<div>
<p><span style="color: #000000;"><strong>(ភ្នំពេញ)៖</strong> ល្ងាចនេះ គឺជាថ្ងៃទី១ ដែលលោក ប្រាក់ សុវណ្ណារ៉ា នឹងធ្វើការប្រមូលផ្ដុំកីឡាករក្រុម Cambodia All Stars ធ្វើការហ្វឹកហាត់ត្រៀមប្រកួតមិត្តភាពជាមួយក្រុមភ្ញៀវ Lao All Stars នៅថ្ងៃទី១៨ ខែមីនាខាងមុខ ប៉ុន្ដែការប្រមូលផ្ដុំនេះ គឺមិនមានវត្តមានកីឡាករឆ្នើម ៣រូបរបស់ភ្នំពេញក្រោនចូលរួមឡើយ ព្រោះពួកគេមានរបួស ។</span></p>
<p><span style="color: #000000;">កីឡាករឆ្នើមភ្នំពេញក្រោន ៣រូប ដែលមិនបានចូលរួមហ្វឹកហាត់ជាមួយក្រុម Cambodia All Stars និងធ្វើឲ្យលោក ប្រាក់ សុវណ្ណារ៉ា មាន ការ សោក ស្ដាយ ផង នោះ គឺមានខ្សែបម្រើ-ប្រយុទ្ធកូនកាត់ខ្មែរ-បារាំង ធារី ចន្ថាប៊ីន, កីឡាករអាហ្វ្រិកខាងត្បូង Booysen Shane និងតារាបាល់ទាត់វ័យក្មេង កែវ សុខផេង ។ ប៉ុន្ដែការអវត្តមាននេះ មិនបានឲ្យលោក ប្រាក់ សុវណ្ណារ៉ា ព្រួយបារម្ភលើទម្រង់លេងនោះទេ ព្រោះលោកមានកីឡាករថ្មីៗប៉ុន្មាននាក់ ដែលនឹងជួយក្រុម Cambodian All Stars ស្វែងរកជ័យជម្នះបាន ។</span></p>
<p><span style="color: #000000;">គ្រូបង្វឹកមកពីក្លឹបបឹងកេតរូបនេះ បាននិយាយថា «ខ្ញុំពិតជាសោកស្ដាយ ដែល ធារី ចន្ថាប៊ីន, Booysen Shane និង កែវ សុខផេង មានរបួសមិនអាចចូលរួម បាន ប៉ុន្ដែខ្ញុំគិតថា ចំពោះទម្រង់លេងរបស់ក្រុម Cambodia All Stars នឹងមានការផ្លាស់ប្ដូរអ្វីច្រើននោះទេ ព្រោះលោកមានកីឡាករថ្មីៗមួយចំនួន ដែលមានសមត្ថភាព ដូចជាកីឡាករកូរ៉េខាងជើង Choe Myong-ho ជាដើម ដែលគេមានសមត្ថភាពយ៉ាងពិសេស នៅពេលគេបង្ហាញទម្រង់លេងក្នុងក្រុមក្រសួងការពារជាតិនា ៣ប្រកួតបើកឆាកលីកកំពូលកម្ពុជាកន្លងមក» ។</span></p>
<p><span style="color: #000000;">លោក ប្រាក់ សុវណ្ណារ៉ា បានបញ្ជាក់ប្រាប់អ្នកសារព័ត៌មានអំឡុងពេលលោកដឹកនាំក្រុម MCL ប្រកួតឈ្នះក្រុមជម្រើសជាតិកម្ពុជា ២-១ កាលពីល្ងាចមិញបន្ថែមថា បើគិតទៅកីឡាករជាតិស្ទើតែ ១០០% កំពុងប្រមូលផ្ដុំហ្វឹកហាត់ក្នុងក្រុមជម្រើសជាតិ ដូច្នេះពួកគេសុទ្ធតែមានសមត្ថភាព និងមានការហ្វឹកហាត់ត្រៀមបានល្អ ។ ម្យ៉ាងវិញទៀត លោកបានជ្រើសរើសកីឡាករបរទេស ដែលមានសក្ដានុពល ៥នាក់ទៀតមកពង្រឹងសមត្ថភាពក្រុមបន្ថែម អាស្រ័យហេតុនេះ លោកជឿជាក់ថា ការប្រកួតជាមួយក្រុម Lao All Stars នឹងទទួលបានលទ្ធផលល្អជាមិនខាន ។</span></p>
<p><span style="color: #000000;">ចំពោះកីឡាករបរទេស ដែលលោក ប្រាក់ សុវណ្ណារ៉ា ជ្រើសរើសមកពង្រឹងតំបន់ការពារ បម្រើ និងប្រយុទ្ធផងនោះ រួមមានកីឡាករ Ajayi Samuel Gbenga, Esoh Omogba និងកីឡាករ Yuya Wada ដែលកីឡាករឆ្នើមមកពីក្លឹបបឹងកេតអង្គរ រីឯ ២នាក់ទៀត គឺមានកីឡាករខ្សែការពារ Mizuno Hikaru មកពីក្លឹបព្រះខ័នរាជស្វាយរៀង និងកីឡាករ Choe Myong-ho ដែលគេឈ្មោះថា Ronaldo កូរ៉េខាងជើង កំពុងលេងឲ្យក្រសួងការពារជាតិ ។</span></p>
<p><span style="color: #000000;">គួរបញ្ជាក់ដែរថា កាលពីខែមករាកន្លងទៅ លោក ប្រាក់ សុវណ្ណារ៉ា ធ្លាប់បានដឹកនាំក្រុម Cambodia All Stars ប្រកួតឈ្នះជាប្រវត្តិសាស្ដ្រលើក្រុមជើងខ្លាំងថៃ ២ប្រកួតជាប់គ្នា ពោលគឺយកឈ្នះក្រុមជើងឯករងលីកថៃ Muangthong United ៤-៣ បន្ទាប់មកបានយកឈ្នះក្រុមជើងឯកលីកថៃ Buriram United ៤-៣ ដែលជាការទាត់បាល់ប៉េណាល់ទីកាត់សេចក្ដី បន្ទាប់ពីប្រកួតពេញម៉ោងស្មើគ្នា ២-២ ។ ប៉ុន្ដែមួយសប្ដាហ៍ក្រោយមកទើបក្រុម Lao All Stars ប្រកួតចាញ់ក្រុម Buriram United នេះដោយលទ្ធផល ៣-១ នៅលើទឹកដីរបស់ខ្លួន ។</span></p>
<p><span style="color: #000000;">ដូចគ្នានោះដែរ តម្លៃសំបុត្រចូលទស្សនាមិនខុសគ្នាកាលពីប្រកួតទល់នឹងក្រុមមកពីថៃ Muangthong United និង Buriram United នោះដែរ ដោយក្នុងដំបូលតម្លៃ២ដុល្លារ និងនៅក្រៅដំបូលតម្លៃត្រឹមតែ១ដុល្លារប៉ុណ្ណោះ ៕</span></p>
<p style="text-align: center;"><span style="color: #000000;"><img src="https://fbcdn-sphotos-b-a.akamaihd.net/hphotos-ak-xal1/v/t1.0-9/995343_1705503116355873_682758836256378105_n.jpg?oh=5ae093bed0f87140d53bd77b11397995&oe=5789EDF1&__gda__=1465577396_3acf59a198d95ce20aeaca4c67550506" alt="" width="730" /></span></p>
<p style="text-align: center;"><span style="color: #000000;">ក្រុម Cambodia All Stars (ស) ពេលប្រកួតទល់នឹង Buriram United របស់ថៃ</span></p>
<p style="text-align: center;"><span style="color: #000000;"><img src="https://fbcdn-sphotos-h-a.akamaihd.net/hphotos-ak-xap1/v/t1.0-9/1508109_1705503146355870_9220569859800164203_n.jpg?oh=b0a2ee8a664bc7633cc751161e5c1de6&oe=574F7104&__gda__=1468575960_8e8960ce2c61adde8df855c97fa4e445" alt="" width="730" /></span></p>
<p style="text-align: center;"><span style="color: #000000;">គ្រូបង្វឹកបឹងកេត លោក ប្រាក់ សុវណ្ណារ៉ា</span></p>
<p style="text-align: center;"><span style="color: #000000;"><img src="https://scontent-kul1-1.xx.fbcdn.net/hphotos-xfp1/t31.0-8/11057963_1705503123022539_1551929986891897535_o.jpg" alt="" width="730" /></span></p>
<p style="text-align: center;"><span style="color: #000000;">ខ្សែប្រយុទ្ធភ្នំពេញក្រោន Booysen Shane</span></p>
<p style="text-align: center;"><span style="color: #000000;"><img src="https://fbcdn-sphotos-d-a.akamaihd.net/hphotos-ak-xap1/v/t1.0-9/10485995_1705503113022540_5235419652274556920_n.jpg?oh=083cc15272456db0edbda6b2268af9db&oe=578F9495&__gda__=1469622700_729bc221082243d2155aa756d13b84eb" alt="" width="730" /></span></p>
<p style="text-align: center;"><span style="color: #000000;">កីឡាករកូរ៉េខាងត្បូង Choe Myong-ho</span></p>
<p style="text-align: center;"><span style="color: #000000;"><img src="https://fbcdn-sphotos-h-a.akamaihd.net/hphotos-ak-xpf1/v/t1.0-9/10274333_1705503149689203_8103141604485796492_n.jpg?oh=d55b3664e0d2e54f319eae4da93be7c2&oe=5794E385&__gda__=1469287866_e27671b6ea9b88fa842f2dfcd619aa3b" alt="" width="730" /></span></p>
<p style="text-align: center;"><span style="color: #000000;">កីឡាករ ធារី ចន្ថាប៊ីន</span></p>
<p style="text-align: center;"><span style="color: #000000;"><img src="https://fbcdn-sphotos-c-a.akamaihd.net/hphotos-ak-xpa1/v/t1.0-9/1622019_1705503163022535_2699681172615911295_n.jpg?oh=dc03a13626df2d13e639fb7e49cd3faa&oe=5755507D&__gda__=1465038021_07e0d950f64337abd74b5ee1d6e4c3db" alt="" width="730" /></span></p>
<p style="text-align: center;"><span style="color: #000000;">កែវ សុខផេង</span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
</div>