<p><span style="color: #000000;"><strong>- នាយករដ្ឋមន្រ្តី ប្រាប់តំណាងរាស្រ្ត CNRP ឲ្យចំាទទួលផែនទីពី UN ប្រសិនបើមានបំណង</strong></span></p>
<p><span style="color: #000000;"><strong>ភ្នំពេញ៖</strong> ទីបំផុតអង្គការសហប្រជាជាតិ (UN) យល់ព្រម ប្រគល់ផែនទីខ្មែរចំនួន១៨ផ្ទាំង ឲ្យរាជរដ្ឋាភិបាលកម្ពុជា យកមកផ្ទៀងផ្ទាត់ហើយ តបតាមការស្នើសុំពីសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ខណៈដែលបញ្ហាព្រំដែនកម្ពុជា-វៀតណាម បច្ចុប្បន្នត្រូវបានគេមើលឃើញថា កំពុងក្លាយជាប្រធានបទក្តៅគគុក មួយទាំងក្នុងក្របខណ្ឌទំនាក់ទំនងកម្ពុជា-វៀតណាម ក៏ដូចជាក្នុងក្របខណ្ឌនយោបាយនៅក្នុងប្រទេសកម្ពុជា។</span></p>
<p><span style="color: #000000;">ការយល់ព្រមប្រគល់ផែនទីខ្មែរពីសំណាក់ UN ត្រូវបានសម្តេចតេជោ ហ៊ុន សែន លើកឡើងនៅក្នុងកិច្ចប្រជុំគណៈ រដ្ឋមន្រ្តីនាព្រឹកថ្ងៃទី២៤ ខែកក្កដា ឆ្នាំ ២០១៥។ ក្នុងនោះសម្តេចតេជោ បានធ្វើការណែនាំឲ្យមន្ត្រីពាក់ព័ន្ធនានា ត្រៀមចាំទទួលយកផែនទីខ្មែរនៅព្រលានយន្តហោះអន្តរជាតិភ្នំពេញ នៅពេលអង្គការសហប្រជាជាតិមកឲ្យនា ខាងមុខនេះ។</span></p>
<p><span style="color: #000000;">លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានថ្លែងឲ្យដឹងថា នៅក្នុងកិច្ចប្រជុំគណៈរដ្ឋមន្រ្តី សម្តេចនា យករដ្ឋមន្ត្រីបានបញ្ជាក់ថា ថ្មីៗនេះ អង្គការសហប្រជាជាតិ បានរកឃើញផែនទីខ្មែរចំនួន ១៨ផ្ទាំង ដែលតម្កល់ទុក នៅក្នុងមជ្ឈមណ្ឌលឯកសាររបស់ពួកគេហើយ ហើយផែនទីនោះ នឹងត្រូវប្រគល់ឱ្យប្រទេសកម្ពុជា ក្នុងពេលឆាប់ៗ នេះ។</span></p>
<p><span style="color: #000000;">បើតាមលោក ផៃ ស៊ីផាន សម្តេចតេជោ បានណែនាំឲ្យគណៈកម្មការ ដែលពាក់ព័ន្ធត្រូវមានវត្តមាន និង ចុះហត្ថ លេខាទទួល និង ជាសាក្សី។ រាជបណ្ឌិត្យសភា ជាស្ថាប័នឯករាជ្យ និង Academic ក៏ត្រូវមានវត្តមានចុះហត្ថលេ ខា និងជាសាក្សី ដើម្បីការងារនៅថ្ងៃមុខ។</span></p>
<p><span style="color: #000000;">សម្តេចនាយករដ្ឋមន្រ្តី ក៏បានបង្ហើបស្វាគមន៍តំណាងរាស្រ្តបក្សប្រឆាំង ឲ្យចាំទទួលផែនទីនេះផងដែរ ប្រសិនបើ មានបំណង។</span></p>
<p><span style="color: #000000;">សូមជម្រាបថា កាលពីថ្ងៃទី០៦ ខែកក្កដា ឆ្នាំ២០១៥ សម្តេចនាយករដ្ឋមន្ត្រី ហ៊ុន សែន បានធ្វើលិខិតទៅកាន់ លោក បាន គីមូន អគ្គលេខាធិការអង្គការសហប្រជាជាតិ ដើម្បីសុំខ្ចីផែនទីខ្មែរតម្កល់ទុកនៅអង្គការសហប្រជាជាតិ យកមកផ្ទៀងផ្ទាត់ជាមួយផែនទីរបស់រាជរដ្ឋាភិបាល ដើម្បីដោះស្រាយបញ្ហាព្រំដែន ជាមួយប្រទេសវៀតណាម។</span></p>
<p><span style="color: #000000;">ផែនទីដែលតម្កល់ទុកនៅអង្គការសហប្រជាជាតិនេះ ជាផែនទីខ្នាត ១/១០០០០០ ដែលត្រូវបានបោះពុម្ពធ្វើឡើង នៅចន្លោះឆ្នាំ១៩៣៣ ដល់១៩៥៣ ដោយរដ្ឋាភិបាលបារាំង ហើយត្រូវបានព្រះបរមរតនកោដ្ឋ នរោត្តម សីហនុ យកទៅតម្កល់ទុកនៅអង្គការសហប្រជាជាតិនៅឆ្នាំ១៩៦៤។ ផែនទីនេះ ត្រូវបានទទួលស្គាល់ជាអន្តរជាតិ នៅ ចន្លោះឆ្នាំ១៩៦៣ ដល់ ១៩៦៩។</span></p>
<p><span style="color: #000000;">សូមបញ្ជាក់ផងដែរ ក្រៅពីស្នើសុំផែនទីពីអង្គការសហប្រជាជាតិ សម្តេចតេជោ ក៏ផ្ញើលិខិតទៅកាន់ប្រធានាធិបតីបា រាំង លោក ហ្រ្វង់ស័រ ហូឡង់ ប្រធានាធិបតីអាម៉េរិក លោក បារ៉ាក់ ពូបាម៉ា និងនាយករដ្ឋមន្រ្តីអង់គ្លេស ដេវីត កាមេ រ៉ុន ដើម្បីស្នើសុំផែនទី និងជំនាញបច្ចេកទេសលើផែនទី ចូលរួមដោះស្រាយបញ្ហាព្រំដែនកម្ពុជា និង ប្រទេសជិតខា ង។</span></p>
<p><span style="color: #000000;">សម្តចតេជោ ហ៊ុន សែន បានបញ្ជាក់ផងដែរថា ការស្នើសុំផែនទីមកផ្ទៀងផ្ទាត់ ក្នុងបំណងបញ្ចប់នូវមន្ទិលសង្ស័យ របស់តំណាងរាស្រ្តបក្សប្រឆាំង និងសាធារណជនទូទៅ ក៏ដូចជាបង្ហាញភាពស្អាតស្អំរបស់រាជរដ្ឋាភិបាល ក្នុងការ ងារបោះបង្គោលព្រំដែនជាមួយប្រទេសវៀតណាម។ ជាពិសេស ការស្នើសុំផែនទីនេះ ក្នុងគោលបំណងធំបំផុត បញ្ចប់នូវការបែកបាក់របស់ជាតិ ដែលកើតឡើងពីការអុចអាលណាមួយនោះ៕</span></p>
<p><span style="color: #000000;"><a class="thickbox" title="" href="/FileManager/Commons/2015/7/25/7-25-2015-9-48-46-am-25-07-2015--09-54-39.png"><span style="color: #000000;"><img src="/FileManager/Articles/mce/2015/7/25/7-25-2015-9-48-46-am-25-07-2015--09-54-39.png" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>