<p><span style="color: #000000;"><strong>(ឡុងដ៍)៖</strong> មិនបាច់និយាយច្រើនទេ លោក Boris Johnson ដែលជាអ្នកកាន់ពានរង្វាន់ធំ ក្រោយយុទ្ធនាការ បំផុសបំផុល ឲ្យចក្រភពអង់គ្លេស ចាកចេញពីសហភាពអឺរ៉ុបបានសម្រេចនោះ ហាក់បង្ហាញពីចរឹតដូចក្មេងលេងដី ដោយលោកបានឆ្លើយតបមកវិញយ៉ាងច្បាស់ថា លោកនឹងមិនឈរឈ្មោះ យកតំណែងនាយករដ្ឋមន្ត្រីអង់គ្លេស ដែលត្រូវរ៉ាប់រងថ្មបាក់ពីលោក David Cameron នោះទេ បើទោះបីជារូបលោក ត្រូវទទួលរងការចោទប្រកាន់ថា ជាមេខ្យល់ បង្ករឿងនេះក៏ដោយ។</span></p>
<p><span style="color: #000000;">សារព័ត៌មាន CNN របស់អាមេរិក បាននិងកំពុងតាមដានស្ថានការណ៍ អង់គ្លេសយ៉ាងដិតដល់ រហូតមកដល់ល្ងាចថ្ងៃសុក្រ ទី០១ ខែកក្កដា ឆ្នាំ២០១៦នេះ ដែលមានរយៈពេលមួយសប្តាហ៍ត្រឹម ក្រោយពីអង់គ្លេសបោះឆ្នោតចាកចេញពី EU ទាំងមិនដាច់អាល័យ។ ចំពោះមុខអ្នកប្រឆាំង ការចាកចេញពីអឺរ៉ុប ដែលជិះឡានក្រុងជាច្រើនគ្រឿង តវ៉ានៅតាមដង ផ្លូវទីក្រុងឡុងដ៍នោះ អតីតអភិបាលទីក្នុងឡុងដ៍ គឺលោក Boris Johnson បានប្រញាប់ប្រញាល់ឡើងរថយន្ត ជិះចេញ យ៉ាងលឿនពីការិយាល័យ សំដៅទៅកាន់លំនៅដ្ឋានវិញ យ៉ាងសុខសាន្ត។</span></p>
<p><span style="color: #000000;">ប្រការនេះ វាបានបង្ហាញថាលោក Boris Johnson ទំនងជាមិនអាចស្មានដឹងជាមុនទេ ថាលទ្ធផលចេញមកបែបនេះ បានបង្ករឿងឲ្យអាក្រក់ធ្ងន់ធ្ងរ លើសការស្មាន។ វាត្រូវបានចាត់ទុកជាថ្ងៃ ដ៏គួរឲ្យតក់ស្លុតបំផុត លើផ្លូវនយោបាយ របស់ចក្រភពអង់គ្លេស ដែលមួយសប្តាហ៍មកហើយ បញ្ហាកាន់តែវិវឌ្ឍន៍ខ្លាំងឡើង ដូចជំងឺមហារីក។ ពេលនេះ ចក្រភព អង់គ្លេសទាំងមូល ហាក់កំពុងបែងចែកកន្លែងរស់នៅ ជាពីរទៅហើយ គឺ «នៅបន្ត» និង «ចាកចេញ» ពីសហភាពអឺរ៉ុប។</span></p>
<p><span style="color: #000000;">ចំពោះលោក David Cameron ដែលកន្លងមក បានចង់ឲ្យតែអង់គ្លេសបន្តនៅក្នុង អឺរ៉ុប ដដែលនោះ ក៏បាននិយាយរួចទៅហើយដែរថា កាតព្វកិច្ចដ៏មហាឈឺក្បាល ថាតើចក្រភពអង់គ្លេស ត្រូវធ្វើអ្វីជាបន្តទៀតនោះ លោកសូមទុកឲ្យ មេដឹកនាំក្រោយ ជាអ្នកធ្វើទៅចុះ ព្រោះលោកនឹងចុះចេញពីតំណែង នៅខែតុលាខាងមុខនេះហើយ។ មិនថាតែ រដ្ឋាភិបាលប៉ុណ្ណោះទេ ដែលមានការប្រេះស្រាំរឿងនិន្នាការ សូម្បីតែបក្សប្រឆាំងនៅអង់គ្លេសក៏មានភាពរំជើបរំជួល និងផ្លាស់ប្តូរថ្នាក់ ដឹកនាំរបស់ខ្លួនដែរ ដូចជាគណបក្ស Labour Party ជាដើម ដែលត្រូវបានហែកជាបំណែកហើយ។</span></p>
<p><span style="color: #000000;">ងាកមកមើលបញ្ហាសេដ្ឋកិច្ចវិញ គ្រាន់តែពីរថ្ងៃប៉ុណ្ណោះ ទីផ្សារសេដ្ឋកិច្ចសកលបានបាត់បង់ទឹកប្រាក់ ៣ពាន់ពាន់លានដុល្លារអាមេរិក ដែលវាជារឿងអាក្រក់បំផុត ក្នុងប្រវត្តិសាស្ត្រ។ ប្រាក់ផោនរបស់អង់គ្លេស បានលិចលង់តម្លៃ ១២ភាគរយទៅហើយ គិតចាប់តាំងពីថ្ងៃបោះឆ្នោត មកមួយសប្តាហ៍នេះ។ ភាគច្រើននៃវិនិយោគិន បានមើលឃើញចក្រភពអង់គ្លេស ក្នុងផ្លូវវិជ្ជមានទៅហើយ ដោយរដ្ឋាភិបាល ក៏មិនទាន់មានចំណាត់ការអ្វីទៅរឿងនេះ ឲ្យមានប្រសិទ្ធភាពដែរ ព្រោះអ្វីៗបាន កើតឡើងភ្លាមពេក។ នៅពេលនេះ មានតែសំណួរប៉ុណ្ណោះ ថាតើអង់គ្លេស នឹងមានអនាគតដូចម្តេច?</span></p>
<p><span style="color: #0000ff;"><a href="/News/Detail/33231/who-will-be-next-british-prime-minister" target="_blank"><span style="color: #0000ff;">- អាន ៖ តើបុគ្គលណាខ្លះដែលឈរឈ្មោះប្រកួតប្រជែងដណ្តើម តំណែងជានាយករដ្ឋមន្ត្រីថ្មីរបស់ចក្រភពអង់គ្លេស</span></a></span></p>
<p><span style="color: #000000;"><img src="http://d2.christiantoday.com/en/full/46226/eu-referendum.jpg?w=760&h=504&l=50&t=40" alt="" width="730" /></span></p>
<div id="news_detail" class="postcontainer">
<p style="text-align: right;"><span style="color: #000000;">ផ្តល់សិទ្ធដោយ៖ ខ្មែរថកឃីង</span></p>
</div>
<div class="detail_bottom_function">
<div class="facebook_like"></div>
</div>
<p><br /><br /></p>