000;"><strong>(ភ្នំពេញ)៖</strong> សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី០៨ ខែសីហា ឆ្នាំ២០១៦នេះបានប្រតិកម្មទៅនឹងអ្នកលេង Facebook ដែលបានផ្សព្វផ្សាយបំភ្លៃថា សម្តេចតេជោដាច់សរសៃឈាមខួរក្បាល។ សម្តេចចាត់ទុកថា ការផ្សព្វផ្សាយបែបនេះ ជាការប្រមាថធ្ងន់ធ្ងរ ដែលមិនអាចទទួលយកបាន។</span></p>
<p><span style="color: #000000;">ប្រតិកម្មរបស់ សម្តេចតេជោ ហ៊ុន សែន បានធ្វើឡើង នៅក្នុងពិធីតភ្ជាប់ស្ពានកោះធំ ខេត្តកណ្តាល នាព្រឹកថ្ងៃទី០៨ ខែសីហា ឆ្នាំ២០១៦នេះ បន្ទាប់ពីអ្នកលេង Facebook ម្នាក់ បានផលិតវីដេអូមួយដោយរាយការណ៍ថា សម្តេចតេជោ ហ៊ុន សែន បានដាច់សរសៃឈាមខួរក្បាល នៅផ្ទះក្បែរវិមានឯករាជ្យ ហើយត្រូវបានបញ្ជូនទៅមន្ទីរពេទ្យសិង្ហបុរី ហើយតាំងខ្លួនជាអ្នករាយការណ៍ដូចជា អ្នកព័ត៌មានអាជីព។</span></p>
<p><span style="color: #000000;">សម្តេចតេជោ ហ៊ុន សែន បានថ្លែងថា <strong>«សុំផ្តាំទៅវិញទៅក្មួយ នេះជាអំពើបាប ជាការប្រមាថ សូមក្បួយយកចិត្តទុកដាក់អំពីសុខភាពខ្លួនឯង យកចិត្តទុកដាក់អំពីសុខភាពម្តាយ ជីដូនជីតខ្លួនឯងទៅ គ្រប់គ្រាន់ហើយ មិនបាច់យកចិត្តទុកដាក់ដល់ថ្នាក់ហ្នឹងពេក អំពីសុខទុក្ខនាយករដ្ឋមន្រ្តី ហ៊ុន សែន នោះទេ»</strong>។</span></p>
<p><span style="color: #000000;">សម្តេចតេជោ ហ៊ុន សែន បានបញ្ជាក់បន្ថែមថា រហូតដល់ពេលនេះ សម្តេចមានសុខភាពរឹងមាំ ដែលអាចបើកយុទ្ធនាការចុះសួរសុខទុកប្រជាពលរដ្ឋ និងមន្រ្តីតាមខេត្តនានាបាន មិនតែប៉ុណ្ណោះ សម្តេចថែមទាំងអាចរាំញីកែងជើងបានទៀត។ សម្តេចថា រឿងដាច់សរសៃឈាមខួរក្បាលនេះ សម្តេចមិនមានពូជដៃសរសៃឈាមខួរក្បាលនោះទេ ហើយក៏មានមិនពូជ «ឡប់» នោះដែរ។</span></p>
<p><span style="color: #000000;">សម្តេចតេជោ បានមានប្រសាសន៍យ៉ាងដូច្នេះថា <strong>«ខ្ញុំគ្មានពូជដាច់សរសៃឈាមខួរក្បាលទេ ហើយអាពូជឡប់នេះ ក៏អត់មានដែរ បើសិនជាអស់លោកឡប់ ក៏ឡប់គ្នាឯងចុះ កុំនាំខ្ញុំឡប់ ហើយកុំបំភ័យប្រជាពលរដ្ឋ»</strong>។</span></p>
<p><span style="color: #000000;">សូមបញ្ជាក់ថា រាជរដ្ឋាភិបាលកម្ពុជា តែងអំពាវនាវម្តងហើយម្តងទៀត ឱ្យយុវជន និងអ្នកលេង Facebook ជៀសវាងនូវពាក្យជេរ ប្រមាថ ដែលធ្វើឱ្យប៉ះពាល់ដល់កិត្តិយសអ្នកដទៃ។ កន្លងមក ក៏មានករណីសកម្មជននយោបាយ នៃគណបក្សបានប្រឌិតរូបភាពប្រមាថសម្តេចតេជោ នៅលើបណ្តាញសង្គម Facebook នៅពេលដែលសម្តេចទៅពិនិត្យសុខភាព នៅប្រទេសសិង្ហបុរី កាលពីខែមករា ឆ្នាំ២០១៦។ សម្តេចនាយករដ្ឋមន្រ្តី បានជំរុញឱ្យសកម្មជននយោបាយទាំងនោះ ឆាប់កែប្រែអត្តចរឹតឡើងវិញ៕</span></p>
<p><span style="color: #000000;"><strong>សូមស្តាប់ប្រសាសន៍របស់សម្តេចតេជោ ហ៊ុន សែន៖</strong></span></p>
<p><iframe style="border: none; overflow: hidden;" src="https://www.facebook.com/plugins/video.php?href=https%3A%2F%2Fwww.facebook.com%2Ffreshnewsasia%2Fvideos%2F588882431283552%2F&show_text=0&width=560" frameborder="0" width="500" height="315"></iframe></p>
<p style="text-align: right;"><span style="color: #000000;"><strong><br /></strong>ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>