<div class="item-page">
<p><span style="color: #000000;"><strong>(អេហ្ស៊ីប)៖</strong> គិតមកដល់ពេលនេះ គេនៅមិនទាន់ដឹងច្បាស់ថា យន្តហោះ EgyptAir ជើងហោះហើរ Flight 804 បានធ្លាក់ក្នុងសមុទ្រ ឬបាត់ទៅណាឲ្យប្រាកដនោះទេ ប៉ុន្តែក្រុមគ្រួសារនៃអ្នកដំណើរទាំង ៦៦នាក់នៅលើយន្តហោះវិញ បាននិងកំពុងរងចាំដំណឹងដោយអន្ទះសារបំផុត។</span></p>
<p><span style="color: #000000;">នៅល្ងាចថ្ងៃទី១៩ ខែឧសភាម្សិលមិញនេះ ក្រុមហ៊ុន EgyptAir និងរដ្ឋាភិបាលអេហ្ស៊ីប បានប្រកាសថា យន្តហោះ Airbus 320 ជើងហោះហើរ Flight 804 បានធ្លាក់ក្នុងសមុទ្រម៉េឌីទែរ៉ាណេ ក្បែរកោះមួយរបស់ប្រទេសក្រិច ព្រមទាំងបានរកឃើញកម្ទេចមួយចំនួន និងបានប្រកាសថា នោះជាកម្ទេចរបស់យន្តហោះ EgyptAir ប៉ុន្តែនៅព្រឹកថ្ងៃនេះ ត្រូវបានប្រទេសក្រិចច្រានចោលថា មិនមែនជារបស់ យន្តហោះដែលកំពុងបាត់ខ្លួននោះឡើយ។</span></p>
<p><span style="color: #000000;">ពាក់ព័ន្ធនឹងករណីនេះ មន្រ្តីជំនាញរបស់សហរដ្ឋអាមេរិកបានសន្និដ្ឋាន និងសង្ស័យថា យន្តហោះខាងលើនេះ ត្រូវបានដាក់បង្កៃគ្រាប់បែកឲ្យផ្ទុះនៅលើអាកាស បន្ទាប់ពីវាបានហោះចេញពីទីក្រុងប៉ារីសប្រទេសបារាំង ឆ្ពោះទៅកាន់រដ្ឋធានីគែររបស់អេហ្ស៊ីប ព្រោះប្រទេសទាំងពីរកំពុងតែប្រឈមមុខនឹងអំពើភេរវកម្ម។</span></p>
<p><span style="color: #000000;">អ្នកនាំពាក្យអាកាសចរណ៍អេហ្ស៊ីប បានប្រាប់ CNN នៅថ្ងៃសុក្រនេះថា «យើងសូមបញ្ជាក់ថា បំណែកដែលត្រូវបានរកឃើញនោះ មិនមែនជារបស់ យន្តហោះដែលកំពុងបាត់ដំណឹងនោះឡើយ ដូច្នេះការរុករកនៅតែកំពុងបន្ត។ អាកាសចរណ៍ EgyptAir មិនបានចូលរួមក្នុង ប្រតិបត្តិរុករកនោះឡើយ ដោយយើងរង់ចាំទទួលព័ត៌មានពីអាជ្ញាធរក្រិក និងយោធាអេហ្ស៊ីប»។</span></p>
<p><span style="color: #000000;">គួរបញ្ជាក់ផងដែរថា យន្តហោះ EgyptAir ជើងហោះហើរ Flight 804 បានបាត់ពីរ៉ាដា ខណៈហោះចេញពីអាកាសយានដ្ឋាន Charles de Gaulle ក្នុងទីក្រុងប៉ារីស ប្រទេសបារាំង នៅម៉ោង ២៣៖០៩នាទី ទៅកាន់អាកាសយានដ្ឋាន Cairo Airport ទីក្រុងគែ ប្រទេសអេហ្ស៊ីប ដោយផ្ទុកមនុស្ស ៦៦នាក់ ក្នុងនោះមានសហនាវិក ១០នាក់ ហើយត្រូវបានក្រុមហ៊ុន និងរដ្ឋាភិបាលអេហ្ស៊ីបបញ្ជាក់ថថា បានធ្លាក់នៅក្នុងសមុទ្រ៕</span></p>
<p><span style="color: #000000;"><img src="http://a.abcnews.go.com/images/International/ABC_map_egypt_flight_ml_160519_4x3_992.jpg" alt="" width="730" /></span></p>
<p><span style="color: #000000;"><img src="https://cdn.rt.com/files/2016.05/original/573da68ec36188e86e8b456a.jpg" alt="" width="730" /></span></p>
<p><span style="color: #000000;"><img src="http://a.abcnews.go.com/images/International/AP_EgyptAir_Family_of_Missing_BM_20160519_4x3_992.jpg" alt="" width="730" /></span></p>
<p><span style="color: #000000;"><img src="http://a.abcnews.go.com/images/International/AP_EgyptAir_Family_of_Missing2_BM_20160519_4x3_992.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>
<div></div>
</div>