<p><strong>ជាងបីឆ្នាំមកហើយ ដែលជាងជួសជុលឡានម្នាក់ លោក ប៉ែន ឡុង បានចំណាយពេលវេលាជាច្រើនមើល </strong><strong>YouTube ដើម្បីផលិតយន្តហោះក្នុងក្តីសុបិនរបស់គាត់។</strong><strong></strong></p>
<p><strong>លោក ប៉ែន ឡុង និយាយថា៖ «ដំបូងឡើង ខ្ញុំគ្រាន់តែសរសេរពាក្យ</strong><strong> “Jet”។» បន្ទាប់មកវាក៏ចាប់ផ្តើមបង្ហាញវីដេអូផ្សេងៗទៀត ដូចជាការហោះឡើង ការចុះចត និងការផលិតយន្តហោះជាដើម។</strong></p>
<p><strong><a class="thickbox" title="" href="/FileManager/Commons/2017/7/10/5-10-07-2017--14-17-15.jpg"><img src="/FileManager/Articles/mce/2017/7/10/5-10-07-2017--14-17-15.jpg" alt="" /></a><br /></strong></p>
<p>ក្រោយពេលបានឃើញ ឧទ្ធម្ភាគចក្រ កាលពីគាត់មានអាយុ ៦ឆ្នាំ ធ្វើឲ្យចំណង់នៃការហោះហើរ តែងតែលេចឡើងក្នុងខួរក្បាលរបស់គាត់។ «ខ្ញុំយល់សប្តិពីយន្តហោះជារៀងរាល់យប់។ ខ្ញុំតែងតែចង់បានយន្តហោះផ្ទាល់ខ្លួន។»</p>
<p>លោក ឡុង បានពោលថា៖ «ខ្ញុំបានចាប់ផ្តើមបង្កើតយន្តហោះដោយអាថ៌កំបាំង។ ខ្ញុំខ្លាចអ្នកដទៃគេសើចចំអកខ្ញុំ ដូច្នេះហើយបានជាខ្ញុំភាគច្រើនធ្វើវានៅពេលយប់»។</p>
<p><a class="thickbox" title="" href="/FileManager/Commons/2017/7/10/3-10-07-2017--14-17-36.jpg"><img src="/FileManager/Articles/mce/2017/7/10/3-10-07-2017--14-17-36.jpg" alt="" /></a></p>
<p>ឧទ្ធម្ភាគចក្រ របស់លោកឡុង មានស្លាបប្រវែង ៥.៥ ម៉ែត្រ ដែលធ្វើឲ្យលោកចំណាយពេលជិតមួយឆ្នាំ ក្នុងការផលិត ពីរបស់កែច្នៃឡើងវិញ។ សម្រាប់កៅអីរបស់ ពីឡុត វិញ គឺជាកៅអីជ័រ ហើយតួយន្តហោះគឺធ្វើពីធុងហ្គាស់ចាស់ៗ។</p>
<p>កាលពីថ្ងៃទី ០៨ ខែមិនា មុនម៉ោង ៣រសៀល លោកឡុងបានចាប់ផ្តើមបញ្ជេះម៉ាស៊ីនយន្តហោះគាត់។ មានមនុស្សបីនាក់ផ្សេងទៀតជួយរុញវា ទៅកាន់ផ្លូវហោះហើរ ម្តុំវាលស្រែ។</p>
<p>គាត់បានពាក់មួកការពារសុវត្ថិភាព ហើយអង្គុយនៅក្នុងកន្លែងពីឡុត។ លោកឡុងនិយាយថា យន្តហោះរបស់លោក ហោះបានកម្ពស់ ៥០ ម៉ែត្រ បន្ទាប់មកក៏ធ្លាក់ចុះមកក្រោម។</p>
<p>សម្លេងសើច បានស្វាគមន៍គាត់នៅពេលគាត់ធ្លាក់មកដីវិញ។ «ខ្ញុំកំពុងឈរនៅទីនោះ ហើយទឹកភ្នែកខ្ញុំស្រក់។ ខ្ញុំពិតជាក្តុកក្តួលណាស់ ព្រោះមិនអាចទ្រាំនឹងរឿងទាំងអស់ដែលពួកគេថាឲ្យខ្ញុំ»។</p>
<p>ឥលូវនេះ លោកឡុង បានងាកមកធ្វើលើគម្រោងថ្មីមួយទៀត គឺការផលិត seaplane (យន្តហោះដែលមិនប្រើកង់ អាចចេញហោះហើរ និងចុះចត តែលើទឹកប៉ុណ្ណោះ)។</p>
<p>នៅពេលដែលលោកបានសម្រេចនូវ seaplane គាត់មានគម្រោងទៅសាកល្បងវានៅទន្លេវ៉ៃកូ ក្នុងខេត្តស្វាយរៀង។ តាមការសន្និដ្ឋាន លោកប្រហែលជាចំណាយប្រាក់ប្រមាណ 10,000ដុល្លារ ដើម្បីផលិត ហើយឥលូវនេះ លោកបានចំណាយប្រាក់ជាង 3,000ដុល្លារ ទៅលើ seaplane។</p>
<p>ប្រពន្ធរបស់លោកឡុង ឈ្មោះ ហ៊ឹង មួយហេង អាយុ ២៩ ឆ្នាំ ជាអ្នកលក់គ្រឿងបន្លាស់រថយន្ត បានសម្តែងការបារម្ភចំពោះសុវត្ថិភាពរបស់ប្តីនាង ជាពិសេសឥលូវនេះ ពួកគេមានកូនប្រុសតូចៗ ២ នាក់ក្នុងបន្ទុក។</p>
<p><a class="thickbox" title="" href="/FileManager/Commons/2017/7/10/4-10-07-2017--14-18-31.jpg"><img src="/FileManager/Articles/mce/2017/7/10/4-10-07-2017--14-18-31.jpg" alt="" /></a></p>
<p>«ខ្ញុំមិនដឹងថាយន្តហោះវាដំណើរការដូចម្តេចទេ ហើយគាត់ក៏គ្មានអ្នកជំនាញណាម្នាក់ជួយគាត់ដែរ។» គាត់បានបន្តថា៖« ខ្ញុំបានព្យាយាមប្រាប់គាត់ឲ្យឈប់ដែរ ពីព្រោះខ្ញុំខ្លាច ប៉ុន្តែគាត់និយាយថា គាត់នឹងមិនបង្កគ្រោះថ្នាក់អ្វីឡើយ។ ចឹងខ្ញុំមានតែសម្របតាមគាត់»។</p>
<p>ទោះបីជាលោកឡុង បានកាត់បន្ថយហានិភ័យចំពោះគាត់ និងអ្នកដទៃដោយការសាកល្បងហោះហើរម្តងទៀតលើទឹក ក្នុងខែកក្កដានេះក្តី គាត់ដឹងថាអាចមានរឿងមួយចំនួន ដែលគាត់មិនអាចគ្រប់គ្រងបាន។</p>
<p>គាត់បានបញ្ជាក់ថា៖ «គ្រោះថ្នាក់ គ្មាននរណាម្នាក់អាចទាយទុកមុនបានទេ»៕</p>
<p><iframe src="https://www.youtube.com/embed/PGhaOdWLd4w" frameborder="0" width="500" height="281"></iframe></p>
<p> </p>
<p><a class="thickbox" title="" href="/FileManager/Commons/2017/7/10/1-10-07-2017--14-19-19.jpg"><img src="/FileManager/Articles/mce/2017/7/10/1-10-07-2017--14-19-19.jpg" alt="" /></a></p>
<p><a class="thickbox" title="" href="/FileManager/Commons/2017/7/10/2-10-07-2017--14-19-31.jpg"><img src="/FileManager/Articles/mce/2017/7/10/2-10-07-2017--14-19-31.jpg" alt="" /></a><br /><br /></p>
<p><a class="c_tab" href="https://goo.gl/Kac8TY" target="_blank"><img src="/FileManager/Articles/mce/2017/7/10/mkn-19-05-2017--15-51-28-10-07-2017--14-16-31.jpg" alt="" /></a></p>
<p>ប្រភព៖ BBC</p>
<p>ប្រែសម្រួល៖ High</p>