<p><span style="color: #000000;"><strong>(អាមេរិក)៖</strong> លោក Fethullah Gule អ្នកប្រាជ្ញអ៊ីស្លាម និងជាគូវិវាទដ៏ខ្លាំងក្លា ជាមួយនឹងប្រធានាធិបតី តួកគី លោក Recep Tayyip Erdogan បានបដិសេធថា ពិតជាមិនបានស្ថិត នៅពីក្រោយការញុះញង់ ឲ្យមានរដ្ឋប្រហារនៅ ប្រទេសតួកគីឡើយ ហើយការទាមទារ បត្យាប័នពីអាមេរិកនោះ ក៏នឹងមិនបានសម្រេចដែរ។ នេះបើតាមការចេញផ្សាយ នៅមុននេះបន្តិច ដោយ Channel News Asia នាព្រឹកថ្ងៃអង្គារ ទី១៩ ខែកក្កដា ឆ្នាំ២០១៦។</span></p>
<p><span style="color: #000000;">លោក Gulen ក៏ជាមេដឹកនាំដ៏សំខាន់នៅក្នុង ចលនា Hizmet នៅក្នុងប្រទេសតួកគីផងដែរ ដែលបានលើកស្ទួយការ អប់រំតាមបែបអ៊ីស្លាមទំនើប ប៉ុន្តែក្រោយមកត្រូវបានលោក Erdogan ចោទថាជាក្រុមភេរវកររួច ក៏ឈានដល់ការ និរទេសរូបលោកទៅអាមេរិក កាលពីឆ្នាំ១៩៩៩។ លោក Gulen នៅតែប្រកែករាល់ការចោទប្រកាន់ទាំងអស់ ជាពិសេសការដែលថា លោកជាមេខ្លោងនៅពីក្រោយរដ្ឋប្រហារ កាលពីយប់ថ្ងៃសុក្រទី១៥ ខែកក្កដា ដែលបានបណ្តាលឲ្យមនុស្សសរុបជាង ៣២០នាក់បាត់បង់ជីវិត និង១,៤០០នាក់រងរបួស។</span></p>
<p><span style="color: #000000;">លោក Gulen បានថ្លែងប្រាប់ AFP ថា «ខ្លួនខ្ញុំផ្ទាល់ គ្មានអ្វីដែលត្រូវព្រួយបារម្ភនោះទេ។ សហរដ្ឋអាមេរិកជាប្រទេស ដែលគោរពច្បាប់។ ការគោរពច្បាប់គឺស្ថិតនៅ លំដាប់កំពូលហើយនៅទីនេះ។ ខ្ញុំមិនជឿថារដ្ឋាភិបាលអាមេរិក នឹង ចាប់អារម្មណ៍រឿងនេះ ហើយធ្វើអ្វីមួយដែលមិនស្រប ទៅតាមច្បាប់នោះឡើយ។ ប៉ុន្តែការពិតនោះ ខ្ញុំក៏នឹងត្រូវស្លាប់ នោថ្ងៃណាមួយដែរ។ ដូច្នេះទោះបីជាខ្ញុំស្លាប់ លើគ្រែ ឬក៏ក្នុងគុកក៏ខ្ញុំមិនខ្វាយខ្វល់ដែរ»។</span></p>
<p><span style="color: #000000;">គួរបញ្ជាក់តាមការផ្សាយរបស់ CNN ថា សំណើរជាផ្លូវការពីរដ្ឋាភិបាលតួកគី ក្នុងការនាំខ្លួនលោក Gulen វ័យ៧៥ឆ្នាំត្រឡប់មកវិញនេះ នឹងត្រូវបញ្ជូនទៅអាមេរិកនៅប៉ុន្មានថ្ងៃទៀត។ ប៉ុន្តែរដ្ឋមន្ត្រីការបរទេសអាមេរិកលោក ចន ឃើរី បានថ្លែងតបវិញថា ទីក្រុងអង់ការ៉ា ត្រូវតែផ្តល់នូវ «ភស្តុតាង ជាជាងការចោទប្រកាន់» ទៅលើលោក Gulen៕</span></p>
<p><span style="color: #000000;"><img src="http://image.freshnewsasia.com/2016/ID-111/fn-2016-07-19-11-32-11-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ខ្មែរថកឃីង</span></p>