<p><span style="color: #000000;"><strong>ភ្នំពេញ៖</strong> ប្រធានសម្ព័ន្ធសហជីព ចលនាកម្មករ លោក ប៉ាវ ស៊ីណា បានថ្លែងឲ្យដឹងថា លោក សប្បាយចិត្ត និង អបអរសាទរ ដែលក្រុមហ៊ុន AZ Investment បន្តមិនយកកម្រៃពីម្ចាស់រថយន្ត ដឹកកម្មករតាមបណ្តោយផ្លូវជាតិ លេខ៤ ពីខេត្តកំពង់ស្ពឺទៅព្រះសីហនុ។</span></p>
<p><span style="color: #000000;">កាលពីថ្ងៃទី២៦ ខែសីហា ឆ្នាំ២០១៥ក្រុមហ៊ុន AZ Investment ដែលទទួលបានសិទ្ធិថែទាំ និងជួសជុលផ្លូវជាតិលេខ ៤ ដែលជាផ្លូវសរសៃឈាមសេដ្ឋកិច្ច ដ៏ចម្បងរបស់កម្ពុជា បានបន្តគោលការណ៍ មិនយកប្រាក់ សម្រាប់រថយន្ត ដឹកកម្ម កររោងចក្រ។</span></p>
<p><span style="color: #000000;">នៅតាមបណ្ដោយផ្លូវជាតិលេខ ៤ ដែលតភ្ជាប់ពីរាជធានីភ្នំពេញ ទៅខេត្តព្រះសីហនុមានរោងចក្រជាច្រើន ហើយ ផ្លូវជាតិនេះក៏បានជួយសម្រួល ដល់ការដឹកជញ្ជូនទំនិញគ្រប់ប្រភេទ ទៅកាន់កំពង់ផែខេត្តព្រះសីហនុ យ៉ាងមាន ប្រសិទ្ធភាព។</span></p>
<p><span style="color: #000000;">លោក ប៉ាវ ស៊ីណាបានមានប្រសាសន៍ ប្រាប់មជ្ឈមណ្ឌលព័ត៌មានអម្ពិលនៅថ្ងៃទី២៧ សីហា ថា ការមិនបន្តយក ប្រាក់ពីម្ចាស់រថយន្តនេះ បានធ្វើឲ្យទាំងម្ចាស់រថយន្ត និងកម្មករទទួលបានផលប្រយោជន៍ទាំងសងខាង ព្រោះ កម្មករបានចំណេញថវិកាមួយកម្រិតថែមទៀត ដោយមិនចាំបាច់ចំណាយថវិកាលើករណីនេះទៀត។</span></p>
<p><span style="color: #000000;">លោកបន្តថា “ខ្ញុំសាទរ ខ្ញុំមើលឃើញថា ប្រសិនបើក្រុមហ៊ុននៅតែបន្តយកថ្លៃក្នុងការដឹកជញ្ជូនពីការឆ្លងផ្លូវ ដែល ធ្វើឲ្យគាត់ពិបាកក្នុងការចំណាយប្រចាំថ្ងៃនោះ ពួកគាត់នឹងតំឡើងតម្លៃពីក្រុមកម្មករ”។</span></p>
<p><span style="color: #000000;">បើយោងតាមតំណាង ក្រុមហ៊ុន ជារៀងរាល់ថ្ងៃយ៉ាងហោចណាស់ក៏មានរថយន្តដឹកកម្មករប្រមាណជា ១៥០ គ្រឿង ឆ្លងកាត់បញ្ជរបង់ប្រាក់របស់ខ្លួន លើកំណាត់ផ្លូវជាតិលេខ ៤ ក្នុងតំបន់អូរចំណារ ខេត្តព្រះសីហនុ។</span></p>
<p><span style="color: #000000;">ក្រុមហ៊ុន AZ បានឲ្យដឹងថា នៅឯបញ្ជរបង់ប្រាក់កំបូលជិតក្រុងភ្នំពេញវិញ រថយន្តដឹកកម្មកររោងចក្រប្រមាណ ២០០ គ្រឿងបានទទួលស្ទីគ័រលើកលែងថ្លៃឈ្នួលរួចហើយចាប់តាំងពីដើមខែសីហា។ ជារៀងរាល់ឆ្នាំ រថយន្តដឹក កម្មកររោងចក្រដែលឆ្លងកាត់បញ្ជរបង់ប្រាក់កំបូល និងអូរចំណារ មានប្រមាណជា ១០ ម៉ឺនជើងដែលក្រុមហ៊ុន AZ បានលើកលែងមិនឲ្យមានការបង់ប្រាក់។</span></p>
<p><span style="color: #000000;">លើសពីនេះក៏មានរថយន្តអាជ្ញាធរដែនដី និងប្រជាពលរដ្ឋរស់នៅតាមដងផ្លូវ ដែលធ្វើដំណើរឆ្លងកាត់ស្ថានីយ បង់ប្រាក់ ញឹកញាប់ ក៏ត្រូវបានអនុគ្រោះតម្លៃផងដែរ ដោយអនុលោមទៅតាមសេចក្តីជូនដំណឹង របស់រាជរដ្ឋាភិបាល កាលពីឆ្នាំ២០០៥ ៕</span></p>
<p><span style="color: #000000;"><a class="thickbox" title="" href="/FileManager/Commons/2015/8/27/8-27-2015-10-57-05-am-27-08-2015--11-02-46.png"><span style="color: #000000;"><img src="/FileManager/Articles/mce/2015/8/27/8-27-2015-10-57-05-am-27-08-2015--11-02-46.png" alt="" /></span></a></span></p>
<p style="text-align: right;"><span>ផ្ដល់សិទ្ធដោយ៖ ដើមអម្ពិល</span></p>