<p> </p>
<p><span style="color: #000000;"><strong>(ភ្នំពេញ)៖</strong> សហព័ន្ធកីឡាល្បុក្កតោកម្ពុជា ដែលមានលោក វ៉ាត់ ចំរើន ជាប្រធាន បានចុះអនុសារណៈយោគយល់គ្នា (MOU) ជាមួយលោក Nam Joong Woongg ប្រធានបណ្ឌិតសភាកីឡាយុទ្ធសិល្ប៍នៃសាធារណរដ្ឋកូរ៉េ ដើម្បីបង្កើនការស្រាវជ្រាវ និងពន្លឿនការរៀបចំឯកសារ ក្នុងការដាក់បញ្ចូលកីឡាក្បាច់គុនបុរាណខ្មែរនេះ ទៅក្នុងបញ្ជីសម្បត្តិ បេតិកភ័ណ្ឌអរូបិយពិភពលោក គ្រាដែលកម្ពុជា ព្យាយាមដាក់បញ្ចូល៣ឆ្នាំហើយ តែគ្មានលទ្ធផលអ្វីសោះ ។</span></p>
<p><span style="color: #000000;">បន្ទាប់ពីពិធីចុះ MOU បានបញ្ចប់កាលពីថ្ងៃទី២១ ខែមេសាម្សិលមិញ ដែលបានធ្វើឡើងនៅទីស្នាក់ការ NOCC អគ្គលេខាធិការគណៈកម្មាធិការជាតិអូឡាំពិក កម្ពុជា វ៉ាត់ ចំរើន បានថ្លែងប្រាប់អ្នកសារព័ត៌មានថា <strong>«បណ្ឌិតសភាកីឡាយុទ្ធសិល្ប៍សាធារណរដ្ឋកូរ៉េ គឺជាស្ថាប័នមួយ ដែលមានតួនាទីសិក្សាស្រាវជ្រាវ ពីកីឡាប្រយុទ្ធបុរាណ ដែលមានវ័យចំណាស់ជាងគេ ដើម្បីចងក្រងឯកសារប្រវត្តិ សាស្ដ្រ ហើយបណ្ឌិតសភានេះ ក៏មានភារកិច្ចផ្លាស់វប្បធម៌គ្នាតាមរយៈក្បាច់គុននេះដែរ»</strong> ។</span></p>
<p><span style="color: #000000;">តាមរយៈការចុះអនុសារណៈយោគយល់គ្នានេះ លោកជឿជាក់ថា កម្ពុជានឹងបានទទួលផលប្រយោជន៍ជាច្រើន ព្រោះកម្ពុជាកំពុងតែមានគោលដៅដាក់បញ្ចូលកីឡាក្បាច់គុនល្បុក្កតោ ទៅជាសម្បត្តិវប្បធម៌អរូបិយរបស់ពិភពលោក ហើយលោកក៏មានជំនឿចិត្តថា គោលដៅនេះនឹងជោគជ័យផងដែរ ព្រោះបណ្ឌិតសភា គឺមានជំនាញក្នុងការរៀបចំ ឯកសារ ហើយក៏មានជំនាញក្នុងការដាក់បញ្ចូលកីឡាក្បាច់គុនបុរាណ ទៅក្នុងបញ្ជីបេតិកភ័ណ្ឌអរូបិយពិភព លោកនេះផងដែរ ។</span></p>
<p><span style="color: #000000;">លើសពីនេះ ស្ថាប័នស្រាវជ្រាវកីឡាបុរាណដ៏ធំមួយនេះ នឹងជួយផ្សព្វផ្សាយពីក្បាច់គុនល្បុក្កតោកម្ពុជា ទៅក្នុងពិភព លោក ហើយនៅខែកញ្ញា ឆ្នាំ២០១៦ ខាងមុខ បណ្ឌិតសភាកីឡាយុទ្ធសិល្ប៍សាធារណរដ្ឋកូរ៉េ នឹងអញ្ជើញកីឡា ល្បុក្កតោកម្ពុជា ទៅធ្វើបទបង្ហាញនៅក្នុងសន្និសីទអន្តរជាតិដ៏ធំមួយ ស្ដីពីក្បាច់គុនបុរាណ នៅសាធារណរដ្ឋកូរ៉េ ដើម្បីបញ្ជាក់ពីប្រវត្តិពិត របស់កីឡាក្បាច់គុនបុរាណខ្មែរនេះទៀតផង ៕</span></p>
<p> </p>
<p><img src="https://fbcdn-sphotos-h-a.akamaihd.net/hphotos-ak-xtp1/t31.0-8/12983918_1720781018161416_9169989893985289604_o.jpg" alt="" width="730" /></p>
<p><img src="https://fbcdn-sphotos-c-a.akamaihd.net/hphotos-ak-xft1/t31.0-8/13086830_1720781051494746_6159793428050584567_o.jpg" alt="" width="730" /></p>
<p><img src="https://scontent-kul1-1.xx.fbcdn.net/t31.0-8/13041220_1720781014828083_2871984123556443523_o.jpg" alt="" width="730" /></p>
<p><span style="color: #000000;"><br /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>