<p><span style="color: #000000;"><strong>(ភ្នំពេញ)៖</strong> ទណ្ឌិត ពេជ្រ ព្រហ្មមុន្នី ដែលគេស្គាល់យ៉ាងច្បាស់ថា ជាគ្រូមន្តអាគម និងជាមនុស្សជំនិតបំផុតរបស់លោក អាំង មាលតី អតីតប្រធានសាលាដំបូងរាជធានីភ្នំពេញ បរាជ័យក្នុងការស្នើសុំតុលាការស្រូបទោស ដើម្បីឆាប់បានចេញពីពន្ធនាគារ ។ ទោះយ៉ាងនេះក្ដី ទណ្ឌិត ពេជ្រ ព្រហ្មមុន្នី បញ្ជាក់ថា លោកពុំមានការភ្ញាក់ផ្អើលទេ ចំពោះការសម្រេចនេះ ដោយលោកចាត់ទុកថានេះជា ព្រហ្មលិខិត ។</span></p>
<p><span style="color: #000000;">ចៅក្រមជំនុំជម្រះសាលាដំបូងរាជធានីភ្នំពេញ លោក គឹម រ័ត្នណារិន នៅរសៀលថ្ងៃទី២៧ ខែកុម្ភៈ ឆ្នាំ២០១៧ ប្រកាសសាលក្រមដោយសម្រេចបដិសេធសំណើសុំស្រូបទោសរបស់ទណ្ឌិត ពេជ្រ ព្រហ្មមុន្នី ។ ប៉ុន្តែលោកចៅក្រមទុកឲ្យទណ្ឌិតរូបនេះ ប្តឹងឧទ្ធរណ៍តាមកំណត់ច្បាប់ ។</span></p>
<p><span style="color: #000000;">កាលពីពេលកន្លងទៅ លោក ពេជ្រ ព្រហ្មមុន្នី ត្រូវបានតុលាការផ្តន្ទាទោសពីរសំណុំរឿងផ្សេងគ្នា ។ សំណុំរឿងទី១ ត្រូវតុលាការផ្តន្ទាទោស៥ឆ្នាំតែអនុវត្តទោសត្រឹមពីរឆ្នាំប៉ុណ្ណោះ ពីបទ<strong> «ជំនួញឥទ្ធិពលអកម្ម»</strong> តាមមាត្រា ៥៩៥នៃក្រមព្រហ្មទណ្ឌ ប្រព្រឹត្តនៅភោជនីយដ្ឋាន One More ក្នុងខណ្ឌទួលគោក កាលពីថ្ងៃទី៨ ខែកុម្ភៈ ឆ្នាំ២០១៥ ។</span></p>
<p><span style="color: #000000;">សំណុំរឿងទី២ ត្រូវបានតុលាការផ្តន្ទាទោស១៨ខែ តែអនុវត្តទោសក្នុងពន្ធនាគារតែ១០ខែប៉ុណ្ណោះ ពីបទជ្រៀតជ្រែកដោយខុសច្បាប់ទៅក្នុង ការបំពេញមុខងារសាធារណៈ តាមមាត្រា៦០៩ នៃក្រមព្រហ្មទណ្ឌ ។ ដោយសារជនជាប់ចោទនិងព្រះរាជអាជ្ញា ពុំបានប្តឹងឧទ្ធរណ៍ សាលក្រមនេះបានចូលជាស្ថាពរ ហើយជនជាប់ចោទ ពេជ្រ ព្រហ្មមុន្នី បានក្លាយជាទណ្ឌិត៕</span></p>
<p> </p>
<p><span style="color: #000000;"><img src="http://image.freshnewsasia.com/2017/112/fn-2017-02-27-15-36-19-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/112/fn-2017-02-27-15-36-19-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/112/fn-2017-02-27-15-36-19-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/112/fn-2017-02-27-15-36-20-3.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>