<div class="article-content">
<p><span style="color: #000000;"><strong>ភ្នំពេញ ៖</strong> ដើម្បីចូល រួមចំណែក អភិរក្សប្រាសាទ បូរាណខ្មែរ រដ្ឋាភិបាល សហរដ្ឋអាមេរិក ផ្តល់ថវិកាចំនួន ៤៥០ ០០០ ដុល្លាអាមេរិកដល់មូលនិធិ ប្រាសាទ ពិភព លោកសំរាប់អភិរក្សប្រាសាទភ្នំបាក់ខែង ។</span></p>
<p><span style="color: #000000;">យោងតាមសេចក្តីប្រកាសព័ត៌មាន របស់ស្ថានទូតអាមេរិក ដែលមជ្ឈមណ្ឌលព័ត៌មានដើមអម្ពិល ទទួលបាន នៅថ្ងៃទី១ ខែសីហា ឆ្នាំ២០១៥ នេះបានឲ្យដឹងថា មជ្ឈមណ្ឌលបេតិកភណ្ឌវប្បធម៌ របស់ការិយាល័យ កិច្ចការវប្បធម៌ និងអប់រំនៃក្រសួងការបរទេសសហរដ្ឋអាមេរិក បានផ្តល់ថវិកាចំនួន ៤៥០ ០០០ ដុល្លា អាមេរិក ដល់អង្គការមូលនិធិប្រាសាទពិភពលោក (World Monuments Fund) សំរាប់ធ្វើការអភិរក្ស ប្រាសាទភ្នំបាក់ខែងដែលមានចំណាស់តាំងពីសតវត្សទី ១០ សំរាប់ដំណាក់កាលទី ៤។</span></p>
<p><span style="color: #000000;">ប្រាសាទភ្នំបាក់ខែង គឺជាប្រាសាទ ដែលចាស់ជាងគេ ក្នុងសម័យអង្គរ ហើយជាស្ថាបត្យកម្ម ដ៏អស្ចារ្យបំផុត មួយរបស់ពិភពលោក។ ដំណាក់កាលទី ៤ របស់គំរោងនឹងបង្ហើយ ការជួសជុលពេញលេញ ទៅលើចំហៀង ខាងកើតនៃប្រាសាទកណ្តាល ស្របតាមគំរោងប្លង់ជួសជុល ដែលត្រូវបានកំណត់ច្បាស់ នៅដំណាក់កាល មុនៗ។</span></p>
<p><span style="color: #000000;">សេចក្តីប្រកាសព័ត៌មាន បានឲ្យដឹងទៀតថា គំរោងនេះមានបំណង ជំរុញអោយបានច្រើនដល់ចក្ខុវិស័យ នៃផែនការមេ ក្នុងការអភិរក្សប្រាសាទភ្នំបាក់ខែង ដែលត្រូវបានកំណត់នៅឆ្នាំ ២០០៧ បន្ទាប់ពីមានការ ផ្តល់អនុសាសន៍ និងការពិគ្រោះយោបល់ជាមួយអាជ្ញាធរជាតិអប្សារា និងអង្គការ UNESCO ។</span></p>
<p><span style="color: #000000;">តាំងពីឆ្នាំ ២០០៤ មក អង្គការមូលនិធិប្រាសាទពិភពលោកបានទទួលថវិកាជិត ៣ លានដុល្លាអាមេរិក សំរាប់ធ្វើការអភិរក្សប្រាសាទភ្នំបាក់ខែង។</span></p>
<p><span style="color: #000000;">កម្ពុជាស្ថិតក្នុងចំណោមប្រទេសចំនួន ៧ ដែលរួមមានប្រទេសប៊ូតាន, បូស្នីនិង Herzegovina, ប្រទេសអេហ្ស៊ីប ហ្សកដានី លីបង់ និងប្រទេសស្រីឡាំងកាដែលបានទទួលជំនួយ នៅក្នុងឆ្នាំសារពើពន្ធ ២០១៥សំរាប់ការ អភិរក្សទីតាំងបូរាណ និងប្រវត្តិសាស្រ្ត តាមរយៈកម្មវិធីជំនួយ ថវិកាខ្នាតធំនៃមូលនិធិឯក អគ្គរដ្ឋទូតសហ រដ្ឋអាមេរិកសំរាប់ការអភិរក្សវប្បធម៌ ៕</span></p>
<p><span style="color: #000000;"><a class="thickbox" title="" href="/FileManager/Commons/2015/8/1/97-01-08-2015--12-03-40.jpg"><img src="/FileManager/Articles/mce/2015/8/1/97-01-08-2015--12-03-40.jpg" alt="" /></a><br /></span></p>
</div>
<p style="text-align: right;"><span style="color: #000000;">ផ្តល់សិទ្ធដោយ ៖ ដើមអម្ពិល</span></p>