<p><span style="color: #000000;"><strong>(ភ្នំពេញ)៖</strong> បន្ទាប់ពីគណៈវិជ្ជាជីវៈសុខាភិបាលកម្ពុជា កាលពីម្សិលមិញ បានចេញលិខិតមួយច្បាប់ដោយជម្រាបជូន លោកវេជ្ជបណ្ឌិត គួច ម៉េងលី ដោយសុំឲ្យកែតម្រូវលើការនិយាយរបស់លោក ដែលបានចុះផ្សាយ នៅលើកាសែតភ្នំពេញប៉ុស្តិ៍ នាពេលថ្មីៗពាក់ព័ន្ធនឹងអត្តបទមួយ ក្រោមចំណងជើង «ពីក្មេងល្ងង់ខ្លៅក្រីក្រ ដើររើសចំណីតាមផ្លូវបរិភោគ ទៅជាសេដ្ឋីចិត្តធម៌» ដោយលោកវេជ្ជបណ្ឌិត បាននិយាយថា <strong>«ខ្ញុំអត់ដែលជួបពេទ្យ ណាអាក្រក់សែន អាក្រក់ដូចពេទ្យនៅស្រុកខ្មែរយើងទេ។ គាត់គ្មានវិជ្ជាជីវៈ គ្មានភាពទន់ភ្លន់ គ្មានមេត្តាធម៌ នេះខ្ញុំមិនមែននិយាយទាំងអស់ទេ ខ្ញុំនិយាយបើខ្ញុំបានជួប ១០មានអាក្រក់៩»</strong>។</span></p>
<p><span style="color: #000000;">ប៉ុន្តែនៅថ្ងៃទី១៥ ខែមករា ឆ្នាំ២០១៦នេះ លោកវេជ្ជបណ្ឌិត បានឆ្លើយតបទៅវិញថា លោកមិនសុំទោសគណៈវិជ្ជាជីវៈសុខាភិបាលកម្ពុជានោះឡើយ ដោយលោកបានអះអាថា ការបញ្ចេញយោបល់របស់លោកជាលក្ខណៈបុគ្គល និងសិទ្ធិរបស់លោកតែប៉ុណ្ណោះ។</span></p>
<p><span style="color: #000000;">វេជ្ជបណ្ឌិត គួច ម៉េងលី បានថ្លែងប្រាប់អង្គភាព Fresh News នៅល្ងាចថ្ងៃនេះយ៉ាងដូច្នេះថា៖ <strong>«ការពន្យល់របស់ខ្ញុំ និងការបញ្ចេញយោបល់ខ្ញុំ គឺជាលក្ខណៈបុគ្គល និងសិទ្ធិរបស់ខ្ញុំតែប៉ុណ្ណោះ, មតិរបស់ខ្ញុំក្នុងន័យដាស់តឿន និងស្ថាបនាដល់គ្រូពេទ្យ ដើម្បីកុំឲ្យខ្វះក្រមសីលធម៌ទៀត ព្រោះវាជារឿងជាក់ស្តែង ដែលធ្វើឲ្យប្រជាពលរដ្ឋ ស្អប់ខ្ពើមគ្រូពេទ្យ និងចាកចេញពីប្រទេសទៅព្យាបាល នៅក្រៅប្រទេសច្រើនណាស់, ដូច្នេះការរិះគន់របស់ខ្ញុំក្នុងន័យបុគ្គលផ្ទាល់ខ្លួន ដែលខ្ញុំជួបប្រទះ។ ហើយការទាមទារពីគណៈវិជ្ជាជីវៈសុខាភិបាលកម្ពុជា ឲ្យខ្ញុំសុំទោសនោះគឺ ខ្ញុំមិនសុំទោសនោះទេ»</strong>។</span></p>
<p><span style="color: #000000;">Fresh News បានទំនាក់ទំនងទៅកាន់គណៈវិជ្ជាជីវៈសុខាភិបាលកម្ពុជា ប៉ុន្តែពុំទទួលបានការឆ្លើយតបនោះ ដោយបានឆ្លើយថា <strong>«មិនទាន់ទទួលដំណឹងអំពីការមិនសុំទោសពីលោកវេជ្ជបណ្ឌិត គួច ម៉េងលី នៅឡើយទេ»</strong>។</span></p>
<p><span style="color: #000000;">សូមជំរាបថា កាលពីម្សិលមិញ គណៈវិជ្ជាជីវៈសុខាភិបាលកម្ពុជា បានចេញលិខិតមួយច្បាប់ដោយជម្រាបជូនលោក គួច ម៉េងលី ដោយសុំឲ្យកែតម្រូវលើការនិយាយ របស់លោក គួច ម៉េងលី ដែលបានចុះផ្សាយនៅលើកាសែតភ្នំពេញប៉ុស្តិ៍ ពាក់ព័ន្ធនឹងអត្តបទមួយក្រោមចំណងជើង <strong>«ពីក្មេងល្ងង់ខ្លៅក្រីក្រ ដើររើសចំណីតាមផ្លូវបរិភោគ ទៅជាសេដ្ឋីចិត្តធម៌»</strong>។</span></p>
<p><span style="color: #000000;">គណៈវិជ្ជាជីវៈសុខាភិបាលកម្ពុជា បានចេញលិខិតមួយច្បាប់ដោយសរេសរថា៖ <strong>«ទាក់ទងទៅនឹងអត្តបទសារព័ត៌មាន ក្រោមចំណងជើង «ពីក្មេងល្ងង់ខ្លៅក្រីក្រ ដើររើសចំណីតាមផ្លូវបរិភោគ ទៅជាសេដ្ឋីចិត្តធម៌» លើទំព័រកាសែតភ្នំពេញប៉ុស្តិ៍ ចុះថ្ងៃទី០៨ ខែមករា ឆ្នាំ២០១៦ លោកបាននិយាយថា ខ្ញុំអត់ដែលជួបពេទ្យណាអាក្រក់សែនអាក្រក់ដូចពេទ្យនៅស្រុកខ្មែរយើងទេ។ គាត់គ្មានវិជ្ជាជីវៈ គ្មានភាពទន់ភ្លន់ គ្មានមេត្តាធម៌ នេះខ្ញុំមិនមែននិយាយទាំងអស់ទេ ខ្ញុំនិយាយបើខ្ញុំបានជួប ១០មានអាក្រក់៩, បើមានអាកប្បកិរិយាមារយាទអំនួត អឿ ឈ្លើយ ម៉ាបាវ តើកូនខ្មែរយើងអភ័ព្វយ៉ាងម៉េចទៅ»</strong>។</span></p>
<p><span style="color: #000000;">គណៈវិជ្ជាជីវៈសុខាភិបាលកម្ពុជា សុំឲ្យលោក គួច ម៉េងលី ធ្វើការកែតម្រូវ និងសុំទោសសាធារណៈចំពោះពាក្យសម្តីរបស់លោក, ប៉ុន្តែនៅថ្ងៃនេះលោកវេជ្ជបណ្ឌិត គួច ម៉េងលី ប្រកាសថា មិនសុំទោសនោះទេ៕</span></p>
<p><span style="color: #000000;"><a class="thickbox" title="" href="/FileManager/Commons/2016/1/16/1-16-2016-8-05-25-am-16-01-2016--08-18-19.png"><span style="color: #000000;"><img src="/FileManager/Articles/mce/2016/1/16/1-16-2016-8-05-25-am-16-01-2016--08-18-19.png" alt="" /></span></a></span></p>
<p><span style="color: #000000;"><a class="thickbox" title="" href="/FileManager/Commons/2016/1/16/1-16-01-2016--08-18-28.jpg"><span style="color: #000000;"><img src="/FileManager/Articles/mce/2016/1/16/1-16-01-2016--08-18-28.jpg" alt="" /></span></a><a class="thickbox" title="" href="/FileManager/Commons/2016/1/16/2-16-01-2016--08-18-37.jpg"><span style="color: #000000;"><img src="/FileManager/Articles/mce/2016/1/16/2-16-01-2016--08-18-37.jpg" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ហ្រ្វេសញ៉ូវអាស៊ី</span></p>