<p><span style="color: #000000;"><strong>(កំពង់ចាម)៖</strong> ស្ត្រីឈ្មោះ ចេង វណ្ណា រស់នៅភូមិលេខ៣ ឃុំអំពិលតាពក ស្រុកអូររាំងឪ ខេត្តកំពង់ចាម បាន ប្តឹងស្ត្រីឈ្មោះ គឹង មណ្និកា ជាគ្រូបង្រៀននៅវិទ្យាល័យ ហ៊ុន សែន អូររាំងឪ ដែលគេស្គាល់ថា ជាប្រពន្ធលោកអភិបាលរងស្រុក អូររាំងឪ ពាក់ព័ន្ធករណីខ្ចីខ្សែក យកទៅពាក់ការកូនហើយមិនសងវិញ។</span></p>
<p><span style="color: #000000;">សាច់ញាតិរបស់ស្រី្តជាម្ចាស់ខ្សែក បានប្រាប់ឲ្យដឹងថា ប្រពន្ធលោកអភិបាលរងស្រុកអូររាំងឪម្នាក់ គឺលោកស្រី គឹង មណ្នីកា បានយក ខ្សែករបស់ខ្លួនទៅលក់ឲ្យស្រ្តី ចេង វណ្ណា ទម្ងន់ជាង២តម្លឹងប្លាទីន តម្លៃ២៨៥០ដុល្លារ ដើម្បីយកលុយការកូន។</span></p>
<p><span style="color: #000000;">ក្រោយលក់ខ្សែកនេះឲ្យលោកស្រី ចេង វណ្ណា ហើយនោះលោកស្រី គឹង មណ្និកា គិតថាគ្មានអ្វីពាក់ក្នុងពិធីការកូន ក៏សុំខ្ចីខ្សែកនោះមក វិញហើយសន្យាថាការកូនហើយ និងសងវិញ តែរហូតមកដល់ពេលនេះពុំបានសងនោះទេ រហូតដល់មានការប្តឹងផ្តល់គ្នា ដល់សាលាស្រុកទៀតផង។</span></p>
<p><span style="color: #000000;">បើយោងតាមកំណត់ហេតុសម្របសម្រួលលើកទី២ នៅថ្ងទី២៤ ខែកុម្ភៈ ឆ្នាំ២០១៦ វេលាម៉ោង៣៖៣០នាទីរសៀល គឺភាគីលោកស្រី គឹង មណ្នីកា ចុងចោទបានបដិសេធថាខ្លួន ពុំបានខ្ចីខ្សែកពីលោកស្រី ចេង វណ្ណា នោះទេ ហើយលុយចំនួន២៨៥០ដុល្លារ ជាលុយកក់ថ្លៃដី។</span></p>
<p><span style="color: #000000;">ចំណែកលោកស្រី ចេង វណ្ណា ដើមចោទបានស្នើសុំលុយ ២៨៥០ដុល្លារនោះមកវិញ។ លោកស្រីថា បើលុយកក់ដីមែននោះតើដី នៅកន្លែងណា ហើយមេភូមិឃុំណាដឹងឮ។</span></p>
<p><span style="color: #000000;">ទោះបីជាយ៉ាងនេះក្តី ប្រភពពីក្រុមការងារចុះពង្រឹងបក្សនៅស្រុកអូររាំងឪ បានបង្ហើបថា លោក សាយ សំអាល់ ប្រធានក្រុមការងារ ធ្លាប់បានបញ្ជាឲ្យលោកអភិបាលរងស្រុក ឆាប់យកខ្សែកប្រគល់ឲ្យ ម្ចាស់ដើមវិញផងដែរ តែរហូតមកដល់ថ្ងៃនេះ នៅមិនទាន់បានសងឲ្យ ម្ចាស់ខ្សែក នៅឡើយទេ។</span></p>
<p><span style="color: #000000;">យ៉ាងណាក៏ដោយ អង្គភាព Fresh News មិនទាន់សុំការបំភ្លឺ ពីភាគីភរិយាលោក អភិបាលរងស្រុក ដែលទទួលរងការចោទប្រកាន់ នៅឡើយទេ នៅថ្ងៃទី៨ ខែមេសា ឆ្នាំ២០១៦នេះ៕</span></p>
<p><span style="color: #000000;"><img src="http://image.freshnewsasia.com/2016/099/fn-2016-04-08-11-23-44-1.jpg" alt="" width="730" /></span></p>
<p> </p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
<div><span><br /></span></div>