<p><span style="color: #000000;"><strong>(អាហ្សង់ទីន)៖</strong> ប្រធានាធិបតីប្រទេសអាហ្សង់ទីន លោក Mauricio Macri និងអតីតតារាបាល់ទាត់ឆ្នើមពិភពលោក Diego Maradona រួមទាំងអ្នកគាំទ្ររាប់ម៉ឺននាក់ បានទទូចសុំឲ្យកីឡាករខ្សែប្រយុទ្ធ Lionel Messi ចូលលេងក្នុងក្រុមជម្រើសជាតិអាហ្សង់ទីនវិញ បន្ទាប់ពីរូបគេបានប្រកាសចូលនិវត្តន៍ ពីក្រុមជម្រើសជាតិកាលពីថ្ងៃទី២៧ ខែមិថុនា ឆ្នាំ២០១៦។</span></p>
<p><span style="color: #000000;">គេហទំព័រ The Gaurdians បានឲ្យដឹងថា ប្រជាពលរដ្ឋអាហ្សង់ទីនរាប់ម៉ឺននាក់ បានចេញមកធ្វើពិធីអបអរក្នុងរដ្ឋធានី Buenos Aires ចំពោះជ័យជំនះជើងឯករងនៃព្រឹត្តិការណ៍ពានប្រចាំទ្វីបអាមេរិក Copa America Centenario 2016 ជាមួយនឹងការស្រែកច្រៀង និងលើកបដា សុំឲ្យវីរបុរសរបស់គេ Lionel Messi ផ្លាស់ប្តូរចិត្តចូលលេងក្នុងក្រុមជម្រើសជាតិវិញផងដែរ។</span></p>
<p><span style="color: #000000;">ថ្មីៗនេះ ប្រធានាធិបតីអាហ្សង់ទីន ក៏បានទូរស័ព្ទជួបផ្ទាល់ជាមួយកីឡាករ ដែលទើបតែមានវ័យ២៩ឆ្នាំ កំពុងប្រកបអាជីពក្នុងក្លឹប FC Barcelona របស់អេស្ប៉ាញ អំពីការសម្រេចចិត្តចូលនិវត្តន៍ ពីក្រុមជម្រើសជាតិដ៏លឿនបែបនេះ តែលទ្ធផលយ៉ាងនោះពី Messi នៅមិនទាន់ដឹងនៅឡើយទេ។</span></p>
<p><span style="color: #000000;">តែយ៉ាងណាក៏ដោយ អតីតកីឡាករឆ្នើមរបស់ពិភពលោក Diego Maradona ដែលធ្លាប់ដឹកនាំអាហ្សង់ទីន លេងក្នុង World Cup 2010 នៅអាហ្រ្វិកខាងត្បូងក៏បានសុំឲ្យ Messi គិតឡើងវិញអំពីការផ្លាស់ប្តូរចិត្តជាថ្មីវិលមក ជួយអាហ្សង់ទីនជាបន្តទៀត ដែលត្រៀមជម្រុះ World Cup 2018 នៅរុស្ស៊ីចាប់ពីខែកញ្ញាខាងមុខបន្តទៀតហើយ។</span></p>
<p><span style="color: #000000;">សូមរំលឹកដែរថា កីឡាករលេងល្អរបស់ពិភពលោក ៥សម័យកាល Lionel Messi បានប្រកាសលាឈប់ពីក្រុមជម្រើសជាតិភ្លាម២ បន្ទាប់ពីមិនអាចជួយក្រុមអាហ្សង់ទីន ឈ្នះជើងឯកពាន Copa America Centenario 2016 នៅលើទឹកដីអាមេរិកកាលពីថ្ងៃទី២៧ មិថុនា ដោយបាល់ប៉េណាល់ទីកាត់សេចក្តី ៤-២ នៅវគ្គផ្តាច់ព្រ័ត្រ ដោយ Messi ក៏ប៉េណាល់ទីមិនចូលគ្រាប់ទី១ បើកឆាកផងដែរ ដែលធ្វើឲ្យគេខូចចិត្តជាខ្លាំង ក្រោយពីព្យាយាម៣ឆ្នាំបានត្រឹមតែរងជើងឯកនៃពាន World Cup 2014 ពាន Copa America 2015 និងពាន Copa America Centenario 2016 នេះ៕</span></p>
<p><span style="color: #000000;"><img src="http://level3.soccerladuma.net/cms2/image_manager/uploads/News/232949/7/default.jpg" alt="" width="730" /></span></p>
<p><span style="color: #000000;"><img src="https://si.wsj.net/public/resources/images/BN-OR756_MESSI0_P_20160628181738.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>