<p>បើទោះជាត្រូវបានគេមើលឃើញថា ទទួលបានរបបប្រាក់ខែ និងសេវាកម្មល្អបំផុត ប៉ុន្ដែ កីឡាករ កីឡាការិនី នៅកូរ៉េខាងជើង ក៏នឹងអាចក្លាយជាអ្នកទោសគ្រប់ពេល ប្រសិនប្រកួតចាញ់។<br /><br /><strong>ក្រុមកីឡាករ ប្រកួតចាញ់ គ្រូបង្វឹកត្រូវទទួលទោសពលកម្មធ្ងន់</strong><br /><br />ក្នុងអំឡុងពេលដឹកនាំក្រុមកីឡាករបាល់ទាត់ជម្រើសជាតិ ប្រកួតនៅ World Cup ២០១០ លោក Kim Jong Hun ដែលជាប្រធានក្រុមគ្រូបង្វឹកនៃក្រុមបាល់ទាត់ជម្រើសជាតិ កូរ៉េខាងជើង បានអះអាងថា “ខ្ញុំតែងទទួលបានការចង្អុលបង្ហាញអំពីយុទ្ធសាស្ដ្រ ក្នុងរយៈពេលនៃការប្រកួត ពីមេដឹកនាំ Kim Jong-il តាមរយៈទូរស័ព្ទ” ។ នោះគឺជាយុទ្ធសាស្ដ្រដែលមេដឹកនាំរូបនេះ មិនអាចមើលឃើញ ហើយវាក៏ត្រូវបានមេដឹកនាំកំពូលនេះ បង្កើតឡើងដោយគំនិតគាត់ផ្ទាល់។<br /><br />ប៉ុន្ដែ ប្រការអាក្រក់បានកើតឡើង នោះគឺក្រុមជម្រើសជាតិកូរ៉េខាងជើង ទទួលបរាជ័យ មិនមានលទ្ធភាពប៉ះពាល់ដល់ពាន់រង្វាន់ជើងឯក។ បន្ទាប់ពីបានបរាជ័យ ៣ប្រកួត ពិសេសគឺចាញ់ ព័រទុយហ្គាល់ ៧ ទល់នឹង ០ ទាំងគ្រូបង្វឹក ទាំងកីឡាករបាល់ទាត់ជម្រើសជាតិកូរ៉េខាងជើង ត្រូវបានចោទប្រកាន់ពីបទក្បត់ឧត្តមគតិជាតិ។<br /><br />នៅក្នុងសាលមួយ ក្នុងវិមានវប្បធម៌ព្យុងយ៉ាង បណ្ដាកីឡាករដែលបានចូលរួមប្រកួត World Cup ២០១០ ត្រូវបានគេស្ដីបន្ទោសនៅចំពោះមុខមន្ដ្រីរដ្ឋាភិបាល កីឡាករ និងនិស្សិតផ្នែកកីឡា ចំនួន ៤០០រូប។ លោក Ri Dong Kyu អ្នកអធិប្បាយផ្នែកកីឡារបស់ស្ថានិយទូរទស្សន៍ជាតិកូរ៉េខាងជើង បានធ្វើការរិះគន់លើចំណុចខ្សោយ របស់កីឡាករម្នាក់។<br /><br />ក្រៅពីនេះ គ្រូបង្វឹក លោក Kim Jung Hun ត្រូវបានគេបណ្ដេញចេញពីបក្ស និងត្រូវបានដាក់ទោសឱ្យទៅធ្វើពលកម្មធ្ងន់ នៅការដ្ឋានសាងសង់មួយ រយៈពេល ១៤ម៉ោង/ថ្ងៃ។</p>
<p style="text-align: center;"><a class="thickbox" title="" href="/FileManager/Commons/2013/10/25/nkorea1-25-10-2013--22-09-22.jpg"><img src="/FileManager/Articles/mce/2013/10/25/nkorea1-25-10-2013--22-09-22.jpg" alt="" /></a></p>
<p style="text-align: center;"><em>អតីតប្រធានគ្រូបង្វឹករបស់ក្រុមបាល់ទាត់ជម្រើសជាតិ លោក Kim Jong Hun</em></p>
<p>ជាងនេះ មូលហេតុមួយ ក្នុងចំណោមកត្តាជាច្រើនធ្វើឱ្យក្រុមកីឡាករទាំងនេះ មានកំហុសធំ គឺដោយសារពួកគេបណ្ដោយឱ្យចាញ់ ១ទល់ ២ ពេលប្រកួតជាមួយប្រេហ្សីល។ នេះគឺជាការប្រកួតដែលត្រូវបានចាក់ផ្សាយនៅតាមកញ្ចក់ទូរទស្សន៍ជាតិ។<br /><br /><strong>ឈ្នះក្លាយជាអ្នកក្លាហាន ចាញ់ធ្វើជាអ្នកទោស</strong><br /><br />នៅក្នុងវ័យ ៤៥ឆ្នាំ អតីតកីឡាករក្បាច់គុន judo របស់កូរ៉េខាងជើង គឺលោក Lee Chang Soo បច្ចុប្បន្ន រស់នៅក្នុងប្រទេសកូរ៉េខាងត្បូង បានចាកឆ្ងាយពីក្ដីស្រមៃទទួលបានជ័យជំនះនៅ Olympic ប៉ុន្ដែលោកនៅតែជឿថា ម្នាក់ក្នុងចំណោមកូនប្រុសទាំងបីនាក់របស់គាត់នឹងទទួលបានជោគជ័យជំនួសគាត់ ក្នុងការដណ្ដើមយកមេដាយនៅ Olympic និងវ៉ៃឈ្នះកីឡាករកូរ៉េខាងជើង។<br /><br />លោក Lee Chang Soo ថ្លែងថា ៖ “នោះគឺត្រូវតែជាមេដាយមាស Olympic ។ ខ្ញុំចង់ឱ្យពួកគេ (កូរ៉េខាងជើង) ឃើញថា មនុស្សម្នាក់ដែលធ្លាប់បានចាញ់ បានចិញ្ចឹមកូនឱ្យមានកំណើតបែបណា ហើយនឹងមិនត្រូវបានគេផ្ដួលឱ្យដួល។ នោះគឺជាការចាប់ផ្ដើមនៃការសងសឹករបស់ខ្ញុំ ” ។</p>
<p style="text-align: center;"><a class="thickbox" title="" href="/FileManager/Commons/2013/10/25/nkorea2-25-10-2013--22-09-53.jpg"><img src="/FileManager/Articles/mce/2013/10/25/nkorea2-25-10-2013--22-09-53.jpg" alt="" /></a><br /> <br /><em>ក្រុមកីឡាករកូរ៉េខាងជើង នៅព្រលានយន្ដហោះព្យុងយ៉ាង</em></p>
<p>ក្នុងអំឡុងពេលនៃការដណ្ដើមបានមេដាយមាសចំនួនបី នៅក្នុងការប្រកួតនៅ Olympic ឆ្នាំ ១៩៨៥ ក្នុងប្រទេសជប៉ុន លោក Lee Chang Soo ទទួលបានសិទ្ធិពិសេសៗជាច្រើនដែលរដ្ឋបានកំណត់សម្រាប់កីឡាករឆ្នើមរបស់កូរ៉េខាងជើង ក្នុងនោះមានដូចជា បានក្លាយបក្សជន ទទួលបានរថយន្ដ Mercedes Benz ទូរទឹកកក ប្រាក់រង្វាន់ និងផ្ទះ។ល។ ជាងនេះ កីឡាករឆ្នើមដូចគាត់ ក៏ត្រូវបានតែងតាំងជាវិរបុរស និង ជា កីឡាករប្រជាជន។<br /><br />ប៉ុន្ដែ ប៉ុន្មានឆ្នាំក្រោយមក នៅពេលលោក Lee Chang Soo បានប្រកួតចាញ់កីឡាករកូរ៉េខាងត្បូង ជីវិតរបស់គាត់ក៏បានឈានដល់ទំព័រថ្មី។ លោកថ្លែងថា ៖ “ខ្ញុំត្រូវបានគេបញ្ជូនទៅធ្វើពលកម្មនៅតំបន់រ៉ែធ្យូងមួយ ក្រោយពីប្រកួតចាញ់កីឡាករកូរ៉េខាងត្បូង ជាលើកទីមួយ នៅ Beijing Asian Games”។<br /><br />ដោយសារតែរស់នៅក្នុងស្ថានភាពបាត់បង់ភាពម្ចាស់ការជាកីឡាករ លោក Lee Chang Soo ក៏បានបណ្ដោយឱ្យចាញ់ដោយចេតនា ក្នុងការប្រកួតនៅអេស្ប៉ាញ ឆ្នាំ ១៩៩១ ៖ “ខ្ញុំបានគិតថា ហេតុអ្វីក៏ខ្ញុំត្រូវឈ្នះ? ប្រសិនដណ្ដើមបានមេដាយមាស វាបានទៅកូរ៉េខាងជើង មិនមែនខ្ញុំនោះទេ។ ដើម្បីខ្លួនឯង ខ្ញុំក៏ធ្វើជាចាញ់ និងស្វែងរកវិធីរើខ្លួន” ។<br /><br />ដោយមិនអាចដាក់ទោសដល់លោក Lee Chang Soo ក្រុមមន្ដ្រីបក្សកុម្មុយនិស្ដកូរ៉េខាងជើង ក៏ងាកមកធ្វើបាបក្រុមគ្រួសាររបស់លោក។ បងប្រុសរបស់លោក ត្រូវបានបញ្ជូនទៅធ្វើពលកម្មនៅក្នុងរោងម៉ាស៊ីនឈើមួយកន្លែង ចំណែកសមាជិកដទៃក្នុងគ្រួសារលោក សុទ្ធតែត្រូវបានបញ្ជូនទៅធ្វើការយ៉ាងលំបាក នៅតំបន់រ៉ែធ្យូង។<br /><br /><strong>ចាញ់កូរ៉េខាងត្បូង គឺក្បាត់</strong></p>
<p>Woo Young Lee សាស្ដ្រាចារ្យនៅមហាវិទ្យាល័យកូរ៉េខាងជើង ធ្លាប់រៀននៅក្រុង Seoul បានឱ្យដឹងថា ៖ “ក្នុងសង្គមកូរ៉េខាងជើង កីឡាករត្រូវបានគេគោរពដូចជាវរជន ហើយពួកគេត្រូវបានគ្រប់គ្រង ហ្វឹកហាត់ និងទទួលការឧបត្ថម្ភ ខ្នាតជាតិ” ក្នុងបំណងនាំមកនូវភាពអស្ចារ្យជូនប្រទេស។<br /><br />លោក Bang Gu Kyeong អតីតសិស្ស Taewondo ជនជាតិកូរ៉េខាងជើង នៅកូរ៉េខាងត្បូង និយាយថា កីឡាករកូរ៉េខាងជើង ត្រូវបាននាំចូលសិក្សានៅតាមបណ្ដាសាលាពិសេស តាំងពីពួកគេនៅក្មេង ហើយពួកគេទទួលបានប្រាក់ខែ និងអាហារប្រចាំថ្ងៃ។</p>
<p style="text-align: center;"><a class="thickbox" title="" href="/FileManager/Commons/2013/10/25/nkorea3-25-10-2013--22-10-18.jpg"><img src="/FileManager/Articles/mce/2013/10/25/nkorea3-25-10-2013--22-10-18.jpg" alt="" /></a></p>
<p style="text-align: center;"><em>គ្រូបង្វឹកអត្ដពលកម្មកូរ៉េខាងជើង នាង Jong Sun Yong កំពុងណែនាំសិស្ស នៅព្យុងយ៉ាង</em></p>
<p>ប៉ុន្ដែ សម្រាប់កីឡាករទាំងអស់ ប្រសិនបានប្រកួតចាញ់ ពិសេសចាញ់ អាមេរិក និងកូរ៉េខាងត្បូង គឺមានន័យស្មើនឹងការត្រូវបានគេចោទថា ក្បត់នឹងឧត្តមគតិប្រយុទ្ធរបស់បក្ស មិនស្មោះត្រង់នឹងមេដឹកនាំ។<br /><br />បន្ទាប់ពីចាញ់ការប្រកួត បណ្ដាកីឡាករបរាជ័យនឹងត្រូវបានបញ្ជូនទៅឃុំខ្លួន រង់ចាំកិច្ចប្រជុំមួយដើម្បីកំណត់ទោស។ ប្រសិនត្រូវបានកំណត់ទោសថា “មិនស្មោះត្រង់” ពួកគេនឹងត្រូវបណ្ដេញចេញពីវិស័យកីឡា ហើយត្រូវបានបញ្ជូនទៅពលកម្មយ៉ាងវេទនា ឬក៏ត្រូវជាប់ពន្ធនាគារក៏មាន។</p>
<p> </p>
<p><strong>អត្ថបទប្លែកៗសំខាន់ៗដែលគួរចាប់អារម្មណ៍ ៖</strong></p>
<p><span style="color: #3366ff;"><a href="/News/Detail/75630/north-korea--not-cry-for-leaders-is-illegal"><span style="color: #3366ff;">កូរ៉េខាងជើង ៖ មិនយំស្រណោះមេដឹកនាំប្រទេស គឺត្រូវមានទោស</span></a></span></p>
<p><span style="color: #3366ff;"><a href="/News/Detail/62745/angelic-face-goes-viral-online-with-muscular-body"><span style="color: #3366ff;">ស្រីស្អាតសាច់ដុំកង់ៗ ធ្វើឱ្យបុរសទាំងឡាយ ប្រាថ្នាផង ច្រណែនផង</span></a><a href="/News/Detail/29716/one-dog-use-nose-to-bury-one-puppy"></a></span></p>
<p><span style="color: #3366ff;"><a href="/News/Detail/29716/one-dog-use-nose-to-bury-one-puppy"><span style="color: #3366ff;">រំជួលចិត្ត៖ ឆ្កែមួយក្បាល ប្រើច្រមុះ ឈ្មួសកាយដីកប់ខ្មោច កូនឆ្កែមួយក្បាលទៀត (មានវីដេអូ)</span></a></span></p>
<p style="text-align: right;"><br /><br />ប្រែសម្រួលដោយ ៖ តារា<br />ប្រភព ៖ SH<br /><br /><br /></p>
<p> </p>
<p> </p>
<p> </p>
<p> </p>