<p><span style="color: #000000;"><strong>(ស្វីស)៖</strong> សហព័ន្ធគ្រប់គ្រងកីឡាបាល់ទាត់ពិភពលោក FIFA នឹងធ្វើការបោះឆ្នោតរាត្រីនេះ នៅក្នុងទីក្រុង Zurich ប្រទេសស្វីស ដើម្បីបន្ថែមក្រុមពី ៣២ ឡើងទៅ ៤៨ក្រុមលេងក្នុងព្រឹត្តិការណ៍បាល់ទាត់ពិភពលោក World Cup ចាប់ពីឆ្នាំ២០២៦ តទៅ។</span></p>
<p><span style="color: #000000;">ការបន្ថែមក្រុម ក៏ដូចជាផ្តល់ឱកាសសម្រាប់ក្រុមដទៃមានសិទ្ធិលេងក្នុងយុទ្ធនាការដ៏មហាអស្ចារ្យមានរយៈពេល ៤ឆ្នាំម្តងខាងលើនេះ គឹស្របទៅតាមការសន្យារបស់លោក Gianni Infantino ដែលបានសន្យាមុនជាប់ជាប្រធាន FIFA ថ្មីជំនួសកៅអីលោក Sepp Blatter កាលពីចុងខែកុម្ភៈ ឆ្នាំ២០១៦ កន្លងទៅ ដោយបានថ្លែងប្រាប់សារព័ត៌មាន BBC របស់អង់គ្លេសថា <strong>«FIFA កំពុងពិចារណា ក៏ដូចជាត្រៀមបោះឆ្នោតបន្ថែម ១៦ក្រុមទៀតទៅក្នុងរូបបន្តចាស់ ៣២ក្រុម ដើម្បីបាន ៤៨ក្រុម ស្មើនឹង៨០ប្រកួត សម្រាប់ World Cup 2026 តទៅ»</strong>។</span></p>
<p><span style="color: #000000;">ប្រធាន FIFA ថ្មីដែលមានសញ្ជាតិ២ អ៊ីតាលី និងស្វីសរូបនេះបានពន្យល់ថា ការបន្ថែម ១៦ក្រុមនេះ គឺចែកចេញជា ៤ពូល ដោយក្នុង ១ពូល មាន ៤ក្រុមដូចគ្នាស្របទៅតាមរូបមន្តចាស់ តែត្រូវធ្វើការប្រកួតសន្សំពិន្ទុក្នុងពូល ដោយជ្រើសរើសយកតែ ២ក្រុមមានពិន្ទុខ្ពស់ជាងគេ ដើម្បីឡើងទៅវគ្គចែកពូល ៣២ក្រុមចុងក្រោយជាបន្តទៀត។</span></p>
<p><span style="color: #000000;">ទន្ទឹមគ្នានោះដែរ ក្រុមស្រាវជ្រាវទីផ្សាររបស់ FIFA ក៏បានធ្វើការព្យាករណ៍ដែរថា ប្រាក់ចំណូលអាចនឹងកើនដល់ ៦.២៩ពាន់លានដុល្លារ គ្រាដែលលេងវគ្គ ៣២ក្រុម មានត្រឹមតែជាង ៤ពាន់លានដុល្លារប៉ុណ្ណោះ ជាមួយនឹងការប្រកួតរយៈពេល ១ខែពេញនៅអំឡុងខែមិថុនា រហូតដល់ខែកក្កដា។</span></p>
<p><span style="color: #000000;">សូមបញ្ជាក់ថា ប្រសិនបើការបោះឆ្នោតរាត្រីនេះទទួលបានជោគជ័យទៀត នោះមានន័យថា FIFA បានកែប្រែច្បាប់ថ្មី ដោយបន្ថែមក្រុមលេងក្នុង World Cup ៥សម័យកាលហើយ ពោលគឺចាប់តាំងពី World Cup ដំបូងត្រូវបាន ប្រកួត ក្នុងឆ្នាំ១៩៣០ វគ្គ១៣ក្រុម និងបន្តបន្ទាប់លេងវគ្គ ១៦ក្រុម, វគ្គ ២៤ក្រុម និងចុងក្រោយ វគ្គ ៣២ក្រុមរហូតដល់ បច្ចុប្បន្ន នេះ៕</span></p>
<p><span style="color: #000000;"><img src="http://image.freshnewsasia.com/2016/ID-113/fn-2017-01-10-11-12-59-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-113/fn-2017-01-10-11-13-02-0.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>