<p><span style="color: #000000;"><strong>(ភ្នំពេញ)៖</strong> អ្នកស្រី កែម ថាវី បងស្រីបង្កើតរបស់ លោក កែម ឡី បានបញ្ជាក់ប្រាប់អង្គភាព Fresh News នៅមុននេះបន្តិចថា សាកសពលោក កែម ឡី នៅមិនទាន់ច្បាស់ថា នឹងបូជានៅថ្ងៃទី១៨ ខែកក្កដាទេ អាចនឹងរក្សាទុកបន្តទៀត។ អ្នកស្រីបន្តថា ការកំណត់ថា ថ្ងៃទី១៨ ខែកក្កដា គ្រាន់តែជាកាលបរិច្ឆេទទុកទេ តែមិនប្រាកដឡើយ អ្វីៗអាចនឹងមានការផ្លាស់ប្តូរតែលោកស្រី មិនបានបញ្ជាក់ថា នឹងមានការផ្លាស់ប្តូរថា នឹងរក្សាទុករហូតដល់ពេលណាឡើយ រង់ចាំការសម្រេចជាថ្មីម្តងទៀតសិន។</span></p>
<p><span style="color: #000000;">ការបញ្ជាក់ពី អ្នកស្រី កែម ថាវី បងស្រីបង្កើតរបស់ លោក កែម ឡី បានធ្វើឡើង ក្រោយពីមានអ្នកគាំទ្រ ស្នើសុំឲ្យគ្រួសារសព បន្តរក្សាសាកសព លោក កែម ឡី ទៀត ដើម្បីឲ្យបងប្អូនប្រជាពលរដ្ឋ អាចមកអុកធូប និងគោរពវិញ្ញាណក្ខន្ធបានក្នុងរយៈពេលយូរទៀត។ យ៉ាងណាក៏ដោយ គ្រួសារសពរបស់លោក កែម ឡី ហាក់នៅមិនទាន់សម្រេចថា នៅឡើយទេ លើករណីថាគួរបន្តតម្កល់សព ទៀតឫយ៉ាងណានៅឡើយទេ។</span></p>
<p><span style="color: #000000;">គួរបញ្ជាក់ថា យោងតាមលិខិតកម្មវិធីបុណ្យសព របស់ក្រុមគ្រួសារលោក កែម ឡី បានផ្សព្វផ្សាយឲ្យដឹងកាលពីម្សិលមិញ ដោយបញ្ជាក់ថា សពលោកបណ្ឌិត កែម ឡី នឹងត្រូវបូជានៅម៉ោង៥៖០០នាទីរសៀលថ្ងៃទី១៨ ខែកក្កដា នៅបរិវេណវត្តពោធិ៍យារាម ហៅវត្តចាស់ ស្ថិតនៅសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ដែលជាទីកន្លែងកំពុងតម្កល់សព។</span></p>
<p><span style="color: #000000;">លិខិតកម្មវិធីបុណ្យរបស់លោក កែម ឡី បានឲ្យដឹងថា ចាប់ពីថ្ងៃទី១០ ដល់ថ្ងៃទី១៨ ខែកក្កដា ឆ្នាំ២០១៦ សពលោកបណ្ឌិត កែម ឡី បាននិងកំពុងតម្កល់ទុក នៅវត្តពោធិយារាម ដើម្បីឲ្យជនរួមជាតិ បានចូលរួមរំលែកទុក្ខដល់គ្រួសារសព និងធ្វើបុណ្យឧទ្ទិសកុស តាមប្រពៃណី។</span></p>
<p><span style="color: #000000;">លោកបណ្ឌិត កែម ឡី ត្រូវបានខ្នាន់កាំភ្លើងដែលអះអាងថា ខ្លួនឈ្មោះ ជួប សម្លាប់ បាញ់សម្លាប់នៅក្នុង Star mart របស់ស្ថានីយ ប្រេងឥន្ធនៈកាល់តិច ស្តុបបូកគោ នៅព្រឹកថ្ងៃទី១០ ខែកក្កដា ឆ្នាំ២០១៦៕</span></p>
<p><span style="color: #000000;"><img src="https://fbcdn-sphotos-g-a.akamaihd.net/hphotos-ak-xtf1/v/t1.0-9/13600353_1060277737391237_2417552044885985684_n.jpg?oh=111728661531fb4de246f0c84bd65f83&oe=5831565C&__gda__=1475022068_59d803bc362d9b8b188f02d84a802e3e" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>