<p><span style="color: #000000;">យោងតាមនាយកដ្ឋានកសិកម្មខេត្ត ទិន្នផលទុរេននៅខេត្តកំពត និងខេត្តកំពង់ចាមនឹងថយចុះនៅឆ្នាំនេះ ដោយសារកត្តាអាកាសធាតុមិនអំណោយផល។</span><br /><span style="color: #000000;"></span><br /><span style="color: #000000;">លោក ហ៊ាន ង៉ន អនុប្រធាននាយកដ្ឋានកសិកម្មខេត្តកំពត បានថ្លែងថាទិន្នផលនឹងមិនទទួលបានក្នុងកម្រិតខ្ពស់ដូចឆ្នាំមុនទេ។</span><br /><span style="color: #000000;"></span><br /><span style="color: #000000;">លោកបាននិយាយថា ”អាកាសធាតុក្តៅខ្លាំងពេកនៅឆ្នាំនេះ មិនអំណោយផលល្អសម្រាប់ការដាំដុះទុរេនទេ” ។ ”ធុរេនត្រូវការអាកាសធាតុត្រជាក់ដើម្បីលូតលាស់ល្អ។ ”</span></p>
<p><span style="color: #000000;">ទោះជាយ៉ាងណាក៏ដោយ លោកបាននិយាយថា តម្រូវការផ្លែទុរេននៅតែមានភាពខ្លាំងក្លា។ លោកបានមានប្រសាសន៍ថា ”បន្ទាប់ពីការប្រមូលផល ឈ្មួញជាច្រើនបានកម្មង់ទិញ ហើយយើងបានលក់ចេញយ៉ាងឆាប់រហ័សតាមតម្រូវការ” ។<br /><br />លោក ង៉ន បានថ្លែងថាផ្លែទុរេនលក់ក្នុងតម្លៃចន្លោះពី ២២.០០០ រៀលទៅ ៥០.០០០ រៀលក្នុងមួយគីឡូក្រាម។ លោកបានកត់សម្គាល់ថាតម្លៃនេះខ្ពស់ជាងកាលពីឆ្នាំមុន ដែលលក់បានតែ ១៨.០០០ រៀល ទៅ ២០.០០០ រៀលប៉ុណ្ណោះ។</span></p>
<p><span style="color: #000000;"><a class="thickbox" title="" href="/FileManager/Commons/2019/5/16/2-16-05-2019--09-21-11.PNG"><span style="color: #000000;"><img src="/FileManager/Articles/mce/2019/5/16/2-16-05-2019--09-21-11.PNG" alt="" /></span></a></span></p>
<p><span style="color: #000000;">លោក ស៊ុន ថាវរៈ ប្រធានមន្ទីរកសិកម្មខេត្តកំពង់ចាម ក៏បានថ្លែងផងដែរថាទិន្នផលទំនងជានឹងធ្លាក់ចុះ ដោយសារអាកាសធាតុ។<br /><br />លោកនិយាយថា ទុរេននៅខេត្តកំពង់ចាមបច្ចុប្បន្នលក់បានដល់ ២៥.០០០ រៀល ក្នុងមួយគីឡូក្រាម។<br /><br />លោកបានបន្ថែមថាផ្លែទុរេននេះ ត្រូវបានដាំនៅលើផ្ទៃដី ៤០០ ហិកតា នៅក្នុងស្រុកចំការលើ និងស្រុកស្ទឹងត្រង់។<br /><br />លោក ង៉ន និងលោក ថាវរៈ បាននិយាយថាពួកគេចង់ឃើញផ្លែទុរេនទទួលបាន ជាផ្លែឈើតំណាងទីតាំងភូមិសាស្រ្ត (GI) នាពេលអនាគត ដែលនឹងជួយការពារកេរ្តិ៍ឈ្មោះរបស់ខ្លួន។</span></p>
<p><span style="color: #000000;"><a class="thickbox" title="" href="/FileManager/Commons/2019/5/16/1-16-05-2019--09-22-27.PNG"><img src="/FileManager/Articles/mce/2019/5/16/1-16-05-2019--09-22-27.PNG" alt="" /></a><br /></span></p>
<p><span style="color: #000000;">លោក អប់ រ៉ាឌី ប្រធាននាយកដ្ឋានកម្មសិទ្ធិបញ្ញា បានប្រាប់កាសែតខ្មែរថាមស៍ថា ទុរេនកំពតត្រូវបានគេចាត់ទុកថា ជាផលិតផលដែលមានសក្តានុពល តំណាងឲ្យទីតាំងភូមិសាស្ត្រ (GI) ប៉ុន្តែយើងមិនទាន់ធ្វើការសម្រាប់ដាក់ពាក្យ ស្នើសុំសម្រាប់ស្លាកសញ្ញានេះ នៅឡើយទេ។<br /><br />ក្រៅពីខេត្តកំពត និងខេត្តកំពង់ចាម ទុរេនក៏ត្រូវបានដាំដុះនៅខេត្តកែប និងខេត្តបាត់ដំបងផងដែរ។ ធុរេនកម្ពុជាអាចផ្គត់ផ្គង់បានតែនៅក្នុងស្រុកតែប៉ុណ្ណោះ។<br /><br />រដូវប្រមូលផលទុរេននៅខេត្តកំពត ចាប់ពីពាក់កណ្តាលខែមេសា ដល់ខែមិថុនា ខណៈពេលដែលខេត្តកំពង់ចាម ចាប់ផ្តើមនៅខែឧសភា និងបញ្ចប់នៅខែកក្កដា ៕ </span></p>
<p><span style="color: #000000;"><a class="c_tab" href="https://www.khmertimeskh.com/" target="_blank"><img src="/FileManager/Articles/mce/2019/5/10/khmertime-10-05-2019--15-33-31.png" alt="" /></a><br /></span></p>
<p style="text-align: right;"><span style="color: #000000;">ប្រភព ៖ khmertimes</span></p>