<div>
<p><span style="color: #000000;"><strong>(ភ្នំពេញ)៖</strong> អាណាព្យាបាលសិស្សសាលាជាច្រើន នៅភ្នំពេញកំពុងនាំគ្នា ព្រួយបារម្ភចំពោះកូនចៅរបស់ពួកគាត់ ជាពិសេសកូនប្រុសតែម្ដង ខណៈដែលបច្ចុប្បន្ន មានហ្គេមមួយចំនួន កំពុងពង្វក់កូនរបស់ពួកគាត់ ឲ្យគេចសាលា ចេះភូតភឪពុកម្ដាយ រហូតដល់ចេះលួចលុយ អ្នកផ្ទះយកទៅលេងហ្គេមទៀតផង។</span></p>
<p><span style="color: #000000;">អាណាព្យាបាលមួយចំនួន បានធ្វើការត្អូញត្អែរប្រាប់ Khmertalking ថា ដោយសារពួកគាត់ជាប់ធ្វើការ រកស៊ីមិនសូវមានពេលគ្រប់គ្រាន់ តាមដានកូនចៅនោះ ស្រាប់តែថ្ងៃមួយ ខាងសាលាទូរស័ព្ទសួរនាំ មិនឃើញកូនប្រុសរបស់ពួកគាត់ទៅរៀន ហើយតែងតែអវត្តមានញឹកញាប់ទៀត។ ចំណែកលុយកាក់របស់គាត់ ទុកក្នុងកាបូប ឬក្រុមគ្រួសារដាក់នៅក្នុងផ្ទះ មានការធ្វេសប្រហែសជាដើម តែងតែបាត់ញឹកញាប់ ពួកគាត់ក៏ធ្វើការតាមដាន ទើបដឹងថាកូនចៅរបស់ពួកគាត់ គេចសាលានាំគ្នាលួចលុយ យកទៅលេងហ្គេម នៅតាមហាងអ៉ីនធឺណិត ដែលជាប្រភេទហ្គេមក្មេងៗ ចូលចិត្តលេង និងចំណាយលុយអស់ច្រើន ក្នុងការទិញពិន្ទុលេង ដែលគេហៅថាហ្គេម JX2 និងហ្គេម AK....ទៅវិញ។</span></p>
<p><span style="color: #000000;">ពាក់ព័ន្ធហ្គេមអនឡាញ ដូចជា ហ្គេម JX2 និងហ្គេមAK...ខាងលើនេះ ត្រូវបានក្មេងៗដែលនិយមលេង ធ្វើការអះអាងថា ហ្គេមខាងលើវាខុសពីប្រភេទហ្គេម លេងកំសាន្តផ្សេងៗទៀត។ ហ្គេមកំសាន្តភាគច្រើន គេលេងមិនបាច់ចំណាយលុយ ធ្វើមិចឲ្យតែមានអ៉ីនធឺណិត ឬមានទូរស័ព្ទដៃ តែហ្គេមប្រភេទ JX2 និងAK...ទាល់តែបង់លុយ ទើបលេងបាន ហើយពេលខ្លះ ដោយសារតែល្បិចទាក់ទាញ របស់ក្រុមហ៊ុនផលិតហ្គេមនេះ ធ្វើឲ្យអ្នកលេងញៀន ជាពិសេសក្មេងប្រុសៗ រហូតចំណាយលុយទិញពិន្ទុ ឬទិញសម្ភារៈនៅក្នុងហ្គេម ដើម្បីលេងឲ្យគេមើលទៅឡូយ និងខ្លាំងទៀតផង ដោយសម្ភារៈខ្លះមានតម្លៃរហូតដល់១០ឬ២០ដុល្លារក៏មានដែរ។</span></p>
<p><span style="color: #000000;">ដោយសារតែការទាក់ទាញ នៃក្រុមហ៊ុនហ្គេម និងអ្នកលេងត្រូវចំណាយលុយ ច្រើនបែបនេះហើយ បានធ្វើឲ្យសិស្សសាលាមួយចំនួន នាំគ្នាគេចសាលា ខ្លះចេះភូតភឪពុកម្ដាយ ខ្លះទៀតមានដៃមានជើង ហ៊ានលួចលុយអ្នកផ្ទះ ដើម្បីយកទៅលេងហ្គេមជាដើម។</span></p>
<p><span style="color: #000000;">អ្នកមិនដឹងរឿង គេឃើញហាងអ៉ីនធឺណិត បើកឲ្យមានលេងហ្គេមប្រភេទហ្គេម JX2 និងAK...នឹកស្មានថា ជាហ្គេមធម្មតា តាមពិតជាប្រភេទហ្គេមធ្វើឲ្យក្មេងញៀនលេង និងអ្នកលេងត្រូវចំណាយលុយ ទិញពិន្ទុលេងក្នុងចំនួនទឹកប្រាក់ច្រើន សំរាប់លទ្ធភាពចំណាយរបស់ក្មេងៗសោះ។ ដូចនេះសូមឲ្យអាជ្ញាធរ មានសមត្ថកិច្ចមេត្តាចាប់អារម្មណ៍ និងជួយពិនិត្យមើលហ្គេមប្រភេទJX2 និងAK..នេះផង ថាតើគួរបន្តអនុញាតឲ្យបើកលេងតទៅទៀត ឬក៏បិទដើម្បីកុំឲ្យក្មេងៗ ដែលកំពុងស្ថិតនៅក្នុងវ័យសិក្សាគេចសាលា ចេះភូតភ និងលួចលុយអ្នកផ្ទះ យកទៅលេងហ្គេមតទៅទៀត៕</span></p>
<p><span style="color: #000000;"><a class="thickbox" title="" href="/FileManager/Commons/2016/2/23/10-23-02-2016--08-44-46.jpg"><img src="/FileManager/Articles/mce/2016/2/23/10-23-02-2016--08-44-46.jpg" alt="" /></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
<p style="text-align: center;"> </p>
</div>