<p><span style="color: #000000;"><strong>(កណ្ដាល)៖</strong> គម្រោងលំនៅឋានសាធារណៈ មានតម្លៃសមរម្យ សម្រាប់គ្រួសារមន្ត្រីរាជការ កងកម្លាំងប្រដាប់អាវុធ មន្ត្រីចូលនិវត្តន៍ ជនពិការ និងប្រជាពលរដ្ឋ មានប្រាក់ចំណូលមធ្យម និងទាប ក្រោមទុនវិនិយោគប្រមាណ៦០លានដុល្លារ នឹងប្រកាសបើកលក់នៅខែកុម្ភៈនេះហើយ ដែលការិយាល័យលក់ ទីតាំងនៅភូមិទួលរកា សង្កាត់ចាក់អង្រែក្រោម ខណ្ឌមានជ័យ តាមបណ្ដោយផ្លូវជាតិលេខ២ ហើយនឹងបើកលក់-ទទួលពាក្យស្នើសុំទិញលំនៅឋាន និងប្រកាសបើកលក់ជាសាធារណៈ ក្នុងរយៈពេល២ទៅ៣ខែ ខាងមុខ។</span></p>
<p><span style="color: #000000;">ប្រធានក្រុមប្រឹក្សាភិបាលក្រុមហ៊ុន Worldbridge Land Cambodia លោកឧកញ៉ា សៀ រិទ្ធី បានថ្លែងក្នុងពិធីបញ្ចុះបឋមសិលា បើកដ្ឋានសាងសង់ លំនៅឋាននេះថា គម្រោងទី១ នៃលំនៅឋានសាធារណៈមានតម្លៃសមរម្យ ស្ថិតនៅឃុំ រកាខ្ពស់ ស្រុកស្អាង ខេត្តកណ្តាល ៨គីឡូម៉ែត្រពីក្រុងតាខ្មៅលើទំហំដីសរុប២៤ហិកតា ដែលបានចាប់ផ្ដើមសាងសង់នៅថ្ងៃទី០៧ មករានេះ នឹងបញ្ចប់ជាសា្ថពរ នៅចុងឆ្នាំ២០១៨។</span></p>
<p><span style="color: #000000;">លោកឧកញ៉ាបន្ដថា លក្ខខណ្ឌនៃការលំនៅឋានសាធារណៈនេះ មានចំនួន២,២៩៧ល្វែង គឺប្រជាជនយើងអាចទិញបានទាំងអស់ ប៉ុន្ដែត្រូវមានចំណូលទាប និងមធ្យម គឺក្រោម៥០០ដុល្លារ និងសម្រាប់តែបុគ្គលណា ដែលមានគ្រួសាររួចហើយ ដើម្បីឲ្យពួកគាត់មានលំនៅឋានសមរម្យយ៉ាងស្រស់ស្អាត ក្នុងតម្លៃសមរម្យបំផុត ចាប់ពី២-៣ម៉ឺនដុល្លារឡើងទៅ ហើយមិនអនុញ្ញាតឲ្យអ្នកមានលុយទិញទុក សម្រាប់ធ្វើអាជីវកម្មនោះឡើយ ដូច្នេះរាល់ការទទួលទិញនិងកក់ ក្រុមហ៊ុន និងក្រសួងដែនដី ជាអ្នកពិនិត្យដោយផ្ទាល់ ហើយបើអ្នកដែលទិញហើយមិននៅ ក៏គាត់មិនអាចយកទៅជួល និងលក់បន្ដដែរ លុះត្រាតែ៥ឆ្នាំក្រោយ ទើបអាចជួល និងលក់បន្ដបាន។</span></p>
<p><span style="color: #000000;">លោកបន្ដទៀតថា<strong> «ចំពោះប្រាក់កក់លំនៅឋានវិញ គឺយើងនឹងព្យាយាមធ្វើយ៉ាងឲ្យតម្លៃកក់មុននេះ មានតម្លៃទាប តែក្នុងចំនួនណាមួយ យើងមិនទាន់បង្ហើបនោះទេ ប្រហែលជា២សប្ដាហ៍ទៀត យើងនឹងប្រកាស ចំណែកឯការប្រាក់ ក្រុមហ៊ុននឹងពិភាក្សាជាមួយនិងធនាគារឯកជនផ្សេងៗ ដើម្បីបន្ទៀបការប្រាក់ និងឲ្យការប្រាក់បង់នោះ មានតម្លៃទាប»</strong> ។</span></p>
<p><span style="color: #000000;">ព្រមជាមួយគ្នានោះដែរ លោកទេសរដ្ឋមន្ដ្រី ជា សុផារ៉ា រដ្ឋមន្ដ្រីក្រសួងដែនដី នគរូបនីយកម្ម បានស្នើឲ្យម្ចាស់គម្រោងលំនៅឋានសាធារណៈ លោកឧកញ៉ា សៀ រិទ្ធី ជួយពន្លឿនការសាងសង់ លំនៅឋាន និងផ្ដល់ភាពងាយស្រួល ក្នុងការបង់រំលោះ កុំឲ្យលើសពី៨០ដុល្លារក្នុងមួយខែ ដោយបង់ក្នុងរយៈពេលតែ២០ឆ្នាំ នឹងក្លាយជាផ្ទះខ្លួនឯងផ្ទាល់ ដែលវាប្រហាក់ប្រហែលនឹងការជួលផ្ទះគេដែរ ដោយចំណាយក្នុងមួយខែអស់ថវិកា ពី៨០-៩០ដុល្លារដូចគ្នា។</span></p>
<p><span style="color: #000000;"><strong>គួររម្លឹកថា ចំនួនផ្ទះដែលត្រូវធ្វើការសាងសង់នោះ មានចំនួន ២,២៩៧ល្វែង ចែកជាពីរប្រភេទ៖</strong></span></p>
<p><span style="color: #000000;">*ផ្ទះប្រភេទទី១ ចំនួន២០២៥ខ្នង៖ ទំហំដី ៤ម៉ែត្រ គុណ១០.៥ម៉ែត្រ ទំហំផ្ទះ ៤ម៉ែត្រ គុណ៧ម៉ែត្រ កម្ពស់២ជាន់ មានបន្ទប់គេងពីរ បន្ទប់ទឹក១</span><br /><span style="color: #000000;">* ផ្ទះប្រភេទទី២ចំនួន២៧២ខ្នង៖ ទំហំដី ៦ម៉ែត្រ គុណ១០.៥ម៉ែត្រ ទំហំផ្ទះ៦ម៉ែត្រគុណ៧ម៉ែត្រ កម្ពស់២ជាន់ មានបន្ទប់គេង៣ និងបន្ទប់ទឹក៣</span><br /><span style="color: #000000;">* លំហរមុខផ្ទះ ១.៥ម៉ែត្រ និងលំហរក្រោយផ្ទះ ២ម៉ែត្រ</span></p>
<p><span style="color: #000000;">គម្រោងលំនៅឋានសាធារណៈនេះ គឺជាតំបន់លំនៅឋានមានលក្ខណៈជាសហគមន៍ ដែលមានទាំងផ្សារ ហាងទំនិញ គ្លីនិច សាលារៀន សួនច្បារ ទីធ្លាសាធារណៈ និងការិយាល័យរដ្ឋបាលសាធារណៈ នៅក្នុងគម្រោងនេះផងដែរ។ ហើយសម្រាប់គម្រោងលំនៅឋានសាធារណៈនេះ នឹងមានជាបន្ដបន្ទាប់ទៀត ដែលនឹងសាងសង់ឡើងនៅជុំវិញទីក្រុងភ្នំពេញតែម្ដង។</span></p>
<p><span style="color: #000000;">ព័ត៌មានការិយាល័យសម្រាប់ទិិញ និងកក់ តាមរយៈទូរស័ព្ទលេខ៖ ០៧០ ៩០៥ ៣៣៣/០៧០ ៩០៦ ៣៣៣ និង០៧០ ៩០៧ ៣៣៣៕</span></p>
<p><span style="color: #000000;"><img src="http://image.freshnewsasia.com/2016/ID-112/fn-2017-01-08-08-58-46-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-112/fn-2017-01-08-08-58-46-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-112/fn-2017-01-08-08-58-46-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-112/fn-2017-01-08-08-58-53-0.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>