<p><span style="color: #000000;"><strong>(ភ្នំពេញ)៖</strong> ពីខេត្តត្បូងឃ្មុំ ក្នុងពិធីសម្ពោធដាក់ឲ្យប្រើប្រាស់ សាកលវិទ្យាល័យសម្តេច ហេង សំរិន នាព្រឹកថ្ងៃទី១១ ខែកុម្ភៈ ឆ្នាំ២០១៦នេះ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានរំឭកឡើងវិញ អំពីការបង្កើតទំព័រ Facebook របស់សម្តេច។ សម្តេចតេជោ បានបញ្ជាក់ថា ការបង្កើតទំព័រ Facebook នេះ មិនមែនដើម្បីប្រឆាំង នឹងនរណាម្នាក់នោះឡើយ តែបង្កើតឡើង ដើម្បីពន្លឿនការងារជូនប្រជាពលរដ្ឋ ឲ្យកាន់តែឲ្យមានប្រសិទ្ធភាព។</span></p>
<p><span style="color: #000000;">បន្ទាប់ពីការប្រកាសប្រើប្រាស់ ជាផ្លូវក្នុងរយៈពេលជាង ៤ខែ បច្ចុប្បន្នទំព័រ Facebook របស់នាយករដ្ឋមន្រ្តីកម្ពុជា មានអ្នកចុចគាំទ្រ (Like) ជាង ២,៣លាននាក់ហើយ។ តាមរយៈទំព័រ Facebook នេះ សម្តេចតេជោ ហ៊ុន សែន បានទទួលសេចក្តីរាយការណ៍ ដោយផ្ទាល់ពីប្រជាពលរដ្ឋ ដែលជួបនូវទុក្ខកង្វល់ និងបញ្ហានានា ហើយក៏បានឆ្លើយតប និងដោះស្រាយជូនពួកគេ ភ្លាមៗផងដែរ។</span></p>
<p><span style="color: #000000;">សម្តេចតេជោ ហ៊ុន សែន បានថ្លែងថា «បើខ្ញុំមិនមានទេ (Facebook) ដំណោះស្រាយ ក៏មិនអាចធ្វើបានលឿនដែរ។ តើការដោះស្រាយលឿនបែបនេះ មិនគួរត្រូវបានលើកទឹកចិត្តទេឬ?។ ខ្ញុំមិនចោលទម្លាប់ធ្វើការងារបស់ខ្ញុំនោះទេ ប៉ុន្តែខ្ញុំគ្រាន់តែបន្ថែមល្បឿន ការងារប៉ុណ្ណោះ។ បញ្ហារបស់ប្រជាពលរដ្ឋ មិនមែនជាបញ្ហាតូចតាចទេ សូមកុំមើលស្រាល»។</span></p>
<p><span style="color: #000000;">សម្តេចនាយករដ្ឋមន្រ្តី ក៏បានរំឭកអំពីការចាត់ចែង ការងារមួយចំនួនជាមួយមន្រ្តីតាមប្រព័ន្ធ Whatsapp ក្រោយពេលទទួលបានសំណូមពរ ពីប្រជាពលរដ្ឋ។ សម្តេចបានរំឭកពីការបញ្ជាទៅកាន់ អភិបាលខេត្តកំពង់ចាម លោក លន់ លឹមថៃ ឲ្យដោះស្រាយបញ្ហាជូនប្រជាពលរដ្ឋម្នាក់ ដែលត្រូវបានថៅកែចាប់ដាក់គុក ព្រោះតែលុយ ៨០ដុល្លារផងដែរ៕ </span></p>
<p><a class="thickbox" title="" href="/FileManager/Commons/2016/2/11/14a-11-02-2016--11-03-25.jpg"><img src="/FileManager/Articles/mce/2016/2/11/14a-11-02-2016--11-03-25.jpg" alt="" /></a></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>
<p> </p>