<p><span style="color: #000000;"><strong>កំពង់ចាម ៖</strong> កម្លាំងនគរបាល ដែលប្រចាំការ នៅស្ពានគីហ្សូណា ក្រុងកំពង់ចាម ខេត្តកំពង់ចាម បានទៅជួយ ចាប់ឃាត់ស្រ្តីម្នាក់ ខណៈកំពុងប៉ងលោតសម្លាប់ខ្លួន ពីលើស្ពានដើម្បីបញ្ចប់ជីវិត ពីព្រោះតែខឹងលោកប្តី ធ្វើបាបចិត្តខ្លាំងពេក ប៉ុន្តែជីវិតមិនអស់ដោយស្តេចយមរាជ មិនទាន់ ត្រូវការ ។</span></p>
<p><span style="color: #000000;">ហេតុការណ៍ប៉ងលោតសម្លាប់ខ្លួនពីលើស្ពាន គីហ្សូណា ទាំងកណ្តាលថ្ងៃនេះ បានបង្កឲ្យ មានការចោមរោមមើលពី សំណាក់ប្រជាពលរដ្ឋ ធ្វើដំណើរឆ្លងកាត់ស្ពាន បានកើត ឡើង នៅវេលាម៉ោង២៖៣០នាទី រសៀលថ្ងៃទី៣០ ខែកញ្ញា ឆ្នាំ២០១៥ ស្ថិតនៅ ចន្លោះសសរស្ពាន p8-p9 ។</span></p>
<p><span style="color: #000000;">មន្រ្តីនគរបាល ដែលយាមប្រចាំការនៅគោលដៅ ស្ពានគីហ្សូណា បានប្រាប់មជ្ឈមណ្ឌល ព័ត៌មានដើមអម្ពិលថា ស្រ្តីរងគ្រោះមានឈ្មោះ សែម ធីតា អាយុ៣០ឆ្នាំ រស់នៅភូមិបឹងកុក២ សង្កាត់បឹងកុក ក្រុងកំពង់ ចាម ហើយនៅពេលនេះ ស្ថិតក្រោមការ សួរនាំពីមូលហេតុ នៅប៉ុស្តិ៍នគរបាលវាលវង់។</span></p>
<p><span style="color: #000000;">តាមមន្រ្តីនគរបាល ស្រ្តីរងគ្រោះ បានប្រាប់ សមត្ថកិច្ចថា មូលហេតុដែលចង់ សម្លាប់ខ្លួននោះគឺខឹងប្តី ប៉ុន្តែ ស្រ្តីរូបនេះ មិនបានប្រាប់ លំអិតខឹងរឿងអ្វីនោះឡើយ ដោយគិតតែយំ និងមើលទៅដូចជា មនុស្សគ្មានវិញ្ញាណ។</span></p>
<p><span style="color: #000000;">ក្រោយការសួរនាំរួច ខាងនគរបាលប៉ុស្តិ៍ បានទាក់ទង ទៅក្រុមគ្រួសារ ឲ្យមកយក ត្រឡប់ទៅវិញ ព្រមទាំងពន្យល់ណែនាំ ឈប់ប្រព្រឹត្តអំពើបែបនេះតទៅទៀត ពោលត្រូវនាំគ្នា ដោះស្រាយបញ្ហា ដែលកើតមានឡើង៕</span></p>
<p><span style="color: #000000;"><a class="thickbox" title="" href="/FileManager/Commons/2015/9/30/9-30-2015-4-47-38-pm-30-09-2015--16-54-17.png"><img src="/FileManager/Articles/mce/2015/9/30/9-30-2015-4-47-38-pm-30-09-2015--16-54-17.png" alt="" /></a></span></p>
<p style="text-align: right;"><span>ផ្ដល់សិទ្ធដោយ៖ ដើមអម្ពិល</span><span style="color: #000000;"><br /></span></p>