<p><span style="color: #000000;"><strong>(ភ្នំពេញ)៖</strong> លោក លី សុផាណា អ្នកនាំពាក្យដ៏សកម្មមួយរូបនៅសាលាដំបូងរាជធានីភ្នំពេញ បានថ្លែងឲ្យដឹងនៅល្ងាចថ្ងៃទី១៥ ខែសីហានេះថា ជនពាក់ព័ន្ធ៣នាក់ លើករណីបាញ់សម្លាប់មនុស្ស នៅម៉ាតក្បែរផ្សាររាត្រី បានសម្រេចបញ្ជូនត្រឡប់ទៅកាន់ ទីបញ្ជាការដ្ឋានកងរាជអាវុធហត្ថរាជធានីភ្នំពេញវិញ នៅថ្ងៃស្អែកនឹងបន្តការសាកសួរទៀត ។</span></p>
<p><span style="color: #000000;">ការបញ្ជូនត្រឡប់ទៅវិញនេះ ធ្វើឡើងបន្ទាប់ពីជនពាក់ព័ន្ធទាំង៣នាក់ ត្រូវបានអាវុធហត្ថរាជធានីភ្នំពេញ បញ្ជូនមកកាន់សាលាដំបូងរាជធានីភ្នំពេញ ហើយតំណាងអយ្យការក្រុងភ្នំពេញ បានទទួលយកសំណុំរឿង និងភស្តុតាង រួចហើយបញ្ជូនត្រឡប់ទៅវិញសិន ថ្ងៃស្អែកបន្តសាកសួរទៀត។</span></p>
<p><span style="color: #000000;">លោក លី សុផាណា បានបញ្ជាក់យ៉ាងដូច្នេះថា<strong> «អយ្យការបានទទួលសំណុំរឿងដែលពាក់ពន្ធ័នឹងការបាញ់នៅក្បែរផ្សាររាត្រីពីកងរាជអាវុធហត្ថនៅរសៀលនេះ ហើយបានកំពុងបំពេញបែបបទតាមនិតិវិធី។ ជនសង្ស័យត្រូវរក្សាទុកនៅកងរាជអាវុធដើម្បីបន្តចំណាត់ការនិងនិតិវិធីនៅអយ្យការនៅថ្ងៃស្អែក»</strong>។</span></p>
<p><span style="color: #000000;">សូមជំរាបថា លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានប្រាប់អង្គភាព Fresh News ឲ្យដឹងថា បន្ទាប់ពីមានការស្រាវជ្រាវយ៉ាង លម្អិតរបស់កងរាជអាវុធហត្ថរាជធានីភ្នំពេញ ចំពោះឃាតកម្មហាងមីនីម៉ាត ក្បែរផ្សាររាត្រីនោះ កម្លាំងអាវុធហត្ថបានរកឃើញថា មានមនុស្ស៣នាក់ ជាប់ពាក់ព័ន្ធ នឹងអំពើឃាតកម្មនេះ ហើយបញ្ជូនទៅកាន់សាលាដំបូងរាជធានីភ្នំពេញ នាល្ងាចថ្ងៃទី១៥ ខែសីហា ឆ្នាំ២០១៦នេះ។</span></p>
<p><span style="color: #000000;">លោក អេង ហ៊ី បានបញ្ជាក់ថា ជនដៃដល់ដែលជាអ្នកបាញ់សម្លាប់ផ្ទាល់ដៃនោះ លោកមិនទាន់អះអាងទេ ដោយទុកឲ្យខាងអយ្យការអមសាលាដំបូងរាជធានីភ្នំពេញ ជាអ្នកចោទប្រកាន់, ខាងកម្លាំងអាវុធហត្ថមានសិទ្ធិត្រឹមបញ្ជូនជនពាក់ព័ន្ធទាំង៣នាក់ និងភស្តុតាង (កាំភ្លើង២ដើម) ទៅកាន់តុលាការដើម្បីចាត់ការតាមផ្លូវច្បាប់។</span></p>
<p><span style="color: #000000;">តាមព័ត៌មានច្បាស់ការណ៍មួយដែល Fresh News ទទួលបាននៅរសៀលថ្ងៃនេះបានឲ្យដឹងថា ខ្មាន់កាំភ្លើងដែលបាញ់សម្លាប់មនុស្ស នៅម៉ាតនោះគឺ មិនមែនប្អូនប្រុស កញ្ញា ខៀវ សុខារ៉ាវី នោះទេ, ដោយអ្នកបាញ់មានឈ្មោះ ផុន ភក្តី។</span></p>
<p><span style="color: #000000;">សូមជំរាបថា នៅថ្ងៃកើតហេតុ ម្តាយ ខៀវ សុខារ៉ាវី បាននិយាយប្រាប់អង្គភាព Fresh News បានឲ្យដឹង កូនរបស់គាត់មិនមែនជាអ្នកបាញ់សម្លាប់នោះទេ, មានអ្នកផ្សេងជាអ្នកចូលមកបាញ់សម្លាប់ដូចលក្ខណៈប្លន់។ ម្តាយ ខៀវ សុខារ៉ាវី បានបញ្ជាក់យ៉ាងដូច្នេះថា <strong>«កូនរបស់ខ្ញុំមិនមែនជាអ្នកបាញ់នោះទេ មានមនុស្សផ្សេងចូលមកបាញ់ ដូចក្នុងលក្ខណៈប្លន់, បើមិនជឿខ្ញុំមានកាមេរ៉ាមើល»</strong>៕</span></p>
<p><span style="color: #000000;"><img src="http://image.freshnewsasia.com/2016/011/K-0505.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/011/K-0506.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>