<div class="article-content">
<p><strong>ភ្នំពេញ ៖</strong> បុរសជាកម្មករម្នាក់ បានជិះម៉ូតូរបស់ខ្លួនម៉ាកសង់កូរ៉េ មករកស្រ្តីរកស៊ីផ្លូវភេទ នៅម្តុំអតីតបារទន្លេ សាប ហើយបានហៅស្រ្តីម្នាក់ទៅដេក ក្នុងតម្លៃ ២០ដុល្លារ ដោយនាំគ្នាជួលផ្ទះសំណាក់មួយកន្លែង តាមបណ្តោយផ្លូវលេខ៧០ ប៉ុន្តែពេលទៅដល់បន្ទប់ផ្ទះសំណាក់ ស្រាប់តែខាងប្រុសឲ្យតែ ៣ម៉ឺនរៀល ធ្វើឲ្យ ភាគីទាំងផ្ទុះ ហិង្សាដាក់ គ្នា ដោយភាគីខាងប្រុស ខាំស្លឹកត្រចៀក និងដាល់ខាងស្រី ប៉ោងភ្នែកម្ខាង ចំណែកខាងស្រីវិញក៏ខាំម្រាមដៃខាងប្រុស បណ្តាលឲ្យរបួស ខ្លួនផ្អើលពេញផ្ទះ សំណាក់ តែម្តង ។</p>
<p>ហេតុការណ៍ ផ្ទុះអំពើហិង្សា ព្រោះតែមិនមានលុយគ្រប់នេះ បានកើតឡើង កាលពីវេលាម៉ោង២៣និង៤០នាទី នៅតាមបណ្តោផ្លូវលេខ៧០ ចំណុចផ្ទះសំណាក់យីហោលីហួរ ស្ថិតក្នុងភូមិ១០ សង្កាត់ស្រះចក ខណ្ឌដូនពេញ ។</p>
<p>មន្រ្តីនគរបាល ប៉ុស្តិ៍ស្រះចក បានឲ្យដឹងថា ភាគីខាងប្រុស ដែលមិនមានលុយ ឲ្យគ្រប់នោះមានឈ្មោះ នូ កាណែល អាយុ២៩ឆ្នាំ មុខរបរកម្មករ សំណង់ ស្នាក់នៅ ភូមិ-សង្កាត់ និរោធ ខណ្ឌមានជ័យ បានរងរបួសត្រង់ម្រាមដៃ ស្តាំ ។ ចំណែកខាងស្រី ឈ្មោះ សៀម ភា អាយុ៣២ឆ្នាំ មុខរបររកស៊ីផ្លូវភេទ ស្នាក់នៅផ្ទះជួលតាម ផ្លូវជាតិលេខ៥ សង្កាត់ស្វាយប៉ាក ខណ្ឌឫស្សីកែវ បានរងរបួសស្លឹកត្រចៀក ខាងឆ្វេង ដោយសារខាង ប្រុសខាំ ដាច់ក្តោងច្រមុះ និងហើមលើផ្ទៃមុខ ។</p>
<p>នគរបាលប៉ុស្តិ៍ស្រះចក បាននិយាយថា នៅមុនពេលកើតហេតុ បុរសឈ្មោះ នូ កាណែល បានចេញពីផឹកស៊ីនៅម្តុំប្រេស៊ីដង់ ហើយ នឹកឃើញចង់រួមភេទ ក៏បានបើកម៉ូតូ C១០០កូរ៉េ ពណ៌ក្រហម ជិះតែម្នាក់ឯងឆ្ពោះមករកស្រីនៅម្តុំមាត់ទន្លេ ម្តុំបារទន្លេសាប ពេលនោះបានជួប នឹងនារីរងគ្រោះ ក៏តថ្លៃត្រូវរ៉ូវគ្នាក្នុងតំលៃ២០ដុល្លារ ហើយក៏ដឹកគ្នាឆ្ពោះ មកជួលបន្ទប់លេខ១០២ ផ្ទះសំណាក់យីហោលីហួរ ពេលចូលដល់ក្នុងបន្ទប់ ស្រាប់តែខាងស្រី បានទារលុយមុនចំនួន២០ដុល្លារ ពេលនោះខាងប្រុស ឲ្យតែ៣ម៉ឺនរៀល ខាងស្រីមិនព្រម "ពោលគឺមិនទាន់ បានរួមភេទនៅឡើយទេ " ខណៈតណ្ហាកំពុងឡើង បានធ្វើភាគីខាងប្រុសខឹង ហើយស្ទុះទៅប្រតាយប្រតប់ ច្របាច់កចាប់ខាំស្លឹកត្រចៀក និងវាយទៅលើ ស្រ្តីរងគ្រោះ ចំណែកស្រ្តីរង គ្រោះ វិញ ក៏ចាប់ខាំត្រង់ម្រាមដៃកណ្តាលឲ្យរបួស ទាំងអស់គ្នា ផ្អើលពេញផ្ទះសំណាក់តែម្តង។</p>
<p>ប្រភពព័ត៌មាន បានបន្តទៀតថា ក្រោយកើតហេតុ សមត្ថកិច្ចមូលដ្ឋាន ក៏បានចុះទៅអន្តរាគមន៍ភ្លាមៗរួចហើយនាំពួកគេទាំង២នាក់នោះ មកកាន់ស្នាក់ការប៉ុស្តិ៍ស្រះចក ដើម្បីសម្របសម្រួល ផងដែរ ។</p>
<p>ក្រោយធ្វើការ សម្របសម្រួល ភាគីខាង ប្រុសសុខចិត្ត ចេញសំណង ឲ្យនារីរកស៊ីផ្លូវភេទ ចំនួន៤០០ ដុល្លារ ហើយនារីរូបនោះ សុខចិត្តព្រមទទួល ដើម្បីបញ្ចប់បញ្ហាផងដែរ ៕</p>
<p style="text-align: center;"><img src="http://image.dap-news.com:81/dap-news/dap-images/2014/March/id-011/Hong-0383.jpg" alt="" width="500" /></p>
<p style="text-align: center;"><img src="http://image.dap-news.com:81/dap-news/dap-images/2014/March/id-011/Hong-0384.jpg" alt="" width="500" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>