<div class="article-content">
<p><strong>ភ្នំពេញ៖</strong> ប្រេសិតអង្គការ សហប្រជាជាតិ ទទួលបន្ទុកកិច្ចសិទ្ធិមនុស្ស នៅកម្ពុជា លោក សូរិយា ប្រាសាទ ស៊ូប៊ែឌី នឹងធ្វើសន្និសីទកាសែតមួយ នៅរសៀលថ្ងៃព្រហស្បតិ៍ ស្អែកនេះ ក្នុងដំណើរបំពេញបេសកកម្ម លើកទី១០ របស់លោកនៅកម្ពុជា។</p>
<p>យោងតាមសេចក្តីជូនព័ត៌មាន របស់ការិយាល័យឧត្តមស្នងការ អង្គការសហប្រជាជាតិ ទទួលបន្ទុកផ្នែក សិទ្ធិមនុស្ស ហៅកាត់ថា OHCHR ដែលមជ្ឈមណ្ឌលព័ត៌មានដើមអម្ពិល ទទួលបាននៅថ្ងៃពុធ ទី១៥ខែមករា ឆ្នាំ២០១៣ ឱ្យដឹងថា សន្និសីទនេះ នឹងធ្វើនៅការិយាល័យរបស់ OHCHR នាទីក្រុងភ្នំពេញ វេលាម៉ោង ១និង៣០ នាទីរសៀល។</p>
<p>នៅក្នុងសន្និសីទ លោក ស៊ូប៊ែឌី នឹងធ្វើបទបង្ហាញផងដែរ អំពីខ្លឹមសំខាន់ៗ មួយចំនួនដែលត្រូវបានលើកឡើង ក្នុងដំណើរបេសកកម្ម របស់លោក ហើយលោក ក៏នឹងផ្តល់វេទិកាសួរឆ្លើយ ដល់អ្នកកាសែតផងដែរ ទាក់ទងនឹង អណត្តិការងារបស់លោក។</p>
<p>លោក បានមកបំពេញទស្សនកិច្ចនៅកម្ពុជា ចាប់តាំងពីថ្ងៃទី១២ ខែមករា បន្ទាប់ពីលោក កាន់តំណែងនេះ ក្នុង ឆ្នាំ២០០៩។</p>
<p>ក្នុងដំណើរទស្សនកិច្ចនេះ លោកបានជួបសម្តែងការគួរសម និងពិភាក្សាការងារជាមួយ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្រ្តីនៃ ព្រះរាជាណាចក្រកម្ពុជា និងមន្រ្តីអង្គការសង្គមស៊ីវិល មួយចំនួន ផងដែរ ប៉ុន្តែលោក មិនបានទៅចូលរួម អង្កេតការណ៍ព្រឹត្តិការណ៍ ដែលមេដឹកនាំគណបក្សប្រឆាំង ចូលទៅបំភ្លឺ នៅសាលាដំបូងរាជធានីភ្នំពេញ កាលពីថ្ងៃទី១៤ ខែមករា ដូចការលើកឡើងរបស់ មេដឹកនាំគណបក្ស ប្រឆាំងនោះទេ ៕</p>
<p style="text-align: center;"><img src="http://image.dap-news.com:81/dap-news/dap-images/2014/January/id-078/Lay-193.jpg" alt="Photo by DAP-News" width="500" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>