<div class="article-content">
<p><strong>សៀមរាប៖</strong> រូបភាពដ៏ប្រណីតៗ នៃតួប្រាសាទរបស់កម្ពុជា ប្រមាណជា ១០០ប្រសាទ នៅក្នុងទីក្រុងសៀមរាបដ៏រុងរឿង រួមទាំងប្រាសាទអង្គរវត្តផងនោះ បានមានវត្តមាននៅក្នុងទំព័រ Street View (<a href="https://www.google.com/maps/views" target="_blank">https://www.google.com/maps/views</a>) និងវិទ្យាស្ថានចងក្រងវប្បធម៌ (Google Culture Institute) (<a href="https://www.google.com/culturalinstitute/home?view=grid" target="_blank">https://www.google.com/cultural institute/home ?view=grid</a>) របស់ Google ហើយ។ការដាក់បញ្ចូលប្រាសាទបុរាណរបស់ខ្មែរកម្ពុជា លើទំព័ររបស់ Google ទាំងពីរនេះ ត្រូវបានរំពឹងថា នឹងធ្វើឲ្យមនុស្សជាតិនៅលើពិភពលោក បានស្គាល់កាន់តែច្បាស់ថែមទៀត អំពីប្រាសាទបុរាណដ៏ប្រណីតរបស់ខ្មែរ ហើយអាចនឹងជួយទាក់ទាញ ភ្ញៀវទេសចរអន្តរជាតិកាន់តែច្រើន តាមផ្ទាំងទស្សនីយភាព នៃរូបភាពទាំងអស់នេះ។</p>
<p>ពិធីសម្ពោធដាក់បង្ហាញ និងប្រើប្រាស់ជាផ្លូវការនូវរូបភាពស្ទ្រីតវីយូ (Street View Imagery) នៃតំបន់អង្គរដ៏ល្បីល្បាញ នៅលើផែនទី Google Maps និងនៅក្នុងគម្រោងអច្ឆរិយវត្ថុពិភពលោក (World Wonder Project) របស់វិទ្យាស្ថានចងក្រងវប្បធម៌ (Google Culture Institute) របស់ Googleត្រូវបានធ្វើឡើង នាព្រឹកថ្ងៃទី០៣ ខែមេសា ឆ្នាំ២០១៤ លើទឹកដីអង្គរ ដោយមានការចូលរួមពីក្រុមអ្នកសារព័ត៌មានជាតិ និងអន្តរជាតិ ជាច្រើននាក់។</p>
<p>អ្នកជំនាញការរបស់ Google បានបញ្ជាក់ថា តាមរយៈរូបភាព Street View ដ៏ថ្មីសន្លាងនេះ ប្រជាជនជុំវិញពិភពលោក អាចទស្សនាកម្សាន្តលើ បណ្តាញអ៉ីនធឺណិតនូវតំបន់ប្រាសាទប្រវត្តិសាស្ត្រអង្គរ និង អាចគយគន់តួប្រាសាទ ព្រមទាំងចម្លាក់នានាយ៉ាងជាក់ស្តែង តាមប្រព័ន្ធរូបភាពឌីជីថល ៣៦០ដឺក្រេ។ មិនតែប៉ុណ្ណោះ ប្រជាពលរដ្ឋកម្ពុជា ក៏ដូចជាជាតិសាសន៍ដទៃ ក៏អាចស្វែងយល់បន្ថែមទៀតផងដែរ អំពីបេតិកភណ្ឌប្រវត្តិសាស្ត្រ និង វប្បធម៌ អង្គរ ដ៏សម្បូរបែប តាមរយៈវិចិត្រសាលនិម្មិត លើបណ្តាញអ៉ីនធឺណិតនៅក្នុងគម្រោងអច្ឆរិយវត្ថុរបស់ Google។</p>
<p>លោក មែនិក ហ្គូបតា (Manik Gupta) ប្រធានគ្រប់គ្រងផលិតផល នៃ Google Map (<a href="https://www.google.com/maps/preview" target="_blank">https://www.google.com/maps/preview</a>) បានមានប្រសាសន៍ថា «យើងសង្ឃឹមថា ប្រជាជនកម្ពុជា និងប្រជាជនទូទាំងពិភពលោក អាចស្វែងយល់ពីកេរ្តិ៍មរតកវប្បធម៌ និង កេរ្តិ៍តំណែលបុរាណរបស់ប្រទេសកម្ពុជា តាមវិធីដ៏ថ្មីសន្លាងនេះ។ មិនថាតែការទស្សនាឡើងវិញ នៅតាមតំបន់ប្រសាទ ដ៏ល្បីល្បាញ ដូចជាប្រាសាទបាយ័ននាឱកាសបុណ្យចូលឆ្នាំថ្មីនេះ ឬក៏ការសិក្សាពីចម្លាក់ក្បាច់រាប នៃរឿងរាមកេរ្តិ៍ ក្នុងឈុតឆាកសមរភូមិទីក្រុងលង្ការ នាបរិវេណប្រាសាទ អង្គរវត្តប៉ុណ្ណោះទេ Street View គឺអាចជួយលោកអ្នកឲ្យធ្វើការរុករក និងស្វែងយល់ពីបេតិកភណ្ឌអង្គរ ដ៏សម្បូរបែបនេះ បានយ៉ាងងាយស្រួលជាងមុនផងដែរ»។</p>
<p>រូបភាពដែលជាផ្ទាំងទស្សនីយភាព នៃប្រាសាទបុរាណរបស់ខ្មែរ នឹងមានដាក់តាំងនៅលើគម្រោងអច្ឆរិយវត្ថុពិភពលោក (World Won ders Project) នៃវិទ្យាស្ថានចងក្រងវប្បធម៌របស់ Google ដែលអ្នកប្រើប្រាស់អាចចូល ទៅមើលយ៉ាងលម្អិត ពីចម្លាក់សិល្បៈដ៏ល្បីល្បាញ ដូចចម្លាក់រឿងកូរសមុទ្រទឹកដោះ ឬក៏ចម្លាក់រឿងសមរភូមិកុរុ សេត្រា (Battle of Kuru kshetra)។ អ្នកចូលចិត្តសិល្បៈ នឹងកោតសរសើររូបភាពពិព័រណ៍ ទាក់ទងនឹងប្រាសាទអង្គរវត្តជិត ៣០០ ផ្ទាំង ដែលតាំងនៅក្នុងវិទ្យាស្ថានចងក្រងវប្បធម៌ រួមមានដូចជារូបភាពសខ្មៅ នៃប្រាសាទជាច្រើន ថតតាំងពីទសវត្សរ៍ទី៤០ ក៏ដូចជាស្នាដៃបង្ហាញរបស់សិល្បករនានា ដែលរៀបរាប់ពីជីវិតនាយុគសម័យអង្គរ (<a href="https://www.google.com/culturalinstitute/entity/%2Fm%2F019xfl" target="_blank">https://www.goog le.com/culturalinstitute/entity/%2Fm%2F019xfl</a>)។</p>
<p>លោក អាមិត ស៊ូដ (Amit Sood) អគ្គនាយក នៃវិទ្យាស្ថានចងក្រងវប្បធម៌របស់ Google បានថ្លែងថា «បេសកកម្មរបស់វិទ្យាស្ថានចងក្រងវប្បធម៌ គឹដើម្បីធ្វើឲ្យបេតិកភណ្ឌនានា នៅលើពិភពលោក ងាយស្រួលក្នុងការរុករក ស្វែងយល់ និង ដើម្បីអភិរក្សតាមលក្ខណៈឌីជីថល សម្រាប់បន្សល់ទុកដល់អ្នកជំនាន់ក្រោយ។ តាមរយៈការបង្ហាញលើបណ្តាញអ៉ីនធឺណិត នូវទស្សនីយភាពនៃតំបន់អង្គរ ដែលជានិមិត្តរូប ដ៏អស្ចារ្យបំផុតរបស់ប្រទេសកម្ពុជា យើងសង្ឃឹមថា នឹងអាចទាក់ទាញប្រជាជនទូទាំងពិភពលោក ឲ្យស្វែងយល់បន្ថែមទៀតអំពីពិភពសិល្បៈ និងវប្បធម៌ខ្មែរ ដែលជាទីគាប់ចិត្តនេះ»។</p>
<p>ទេសរដ្ឋមន្រ្តី រដ្ឋមន្រ្តីក្រសួងពាណិជ្ជកម្ម លោក ស៊ុន ចាន់ថុល បានមានប្រសាសន៍ថា បច្ចេកវិទ្យា Street View របស់ Google នឹងជួយជំរុញឲ្យប្រជាជនកម្ពុជាកាន់តែច្រើនឡើង ក៏ដូចជាប្រជាជនទូទាំងពិភពលោក ស្វែងយល់បន្ថែមពីតំបន់វប្បធម៌ និងប្រវត្តិសាស្រ្ត ដ៏អស្ចារ្យជាច្រើនរបស់កម្ពុជា។</p>
<p>លោកទេសរដ្ឋមន្រ្តី ស៊ុន ចាន់ថុល ដែលជារដ្ឋមន្រ្តីមួយរូបចូលចិត្តស្វែងយល់ និងសិក្សាពីបច្ចេកវិទ្យាដែរនោះ បានមានប្រសាសន៍បន្តថា «ខ្ញុំជឿជាក់ថា ឆន្ទៈនេះ នឹងរួមចំណែកធ្វើឲ្យមានសន្ទុះកំណើន នៃវិស័យទេសចរណ៍របស់យើង ដែលជាវិស័យមួយកំពុងតែជំរុញកំណើនសេដ្ឋកិច្ច និងការងារ គួរឲ្យកត់សម្គាល់នៅក្នុងប្រទេសកម្ពុជា ។ ខ្ញុំក៏សង្ឃឹមដែរថា គម្រោងស្រ្ទីតវីយូនេះ នឹងលើកទឹកចិត្ត ព្រមទាំងជួយជំរុញយុវជន និងយុវនារីខ្មែរកាន់តែ ច្រើនជាងមុន ឲ្យស្វែងយល់បន្ថែមទៀត ពីបណ្តាញអ៉ីនធឺណិត និងខ្នះខ្នែងអភិវឌ្ឍន៍ជំនាញបច្ចេកទេសរបស់ពួកគេ»។</p>
<p>រដ្ឋមន្រ្តីក្រសួងទេសចរណ៍ លោក ថោង ខុន បានមានប្រសាសន៍ថា តាមរយៈគម្រោងស្ទ្រីតវីយូ លើបណ្តាញអ៉ីនធឺណិត នឹងផ្តល់ឱកាសក្នុងការចែករំលែក នូវអច្ឆរិយវត្តដ៏អស្ចារ្យរបស់កម្ពុជា ជាមួយអ្នកទស្សនាចំនួនច្រើនជាងមុន ដែលពុំធ្លាប់មាន។</p>
<p>លោករដ្ឋមន្រ្តីថ្លែងបន្តថា «ការមើលឃើញបណ្តុំចំនួនជាងរាប់ពាន់រូប ទស្សនីយភាពគ្រប់ជ្រុង និងទំហំធំច្បាស់ នៃតំបន់ដ៏ល្បីល្បាញ និងគួរឲ្យកត់សម្គាល់បំផុតរបស់កម្ពុជា នឹងជួយជំរុញឲ្យភ្ញៀវទេសចរ មកទស្សនាប្រទេសកម្ពុជា កាន់តែច្រើនជាងមុន ព្រមទាំងជួយអ្នកដែលបានទស្សនាហើយ ឲ្យស្គាល់ពីតំបន់ថ្មីៗ ដែលទើបរុករកឃើញ»។</p>
<p>អគ្គនាយកអាជ្ញាធរជាតិអប្សរា លោក ប៊ុន ណារិទ្ធ ដែលដកស្រង់ប្រសាសន៍ដោយក្រុមហ៊ុន Google បានឲ្យដឹងថា អាជ្ញាធរជាតិអប្សរា មានសេចក្តីសោមនស្សរីករាយក្រៃលែង ដែលតំបន់កេរ្តិ៍តំណែលប្រវត្តិសាស្រ្ត និងវប្បធម៌អច្ឆរិយវត្ថុពិភពលោកជាង ១០០កន្លែង នៅអង្គរ ត្រូវបានចងក្រងយ៉ាងទូលំទូលាយតាមបែបឌីជីថល និងមានភាពងាយស្រួលសម្រាប់មនុស្សគ្រប់រូប ស្វែងយល់នៅលើបណ្តាញអ៉ីនធឺណិត។</p>
<p>លោក ប៊ុន ណារិទ្ធ បានបន្តយ៉ាងដូច្នេះ «យើងទន្ទឹងនឹងស្ថាបនាបន្តពីសមិទ្ធិផលនេះ ព្រមទាំងអភិរក្ស និងចែករំលែកឲ្យបានកាន់តែច្រើនជាងមុន នូវបទពិសោធន៍នៃប្រវត្តិសាស្ត្រ និង វប្បធម៌ខ្មែរ ជូនដល់ប្រជាជនកម្ពុជា ក៏ដូចជាប្រជាជនទូទាំងពិភពលោក»។</p>
<p>ក្រុមហ៊ុន Google ក្រុមហ៊ុនដ៏ល្បីលើពិភពលោក ក្នុងការវិនិយោគតាមប្រព័ន្ធអ៉ីនធឺណិតនោះ បានសម្តែងនូវក្តីសង្ឃឹមថា ការនាំមកនូវបច្ចេកវិទ្យា Street View នេះ នឹងផ្តល់ជូនប្រជាជនកម្ពុជានូវសេវាផែនទី តាមរយៈបណ្តាញអ៉ីនធឺណេត ដែលអាចបំពេញតាមតម្រូវការ និងមានអត្ថប្រយោជន៍សម្រាប់ពួកគេ ព្រមទាំងជួយជំរុញការអភិវឌ្ឍន៍សេដ្ឋកិច្ចរបស់ប្រទេសនេះ តាមរយៈផែនទីប្រកបដោយលក្ខណៈល្អប្រសើរជាងមុន និង ជួយបង្កើនភាពល្បីល្បាញរបស់ប្រទេសកម្ពុជា ក្លាយជាគោលដៅទេសចរណ៍ ដ៏លេចធ្លោមួយសម្រាប់ប្រជាជននៅលើពិភពលោក។</p>
<p>សូមបញ្ជាក់ផងដែរថា Street View គឺជាផ្នែកដ៏ពិសេសមួយរបស់ Google Maps ដែលត្រូវបានដាក់ឲ្យប្រើប្រាស់នៅ ៥៥ប្រទេសរួចមកហើយ។ វាអាចជួយឲ្យមនុស្សរាល់គ្នាស្វែងយល់ និងរុករកលើបណ្តាញអ៉ីនធឺណិតនូវតំបន់ ដែលមាននៅលើផែនទីតាមរយៈរូបទស្សនីយភាពដងវិថីគ្រប់ជ្រុងជ្រោយ ពោលគឺ៣៦០ដឺក្រេ។</p>
<p>Google បានបើកបររថយន្តផ្តិតយករូបភាព តាមដងវិថីនានានៅក្នុងប្រទេសកម្ពុជា តាំងពីឆ្នាំ២០១៣ ដើម្បីបញ្ចូលទៅក្នុង Google Map នាពេលអនាគត ហើយក្រុមហ៊ុនដ៏ល្បីល្បាញមួយនេះ ក៏មានគោលបំណងផ្តិតយកគ្រប់រូបភាពទូទាំងប្រទេសកម្ពុជា ក្នុងរយៈពេលប៉ុន្មានឆ្នាំខាងមុខ។</p>
<p>វិទ្យាស្ថានចងក្រងវប្បធម៌របស់ Google (Google Cultural Institute) មានគោលដៅសំខាន់ក្នុងការបង្កើតនូវបច្ចេកវិទ្យា ដែលអាចជួយឲ្យសហគមន៍ វប្បធម៌នៅក្នុងពិភពលោក នាំយកកេរ្តិ៍មរតកវប្បធម៌ កម្រងសំណុំឯកសារ ទីតាំងបេតិកភ័ណ្ឌនានា និងសម្ភារៈផ្សេងៗទៀតទៅកាន់បណ្តាញអ៉ីនធឺណិត។ គួបផ្សំនឹងវត្ថុពិព័រណ៍ជាង ៣៥៦ ពីសំណាក់ដៃគូចំនួន ៤៥៥ទូទាំងពិភពលោក វិទ្យាស្ថានចងក្រងវប្បធម៌ មានគោលបំណងបង្កើនវិសាលភាព និង បរិមាណ នៃសម្ភារៈពីពិភពវប្បធម៌ ដែលអាចឲ្យមនុស្សគ្រប់រូបរុករកស្វែងយល់ នៅលើបណ្តាញអ៉ីនធឺណិត និង ធ្វើឲ្យកេរ្តិ៍តំណែលទាំងនេះ ងាយស្រួលរកឃើញ និងត្រូវបានអភិរក្សយ៉ាងល្អប្រសើរ សម្រាប់មនុស្សជំនាន់ក្រោយ៕</p>
<p style="text-align: center;"><object width="500" height="300" data="http://www.youtube.com/v/_R4MDI-WZlA&rel=1" type="application/x-shockwave-flash"><param name="wmode" value="transparent" /><param name="src" value="http://www.youtube.com/v/_R4MDI-WZlA&rel=1" /></object></p>
<p style="text-align: center;"><object width="500" height="300" data="http://www.youtube.com/v/rodk3-UQ6mo&rel=1" type="application/x-shockwave-flash"><param name="wmode" value="transparent" /><param name="src" value="http://www.youtube.com/v/rodk3-UQ6mo&rel=1" /></object></p>
<p> </p>
<p><img style="display: block; margin-left: auto; margin-right: auto;" src="http://image.dap-news.com:81/dap-news/dap-images/2014/March/id-009/S-040.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-037.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-038.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-039.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-041.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-042.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-043.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/March/id-009/S-044.jpg" alt="" width="550" /></p>
<p><img style="display: block; margin-left: auto; margin-right: auto;" src="http://image.dap-news.com:81/dap-news/dap-images/2014/March/id-009/S-035.jpg" alt="" width="550" /></p>
<p><img style="display: block; margin-left: auto; margin-right: auto;" src="http://image.dap-news.com:81/dap-news/dap-images/2014/March/id-009/S-036.jpg" alt="" width="550" /></p>
<p style="text-align: center;"><strong>នេះជាបណ្តុំផ្ទាំងទស្សនីយភាព នៃរូបភាពប្រាសាទបុរាណខ្មែរ ដែលមានអាយុកាលជាច្រើនឆ្នាំ</strong></p>
<p style="text-align: center;"><strong>ទស្សនារូបភាពជាច្រើនផ្សេងទៀតនៅលើទំព័រហ្គូហ្គលសូមចុច៖</strong> <a href="https://www.google.com/culturalinstitute/asset-viewer/angkor-wat/EAGb9csIGP0XTg" target="_blank">Google Culture Institute</a></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>