<p><span style="color: #000000;"><strong>(ភ្នំពេញ)៖</strong> មន្រ្តីនៅអយ្យការអមសាលាដំបូងរាជធានីភ្នំពេញ បានឲ្យដឹងថា ស្ត្រីម្នាក់ឈ្មោះ ស្រេង លាងគីម ពាក់ព័ន្ធករណីឆបោក ទឹកប្រាក់ជាង១លានដុល្លារ នៅពេលនេះត្រូវបានព្រះរាជអាជ្ញា សម្រេចធ្វើការចោទប្រកាន់ពីបទ «រំលោភលើទំនុកចិត្ត» តាមមាត្រា៣៩១ និង៣៩២ នៃក្រមព្រហ្មទណ្ឌ។</span></p>
<p><span style="color: #000000;">បច្ចុប្បន្នសំណុំរឿង និងជនត្រូវចោទ ត្រូវបានបញ្ជូនទៅលោក កោ វណ្ឌី ចៅក្រមស៊ើបសួរសាលាដំបូងរាជធានីភ្នំពេញ ចាត់ការបន្តតាមនីតិវិធី។ នៅដំណាក់កាលនេះ ចៅក្រមស៊ើបសួរ នឹងសម្រេចឃុំខ្លួនឬមិនឃុំខ្លួន ជនត្រូវចោទ។ បទល្មើសនេះកំណត់ការផ្តន្ទាទោសដាក់ពន្ធនាគារពី៦ខែ ទៅ៣ឆ្នាំ និងពិន័យជាប្រាក់ពី១លានរៀលទៅ៦លានរៀល។</span></p>
<p><span style="color: #000000;">សូមជំរាបថា នៅព្រឹកថ្ងៃទី១៨ ខែសីហានេះ ស្ត្រីម្នាក់ត្រូវបានសមត្ថកិច្ច នាយកដ្ឋានដ្ឋានព្រហ្មទណ្ឌក្រសួងមហាផ្ទៃ បញ្ជូនមកអយ្យការអមសាលាដំបូងរាជធានីភ្នំពេញ ដើម្បីសាកសួរករណីឆបោក និងរំលោភលើទំនុកចិត្ត ទឹកប្រាក់ជាងមួយលានដុល្លារអាមេរិក។ បច្ចុប្បន្នជនសង្ស័យកំពុងស្ថិតក្រោមការសាកសួររបស់តុលាការ។ ដើមបណ្ដឹងក្នុងសំណុំរឿងនេះ សំណូមពរឱ្យតុលាការផ្តន្ទាទោសឈ្មោះ ស្រេង លាងគីម និង បក្ខពួកតាមច្បាប់ ព្រមទាំងទាមទារសំណងជំងឺចិត្តចំនួន៥០ម៉ឺនដុល្លារអាមេរិក។</span></p>
<p><span style="color: #000000;">សមត្ថកិច្ចបានបញ្ជាក់ថា ស្ត្រីរូបនេះឈ្មោះ ស្រេង លាងគីម អាយុ២៨ឆ្នាំ មានទីលំនៅផ្ទុះលេខ៣៥A/១៥ ផ្លូវលេខ៧ ក្រុម២១ មណ្ឌល២ ភូមិរកា១ សង្កាត់ចាក់អង្រែក្រោម ខណ្ឌមានជ័យ។ ចំណែកបក្ខពួកពីរនាក់ទៀត សមត្ថកិច្ចកំពុងស្វែងរកចាប់ខ្លួន។</span></p>
<p><span style="color: #000000;">ព័ត៌មានពីសមត្ថកិច្ច បានឲ្យដឹងថា ថ្ងៃទី២៥ ខែឧសភា ឆ្នាំ២០១៥ ដល់ថ្ងៃទី២៥ ខែឧសភា ឆ្នាំ២០១៦ ឈ្មោះ ស្រេង លាងគីម បានខ្ចីប្រាក់ពីឈ្មោះ លឹម មួយជូរ ភេទស្រី អាយុ៦០ឆ្នាំ ជាបន្តបន្ទាប់ច្រើនលើកសរុបចំនួន ១,៤៥៥,០០០ដុល្លារអាមេរិក (មួយលានបួនរយហាសិបប្រាំពាន់ដុល្លារអាមេរិក) ដែលមានលិខិតបញ្ជាក់ជាភស្តុតាង។ ក្រោយពីខ្ចីប្រាក់ពីឈ្មោះ លឹម មួយជូរ រួចហើយ ឈ្មោះ ស្រេង លាងគីម ពុំបានសងប្រាក់មកវិញទេ។</span></p>
<p><span style="color: #000000;">សមត្ថកិច្ចបានបញ្ជាក់បន្តថា លុះដល់ថ្ងៃទី១៨ ខែមិថុនា ឆ្នាំ២០១៦ សាច់ញាតិរបស់ឈ្មោះ ស្រេង លាងគីម បានមកដឹកឈ្មោះ លឹម មួយជូរ ទៅជួបនៅផ្ទះឪពុកឈ្មោះ ស្រេង លាងគីម ស្ថិតនៅភូមិ ព្រែកបាឡាក់ឆឹង ឃុំត្រើយស្លា ស្រុកស្អាង ខេត្តកណ្ដាល។ ពេលទៅដល់គោលដៅ សាច់ញាតិរបស់ឈ្មោះ ស្រេង លាងគីម បញ្ជាក់ថា ពុំមានប្រាក់សងឈ្មោះ លឹម មួយជូរ នោះទេ តែមានតូបទំនិញនៅផ្សារអូឡាំពិកចំនួន៣តូប ដីស្រែ និងដីលំនៅឋាន ២ទៅ៣កន្លែងទៀត ដើម្បីទូទាត់បំណុលជាងមួយលានដុល្លារនេះ។</span></p>
<p><span style="color: #000000;">បន្ទាប់មកសាច់ញាតិឈ្មោះ ស្រេង លាងគីម បានធ្វើកិច្ចសន្យាលក់តូប ដីស្រែ និងដីលំនៅឋានមកឲ្យឈ្មោះ លឹម មួយជូរ ។ ប៉ុន្តែឈ្មោះ លឹម មួយជូរ បានយកឯកសារទាំងនេះ ទៅស្រាវជ្រាវទើបដឹងថា ពុំមានឡើយ ពោលគឺសុទ្ធសឹងតែជាការភូតកុហក ទើបឈានដល់ការដាក់ពាក្យបណ្ដឹងតែម្តង៕</span></p>
<p><span style="color: #000000;"><br /><a class="thickbox" title="" href="/FileManager/Commons/2016/8/19/1-19-08-2016--16-00-00.png"><img src="/FileManager/Articles/mce/2016/8/19/1-19-08-2016--16-00-00.png" alt="" /></a><br /></span></p>
<p> </p>
<p><iframe style="border: none; overflow: hidden;" src="https://www.facebook.com/plugins/video.php?href=https%3A%2F%2Fwww.facebook.com%2Ffreshnewsasia%2Fvideos%2F593444240827371%2F&show_text=0&width=560" frameborder="0" width="500" height="315"></iframe></p>
<p style="text-align: right;"><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>