<p><span style="color: #000000;"><strong>(សេអ៊ូល)៖</strong> អតីតប្រធានាធិបតីកូរ៉េខាងត្បូង លោកស្រី ផាក គឺនហេ បានទុកសត្វឆ្កែ០៩ក្បាលចោលនៅក្នុងវិមានប្រធានាធិបតី (Blue House) បន្ទាប់ពីលោកស្រី បានរើសម្ភារៈចាកចេញពីការិយាល័យត្រឡប់ទៅលំនៅឋានឯកជនរបស់លោកស្រី កាលពីថ្ងៃអាទិត្យសប្ដាហ៍មុន ក្រោយពីត្រូវបានតុលាការធម្មនុញ្ញទម្លាក់ចេញពី តំណែងជាផ្លូវដោយសារតែរឿងអាស្រូវពុករលួយនយោបាយ ឆយ ស៊ូនស៊ីល។ ក៏ប៉ុន្តែទន្ទឹមគ្នានោះដែរ ក្រុមអ្នកការពារសត្វបានចោទប្រកាន់ថាលោកស្រី ផាក បានរំលោភលើច្បាប់ការពារសត្វចិញ្ចឹម។ នេះបើតាមការចេញផ្សាយដោយសារព័ត៌មានចិនស៊ិនហួរ នៅរសៀលថ្ងៃសុក្រ ទី១៧ ខែមីនា ឆ្នាំ២០១៧។</span></p>
<p><span style="color: #000000;"><a class="thickbox" title="" href="/FileManager/Commons/2017/3/17/01-17-03-2017--16-07-42.jpg"><img src="/FileManager/Articles/mce/2017/3/17/01-17-03-2017--16-07-42.jpg" alt="" /></a></span></p>
<p><br /><a class="thickbox" title="" href="/FileManager/Commons/2017/3/17/01a-17-03-2017--16-07-51.jpg"><img src="/FileManager/Articles/mce/2017/3/17/01a-17-03-2017--16-07-51.jpg" alt="" /></a><span style="color: #000000;"><a class="thickbox" title="" href="/FileManager/Commons/2017/3/17/01-17-03-2017--16-07-42.jpg"></a><br /></span></p>
<p><span style="color: #000000;">យោងតាមសារព័ត៌មាននៅក្នុងស្រុក Donga Ilbo លោកស្រី ផាក បានទទួលអំណោយជាសត្វឆ្កែ០២ក្បាលនៃពូជឆ្កែកូរ៉េ Jindo ពីអ្នកជិតខាងម្នាក់ នៅពេលដែលលោកស្រីចូលកាន់តំណែងជាប្រធានាធិបតី នៅថ្ងៃទី២៥ ខែកុម្ភៈ ឆ្នាំ២០១៣ ហើយអ្នកជិតខាងរូបនេះសម្រេចចិត្តប្រគល់សត្វឆ្កែ Jindo ឱ្យលោកស្រី ផាក ដោយសង្ឃឹមថាលោកស្រីអាចនឹងលុបចោលគោលនយោបាយបែងចែករដ្ឋបាលតំបន់ និងទីក្រុង។</span></p>
<p><span style="color: #000000;">គួរបញ្ជាក់ថាបច្ចុប្បន្នឆ្កែ Jindo ទាំងពីរក្បាលខាងលើបានបង្កើតកូនចំនួន០៧ក្បាល។ លោកស្រី ផាក បានទុកឆ្កែទំាងនេះចោលនៅក្នុងវិមានប្រធានាធិបតី ខណៈក្រុមអ្នកការពារសត្វបានចោទប្រកាន់លោកស្រីថា បានរំលោភលើច្បាប់ការពារចិញ្ចឹមសត្វ។ ប៉ុន្តែ គេពុំទាន់ដឹងច្បាស់នៅឡើយទេថាលោកស្រីពិតជា រំលោភលើច្បាប់នេះ ឬក៏យ៉ាងណានោះទេ។ ដោយឡែកបើតាមមន្ត្រីការិយាល័យប្រធានាធិបតី សត្វឆ្កែJindo ០២ក្បាល និងកូន០២ក្បាល ត្រូវបានគេបញ្ជូនទៅកាន់សមាគមការពារពូជឆ្កែ Jindo ហើយ រីឯកូន០៥ក្បាលទៀតកំពុងរង់ចំាម្ចាស់ថ្មី៕</span></p>
<p><span style="color: #000000;"><a class="thickbox" title="" href="/FileManager/Commons/2017/3/17/01b-17-03-2017--16-07-32.jpg"><img src="/FileManager/Articles/mce/2017/3/17/01b-17-03-2017--16-07-32.jpg" alt="" /></a><br /><br /></span></p>
<p style="text-align: right;"><span style="color: #000000;">ប្រភព ៖ ស៊ិនហួរ</span></p>