<p><span style="color: #000000;"><strong>ភ្នំពេញ ៖</strong> លោក គឹម ចាន់ថា អ្នកយកព័ត៌មាន របស់មជ្ឈមណ្ឌល ព័ត៌មានដើមអម្ពិល ប្រចាំណ្ឌដូនពេញ ខណ្ឌ ប្ញស្សីកែវ និងខណ្ឌជ្រោយចង្វារ បាននិយាយថា កូនប្រុស របស់លោក ត្រូវក្រុមក្មេងស្ទាវមួយ ក្រុមកាប់ប្រហារចំដៃ ខាងស្ដាំបណ្ដាលឱ្យ រងរបួសដេរជាង២០ថ្នេរ កាលពីវេលាម៉ោង ១០និង៣០នាទីព្រឹកថ្ងៃទី០៧ ខែមីនា ឆ្នាំ ២០១៥ ពេលចេញពីសាលារៀន ស្ថិតនៅ ខាងមុខវិទ្យាល័យសម្ដេចហ៊ុន សែន ភ្នំពេញ ថ្មី សង្កាត់ភ្នំពេញថ្មី ខណ្ឌសែនសុខ ។</span></p>
<p><span style="color: #000000;">លោក គឹម ចាន់ថា បាននិយាយថា ក្រុម ក្មេងស្ទាវទាំងនោះ ជិះម៉ូតូ៤-៥គ្រឿង ប្រដាប់ដោយដាវសាំម៉ូរ៉ៃ ចុះទៅ បង្កអំពើ ហិង្សាដេញកាប់ប្រហារជាមួយគូជម្លោះ ដែលរៀននៅវិទ្យាល័យមួយនេះ ប៉ុន្ដែបែរជាមិនឃើញ រួចក៏ទៅកាប់ចំកូន របស់លោក ដែលមិនមានរឿងអីសោះជាមួយពួកវា នាពេលកន្លងទៅ ។</span></p>
<p><span style="color: #000000;">បើតាមលោក គឹម ចាន់ថា ក្រៅពីការកាប់ប្រហារ ចំដៃខាងស្ដាំកូនប្រុសរបស់លោករួចមក ក្រុមក្មេងស្ទាវដែល ដូចជាមនុស្សញៀនថ្នាំទាំងនេះ បានកាប់បំផ្លាញម៉ូតូពីរគ្រឿងនៅក្នុងសាលានោះ រួមមានម៉ាកគុប និង ម៉ាកនិច មុនពេល ដែលពួកវាបើកម៉ូតូគេចខ្លួនបាត់ ពុំត្រូវបានចាប់ខ្លួនពីសំណាក់សមត្ថកិច្ច និងអាជ្ញាធរនោះឡើយ ។</span></p>
<p><span style="color: #000000;">លោក គឹម ចាន់ថា បានបញ្ជាក់ទៀតថា តាមការសួរនាំប្រជាពលរដ្ឋ នៅក្បែរវិទ្យាល័យ បានប្រាប់ថា កន្លងទៅ ធ្លាប់មានរឿងបែបនេះ កើតឡើងជាច្រើនលើកមកហើយ ពោល ក្រុមក្មេងស្ទាវដែលមានជម្លោះពីកន្លែងផ្សេង បានទៅរករឿងដល់សាលា រួចប្រើអំពើហិង្សាដេញកាប់យ៉ាងអនាធិបតេយ្យ ប៉ុន្ដែពុំមានការបង្ក្រាបនោះទេ ។</span></p>
<p><span style="color: #000000;">ដូច្នេះអាណាព្យាបាលសិស្ស ក៏ដូចជាប្រជាពលរដ្ឋ បានសំណូមពរទៅសមត្ថកិច្ចឱ្យជួយឃ្លាំមើល និងយាមប្រចាំ ការនៅតំបន់នោះផង ដើម្បីជួយអន្ដរាគមន៍នៅពេលដែលមានករណីនេះកើតឡើង ។</span></p>
<p><span style="color: #000000;">តាមលោក គឹម ចាន់ថា បច្ចុប្បន្នកូនប្រុស របស់ខ្លួន ដែលរៀនថ្នាក់ទី១០ នៅក្នុងវិទ្យាល័យ បាននាំយកទៅ មន្ទីរពេទ្យ ដើម្បីដេរនិងព្យាបាលមុខរបួស នៅលើដៃខាងស្ដាំ ព្រមទាំងសូមអំពាវនាវ ដល់សមត្ថកិច្ច តាមចាប់ ក្រុមក្មេងស្ទាវទាំងនេះ យកមកផ្ដន្ទាទោសតាមផ្លូវច្បាប់ ។</span></p>
<p><span style="color: #000000;"><a class="thickbox" title="" href="/FileManager/Commons/2015/3/7/60-07-03-2015--17-19-06.jpg"><img src="/FileManager/Articles/mce/2015/3/7/60-07-03-2015--17-19-06.jpg" alt="" /></a></span></p>
<p><a class="thickbox" title="" href="/FileManager/Commons/2015/3/7/61-07-03-2015--17-19-14.jpg"><img src="/FileManager/Articles/mce/2015/3/7/61-07-03-2015--17-19-14.jpg" alt="" /></a><span style="color: #000000;"><a class="thickbox" title="" href="/FileManager/Commons/2015/3/7/60-07-03-2015--17-19-06.jpg"></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ដើមអម្ពិល</span></p>