<p><span style="color: #000000;"><strong>(ភ្នំពេញ)៖</strong> ក្រុមជម្រើសជាតិកម្ពុជា បានធ្វើការប្រមូលផ្ដុំហ្វឹកហាត់ជាផ្លូវការហើយ នៅលើទីលានពហុកីឡដ្ឋានជាតិកាលពីល្ងាចមិញ ក្រោមការដឹកនាំរបស់គ្រូបង្វឹកជនជាតិកូរ៉េខាងត្បូងលោក Lee Tae Hoon ដើម្បីត្រៀមប្រកួតលក្ខណៈមិត្តភាពអន្តរជាតិ ជាមួយក្រុមបាល់ទាត់ហុងកុង នាដើមខែកញ្ញាសប្ដាហ៍ក្រោយនេះ ពិសេសគឺដើម្បីត្រៀមធ្វើម្ចាស់វគ្គជម្រុះពានរង្វាន់ AFF Suzuki Cup 2016 នាខែតុលាខាងមុខ។</span></p>
<p><span style="color: #000000;">ជាមួយនឹងការប្រមូលផ្ដុំហ្វឹកហាត់នេះលោក Lee Tae Hoon កោះហៅកីឡាករ ២៤រូប មកពីក្លឹបចំនួន៦ ដែលជាសមាជិកលីគកំពូលកម្ពុជា ក្នុងនោះមានកីឡាករនៃក្លឹបព្រះខ័នរាជស្វាយរៀងចំនួន៨នាក់ កីឡាករមកពីក្លឹបបឹងកេតអង្គរ ៦នាក់ កីឡាករមកពីក្លឹបក្រសួងការពារជាតិ ៥នាក់ កីឡាករមកពីក្លឹបអគ្គស្នងការដ្ឋាននគរបាលជាតិ ២នាក់ កីឡាករមកពីក្លឹបភ្នំពេញក្រោន២នាក់ និងកីឡាករមកពីក្លឹបណាហ្គាវើលម្នាក់។</span></p>
<p><span style="color: #000000;">ដោយឡែកការប្រកួតមិត្តភាពជាមួយក្រុមបាល់ទាត់ហុងកុង គឺធ្វើឡើងនៅថ្ងៃទី០១ ខែកញ្ញាសប្ដាហ៍ក្រោយ នៅកីឡដ្ឋាន Mong Kok នាទីក្រុងហុងកុង ហើយជំនួបមិត្តភាពនេះ គឺជាការប្រកួតដកស្រង់បទពិសោធន៍ បច្ចេកទេសដ៏សំខាន់មួយរបស់ក្រុមគោព្រៃកម្ពុជា ដែលកំពុងត្រៀមខ្លួនធ្វើជាម្ចាស់ផ្ទះវគ្គជម្រុះបឋម នៃពានរង្វាន់ជើងឯក ប្រចាំតំបន់អាស៊ីអាគ្នេយ៍ AFF Suzuki Cup 2016 នៅពាក់កណ្ដាលខែតុលាខាងមុខ។</span></p>
<p><span style="color: #000000;">គួរបញ្ជាក់ថា ការប្រកួតជម្រុះពានរង្វាន់ AFF Suzuki Cup 2016 នឹងធ្វើឡើងនៅចន្លោះថ្ងៃទី១៥ ដល់ថ្ងៃទី២១ ខែតុលាខាងមុខនេះ ក្នុងពហុកីឡដ្ឋានជាតិដោយមាន ៤ក្រុមត្រូវប្រជែងគ្នា ក្នុងនោះមានក្រុមម្ចាស់ផ្ទះកម្ពុជា ឡាវ ទីម័រខាងកើត និងក្រុមជម្រើសជាតិប្រ៊ុយណេ។ ការប្រកួតនេះក្រុមណាសន្សំពិន្ទុបានច្រើនជាងគេ នឹងទទួលបានកៅអីពូល B នៃជុំផ្ដាច់ព្រ័ត្រ ដែលមានក្រុមជម្រើសជាតិមីយ៉ាន់ម៉ា ម៉ាឡេស៊ី និងវៀតណាម កំពុងរង់ចាំ ខណៈការប្រកួតជុំផ្ដាច់ព្រ័ត្រគ្រោងធ្វើនៅចុងខែវិច្ឆិកា លើទឹកដីសហម្ចាស់ផ្ទះមីយ៉ាន់ម៉ា និងហ្វីលីពីន៕</span></p>
<p><span style="color: #000000;"><img src="http://image.freshnewsasia.com/2016/019/05/fn-2016-08-25-06-33-50-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-08-25-06-33-50-1.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>