<div class="item-page">
<p><span style="color: #000000;"><strong>(ភ្នំពេញ)៖</strong> សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី០៧ ខែវិច្ឆិកា ឆ្នាំ២០១៦នេះ បានបង្ហើបថា សម្តេចធ្លាប់បានបញ្ជាមិនឱ្យមានការចល័តកងទ័ពនៅតាមព្រំដែនកម្ពុជា-ថៃឡើយ កាលពីពេលព្រះមហាក្សត្រថៃ ព្រះចៅភូមិបុល អាឌុលយ៉ាដេត សោយទិវង្គត កន្លងទៅ ដើម្បីកុំឱ្យមានការភ័នច្រឡំ។</span></p>
<p><span style="color: #000000;">សម្តេចតេជោ ហ៊ុន សែន បានមានប្រសាសន៍បែបនេះ ក្នុងពីធីប្រគល់សញ្ញាបត្រជូនដល់លោកគ្រូ អ្នកគ្រូ និងនិស្សិតនៃវិទ្យាស្ថានជាតិបណ្ដុះបណ្ដាលបច្ចេកទេស ដែលបានបញ្ចប់ការសិក្សា ឆ្នាំ២០១១-២០១៤ ចំនួន ៣,៨២៩នាក់ នាមជ្ឈមណ្ឌលសន្និបាត និងពិព័រណ៍កោះពេជ្រ។ សម្ដេចតេជោ បានបញ្ជាក់ថា មូលហេតុនៃការផ្អាកការចល័តកងកម្លាំងប្រដាប់អាវុធនេះ គឺជានយោបាយការបរទេស។</span></p>
<p><span style="color: #000000;">សម្ដេចតេជោ ហ៊ុន សែន មានប្រសាសន៍យ៉ាងដូច្នេះថា «សូម្បីតែប្រទេសជិតខាងយើង បានបាត់បង់ព្រះមហាក្សត្រ ខ្ញុំត្រូវចេញបញ្ជាទាំងយប់ ដើម្បីឲ្យកម្លាំងប្រដាប់អាវុធទាំងអស់ ហាមចល័តកម្លាំង ដើម្បីចៀសវាងការភ័ន្តច្រឡំណាមួយ នៅក្នុងប្រទេសថៃ នេះជានយោបាយក្រៅប្រទេសតើ»។</span></p>
<p><span style="color: #000000;">សូមរំលឹកថា ព្រះមហាក្សត្រថៃ ព្រះចៅភូមិបុល អាឌុលយ៉ាដេត បានចូលទិវង្គតកាលពីរសៀលថ្ងៃទី១៣ ខែតុលា ឆ្នាំ២០១៦ កន្លងទៅ ក្នុងព្រះជន្ម៨៩ព្រះវស្សា ហើយព្រះរាជពិធីអភិសេធព្រះមហាក្សត្រថ្មី នឹងប្រារព្ធឡើងនៅថ្ងៃទី០១ ខែធ្នូ ឆ្នាំ២០១៦ ខាងមុខនេះ ដែលមានរៀបចំតែងតាំងរួចជាស្រេចហើយ នោះគឺព្រះចៅ មហា វិជ្ជរ៉ាឡុងកន បុត្រាច្បងរបស់ព្រះចៅភូមិបុល អាឌុនយ៉ាដេត។</span></p>
<p><span style="color: #000000;">កម្ពុជា-ថៃ ធ្លាប់មានការប៉ះទង្គិចគ្នា នៅតំបន់ប្រាសាទព្រះវិហារ កាលពីឆ្នាំ២០០៧ កន្លងទៅ ប៉ុន្តែការប៉ះទង្គិចគ្នានេះ បានស្ងប់ស្ងាត់ទៅវិញ នៅប៉ុន្មានឆ្នាំចុងក្រោយនេះ៕</span></p>
<span style="color: #000000;"><iframe src="https://www.facebook.com/plugins/video.php?href=https%3A%2F%2Fwww.facebook.com%2Ffreshnewsasia%2Fvideos%2F634468263391635%2F&show_text=0&width=730" frameborder="0" width="480" height="380"></iframe></span>
<p><span style="color: #000000;"><img src="http://image.freshnewsasia.com/2016/fn-2016-11-07-18-14-32-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/fn-2016-11-07-18-14-32-1.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>